walastech 078-051210 BAGONG LIBRENG LARO ONLINE

walastech 078-051210 BAGONG LIBRENG LARO ONLINE Ni Relly Carpio

Iyung mga sirang sira ang ulo sa MMORPG diyan, eto na ang inyong pinagdadasal: Padating na ang libreng online game na inyong pinakaiintay.

Inanunsiyo kamakailan ng IP Interactive ang paglawig ng e-Games.com.ph na siyang una at nagiisang online gaming portal na magbibigay ng free to play forever na mga laro para sa lahat ng online gamers, mapa-baguhan o beterano.

Ayon sa CEO nito na si Enrique Gonzalez "Libre siya, forever. Ang kita lang ng aming kumpanya ay sa pagbili ng mga kagamitan at armas ng mga manlalaro gamit ang mga prepaid cards. Pero maaring maglaro ng libre ng diretso kahit sino kahit na gaanong katagal nila gusto."

Ang kanilang ni-launch ay ang RAN online kung saan tatlong iskwela ang naglalaban-laban habang kanilang ginagapi ang mga masasamang elemento sa isang makabagong siyudad. Pwedeng maging isang mandirigma, isang eskrimador, isang mamana, o isang salamangkero.

Andiyan rin ang O2Jam na "beatmania" na style ng laro. Ito ang unang online music game dito sa Pilipinas at ang maganda ay iyung m ga mahihilig dito ay maaaring lumaban sa World Cyber Games dahil kasama ito sa kumpetisyon.

Ikatlo ay ang Dreamville na isang avatar based online community portal na kanilang isusunod next year.

-0-0-0-0-0-0-0-

Sa mga hindi nakakaalam, ang MMORPG ay Massive Multiplayer Online Role Playing Game. Ito ay laro sa computer na nilalaro gamit ang internet kung saan daang libong manlalaro ay maaring maglaro ng sabay-sabay. Sikat na sikat ito ngayon sa mga kabataan di lamang dito sa atin ngunit sa buong mundo.

-0-0-0-0-0-0-0-

Exciting itong RAN Online dahil siya ang unang libre, at totoong libre na MMORPG na makakarating dito sa ating bansa. Iyung mga iba kasing nauna ay nagsimula na libre para makahikayat ng manlalaro pero pagtagal ay nagsimula ng maningil para malaro mo siya: Gamit ang mga prepaid cards na may passwords at PIN tulad ng sa cellphone.

-0-0-0-0-0-0-0-

TANONG: Bagong bili cellphone ko pero lagi nag off pag nag call. T.Y.

SAGOT: May problema ang cell mo na nabili. Baka may factory defect po iyan. Ibalik niyo po sa pinagbilhan ninyo at papalitan ng unit.

TANONG: Good PM po! Ask ko lang po kung ano pong problema ng cell ko, madalas kasi kumukurap kapagnagtext ako minsan patay sindi tapos pagnaka-charge mabilis mag full battery pagtinaggal ko na sa plug eh, lowbat na! God Bless po!

SAGOT: Sira na po ang battery ninyo. Ang effective lifespan ng battery ay six months lang po, makatapos noon ay dahan-dahan na pong sasama ang kanyang abilidad na mag-power ng unit. Papalitan niyo na po ang battery ninyo. Maari din po na may problema ang power contact points ng cellphone ninyo kaya siya kumukurap. Patingnan niyo na rin po sa isang trusted technician ang inyong cellphone.

TANONG: Good noon po. Ask ko lang po kung bakit nagba-black yung monitor ng PC ko. Windows 98 siya. Pag nag ba-black po siya may natitirang guhit na maliwanag sa gitna ng monitor. Thanks po.

SAGOT: Tulad ng TV, ang monitor ay maaring mapundi ang kaniyang picture tube. Baka po iyan na ang problema niyan. Patingnan niyo na po iyan sa isang trusted technician o kaya ay bumili na kayo ng bagong monitor.

TANONG: Good PM tanong ko lang kung meron bang receiving data o infrared ang unit ko? ang unit ko po ay Motorola C651, Teah of QC. Salamat.

SAGOT: Wala po, pero mayroon siyang USB connector port na maaring gamitin para magtransfer ng data mula sa inyong cellphone papunta sa computer. Kailangan niyo lang po iyung data cable and software accessory na binebenta ng Motorola. Siyempre kailangan niyo rin ng computer.

TANONG: Good PM po ask ko lang po kung ano ang sira ng cell ko 2300 po may time po na naging all blue ang screen at wala ako makita tapos nagkakaroon ng line sa right side.

SAGOT: May tama na po ang LCD ng unit niyo. Baka po maluwag lang iyan, patingnan niyo po sa trusted technician ng maayos. Bago lang kasi ang cellphone ninyo kaya hindi maari na sira na ang LCD niyo, maliban na lang kung defective part iyan, kung sa gayon ay maari ninyong papalitan ang unit ninyo sa pinagbilhan ninyo. Kung may warranty kayo.

TANONG: Bakit di me makapasok sa call reload kanina pa?

SAGOT: Dahil sa marami ang naka-unlimited, maaring natapatan kayo na congested ang network. Kapag masyadong marami ang sabay-sabay na gumagamit ng system ng network ay nangyayari iyan. At hangga't hindi nakakapag-expand ng capacity ang mga network providers ay mauulit iyan.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-078-051210-

walastech 077 - 051208 COMPUTER UPGRADES

WALASTECH 077 - 051208 COMPUTER UPGRADES Ni Relly Carpio

TANONG: Nais ko lang po sanang itanong kung paano ba mag upgrade ng processor. Ang PC ko kasi ay may INTEL Pentium 2 gusto ko sanang gawing Pentium 3. Buong motherboard ba papalitan pagi-upgrade? Sana masagot ninyo ang katanungan ko. Salamat po.

SAGOT: Maganda tanong nyo po, oo, buong motherboard ang papalitan dahil tatalon ka ng generation ng processor, pero lahat ng ibang parts ng computer mo ay hindi mo na kailangang palitan. Baka kailangan mo ring magpalit ng casing ng CPU dahil ang Pentium 3 motherboards ay iba ang size sa regular motherboards.

Pero ang cables, RAM, hard drive, floppy drive, CD-ROM, modem, ay hindi. Baka kailangan mo ring bumili ng bagong video card dahil malaki ang pinagkaiba ng mga generation na pang PII at ng PIII.

Ang general rule ay kapag nagpalit ka ng processor ay palit ka ng motherboard. Pero iyun lang, kung full upgrade ay parang bumili ka na ng bagong computer noon dahil lahat palit.

Tungkol sa mga upgrade at pagbili ng computer, hindi kailangan na ang pinakamahal ang bilhin na computer at hindi kailangan na mag-upgrade agad. Every 3 years ang magandang pag-upgrade at kung bibili ng computer ay iyung tama lang sa pangangailangan mo ang dapat mong bilhin. Kung nagpupumilit ang technician na ito o ito ang bilhin mo maghanap ka ng ibang technician. Bumili sa mga computer shops na may kasamang warranty at free service ang pagbili.

TANONG: Good PM ulit. Nais ko po kasi malaman kung ano po yung wi-fi? Nabasa ko kasi sa net na maari kang magconnect sa web using it pero di ko alam kung paano. May device ba para dito? At kailangan pa rin ba ng isang network provider sa pagkonek sa web gamit ang wifi? Salamat po ulit. Rammil.

SAGOT: Ang Wi-Fi ay short para sa wireless fidelity ito ay anumang network na gumagamit ng 802.11 network, mapasa 802.11b, 802.11a, dual-band, etc. Kapag ang isang bagay ay Wi-Fi Certified, ibig sabihin ay ang mga ibang Wi-Fi na kagamitan ay magagamit din ito at makakapagpalitan sila ng datos.

Kilala rin ito bilang Wireless LAN o Local Area Network dahil ginagamit nito ang radio waves para makapagpalit ng mga datos mula sa mga computer na kasali sa network na ito. Ito ay alternatibo sa paggamit ng mga cable na siyang gamit sa regular na LAN. Ginagamit ang Wi-Fi para sa madaliang deployment o paglagay ng isang Wireless Network.

Maari kang magconnect sa internet na gamit ang Wi Fi pero ganoon pa rin, kaiangan mo ng computer na nakakabit sa internet na siyang magpapadala o magbo-broadcast ng data sa computer mo. Kaya nagagamit ang Wi-Fi sa internet.

Kakailanganin mo ng computer o ng mga computer na may Wi-Fi transmitter at Wi-Fi LAN card. Tapos isang Access Point na para magkaroon ka ng network. Maari itong ikabit sa internet para magka internet access sa network mo.

Marami sa mga bagong laptop ay mayroon nang Wi-Fi Certified. At maari kang mag internet kahit saan na mayroong "hotspot" kung tawagin kung saan mayroong may nagbo-broadcast ng internet access sa isang lugar. Gamit ang prepaid internet card para sa "hotspot" na iyon ay makakapaginternet ka na basta malapit ka doon sa WLAN access point.

Sa madaling salita ang ginawa lang talaga ng wi-fi ay tanggalin ang mga cables sa isang computer network at ang ipinalit dito ay radio signal.

-0-0-0-0-0-0-0-

Itinalaga kamakailan ng Technical Education and Skills Development Authority (TESDA) ang IT Foundation of the Philippines (ITFP) bilang National Assessment Board para sa industriya ng Information and Communications Technology (ICT).

Inaasahan ng TESDA na sa tulong ng ITFP ay mapupunuan ang kinakailangan na 800,000 na ICT workers by 2010. Ayon kay Mr. Jun Malacaman, ITFP President, ito ay matagal ng iniintay para sa industriya ng ICT dahil sa ang assessment at certification ay nahuhuli na sa pagbigay isang maayos na paraan para masiguro ang kalidad ng mga manggawa sa ICT field.

Ang ITFP ay isang umbrella organization para sa ICT dito sa ating bansa. Siya ay represented ng mga pinakamalalaking mga assosasyon ng ICT tulad ng Philippine Software Industry Association (PSIA), Comddap, Philippine Computer Society (PCS), Philippine Electronics and Telecommunications Federation (PETEF), Goverment Organization for IT (GO-IT), Philippine State Universities and Colleges Education for Systems Society (PSUCCESS), Philippine Association Data Entry Corp. (PADEC), IT Association of the Philippines (ITAP), Philippine Association of Private Schools and Colleges and Universities (PAPSCU), at ang Information Systems Society of the Philippines (ISSSP).

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

077 - 051208

WALASTECH 076 - 051206 CELLPHONE HACKERS

WALASTECH 076 - 051206 CELLPHONE HACKERS Ni Relly Carpio

TANONG: Gandang gabi po. Nais ko lang malaman kung maari bang ma hack ang isang cellphone? Kung pwede itong mahack maari nyo bang sabihin kung paano gawin? NOKIA 3650 kasi ang gamit kong phone. Gusto ko rin po sanang malaman kung may naghahack sa cellphone ko. Salamat po.

SAGOT: Una, oo pwede na ma hack ang isang cellphone, pero hindi lahat ng model, at kailangan ay napakaspecific ng setup para mangyari iyon. Ang gamit na system ng ating mga network providers, ang GSM/GPRS EDGE/WCDMA ay napakasecure at napakahirap na i-hack.

Pero maari kung: Ang gamit mong cellphone ay nakaconnect sa internet gamit ang GPRS Internet na nauuso na ngayon at alam ng hacker ang cellphone number mo, ang IMEI number ng cellphone mo, at ang specific location mo sa cellphone grid. At bago niya marating ang cellphone mo ay dadaan muna siya sa butas ng karayom, dahil kailangan i-bypass niya ang security system ng network providers.

Naranasan mo na bang kumain ng isang dakot na pako? Mas madali pa iyon kaysa lampasan ang security network ng mga network providers.

Maliban na lang kung: may dinownload ka mula sa internet papasok sa cellphone mo na mayroong tinatawag na "trojan payload" na magbibigay sa hacker ng instant access sa iyong cellphone. Iyon lusot iyon, dahil ikaw mismo ang nagpadaan, pero sino man ang makapagdesign ng trojan na iyon ay sadyang napakagaling.

At kung may naghack sa cellphone mo malalaman mo dahil ang mga hackers ay nag-iiwan ng signature na na-hack ka nga nila. Pero sa pagkakaalam ko wala pa namang nagaganyan. Illegal taps at taping, tulad ng "hello garci," oo, pero hacking, hindi.

TANONG: Good day po, tanong ko po kung paano composer ng NOKIA 7650 kasi po sa ringtones 8e1 8f1 and so on ang mga nasa libro gayung sa cellphone ko ay nota ang nalabas po. Paano ko makokopya? Wala din po sa brochure kung paano i-edit. Kagawad Alex ng TAY.QUE

SAGOT: Saludo ako sa iyo Kagawad Alex, kaunti sa ating mga politiko ang siyang interesado sa teknolohiya. Ang iyung pagtanong sa amin ay isang kapitapitagan na katangian sa isang namumuno na tulad mo. Ang maging mapagkumbaba at magtanong sa iba kung may hindi nalalaman.

Buweno...sa iyong tanong, medyo mahirap na sagutin iyan, pero gawin kong simple, ang mga ringtone sa composer ng cellphone ay kanilang hinati sa tatlong parte, ang key o taas ng nota, ang Note mismo, at ang meter o iyung tagal ng nota. Depende sa model ng cellphone, nauuna ang meter o ang length. Pero nasa gitna palagi ang Nota. Iyung sa example mo, kapag aking binasa, ay "one eighth note of E in the first Key." Muli depende sa cellphone kung itong first key ay mababa o mataas.

Ngayon, kung gusto mong ilipat sa nota ang mga code ng ringtone, kailangang may alam ka sa basic music sheet reading. Kung hindi ka marunong, magahanap ka ng marunong magpiano o guitarista na marunong bumasa ng sheet music, kaya niyang ilipat sa sheet notes iyung codes na gamit ng mga cellphone.

Kung hindi mo ito maintindihan ay huwag kang mabahala, kaunti lang ang marunong nito. Ako nga medyo asar na asar kada ginagawa ito sa cellphone ni Kumareng Aivie na ganito ang paglagay ng notes.

TANONG: Ano ibig sabihin kapag nakaonline ka at naglalaro ng counterstrike and dial up gamit ko at habang nasa game ako may lumalabas sa monitor ko na warning: CL_FLASHENTENTITYPACHET. Then sandaling nakahang ako sa game then pagnatanggal na yung warning sign makaka-move na ako to play. PC ko 450 MHz processor, VGA card 64MB. Ty - Joel from Alabang. God Bless.

SAGOT: Hindi ko kabisado ang mga error codes ng Half-Life 3D engine na gamit ng CounterStrike so hindi ko alam ang ibig sabihin niyan, pero sa pagkakaalam ko ay baka "clear/clean flash enter entity pack/cachet" ang ibig sabihin niyan. Maari na mayroon kang graphic sprite na nakaload sa iyung version ng Counter Strike na hindi natatagpuan sa mga kalaro mo sa server na pinili mo, kaya bago ka pinapapasok sa game ay nililinis ang sprites ng character mo. Ang sprite ay hindi iyung softdrink, ito ay iyung mga maliit na piraso ng images na ginagamit ng graphics engine habang umiikot ka sa map.

Pinakamaganda na mag reinstall ka ng clean version ng Half-Life: Counterstrike at iyon ang gamitin, huwag mo nang dagdagan ng kung ano-ano para hindi lumabas ito. Maganda rin siguro na mag upgrade ka na ng computer at ng internet connection mo. Ambagal nito pareho para makalaro ka ng maayos. Lalo na ngayon na may Counter Strike Source na!

-0-0-0-0-0-0-0-

Congratulations to Goodyear Philippines on its 50th Anniversary. Salamat sa inyong pagtangkilik sa mga Pilipino Drivers. Nawa'y maging simula lang ito ng marami pang taon ng pamamalagi ninyo dito sa aming bansa. Mabuhay kayo!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

076 - 051206

walastech 075 - 051203 CONVERGENCE PARA SA MALIIT NA BUSINESSES

walastech 075 - 051203 CONVERGENCE PARA SA MALIIT NA BUSINESSES Ni Relly Carpio

Kapag sinabing ang isang kumpanya ay "converged" ang kanilang mga kagamitan sa opisina ay nakasalalay sa iisang teknolohiya. Ang teknolohiya ng Internet at ang Internet Protocols o IP. Madalas ang ibig sabihin nito ay gamit nila ang internet at ang tinatawag na local area network sa halos lahat ng kanilang mga gawain sa kumpanya.

Ibig sabihin, di lamang sila may mga telepono, pero sila ay nakakunekta din madalas sa internet, may internet connection ang mga computer at ito lahat ay naka-network sa isa't-isa. Mayroon silang server computer (parang central computer) na siyang ginagamit ng lahat para sa file storage at mga ibang business processes tulad ng printing at fax.

-0-0-0-0-0-0-0-

Dati ang pagiging converged ay madalas naabot lamang ng mga enterprise companies, o iyung mga kumpanya na napakalaki na kayang-kaya nilang magabayad para sa convergence technologies. Mahal kasi ang mga teknolohiya na kailangan para sa "convergence"

Dati iyon. Inanunsiyo kamakailan ng CISCO SYSTEMS ang kanilang produkto na nakatuon sa pagtulong sa mga small and medium businesses (SMBs) dito sa atin para mapadali ang kanilang pagiging "converged."

Kanilang ipinakilala ang Cisco Business Communications Solution: ito ay isang kumpletong communications system na kanilang binuo para ibaba sa SMB level ang mga teknolohiya na gamit ng mga enterprise level companies tulad ng voice over IP o VOIP, network routing, network switching, network security at wireless network.

Ang isa pang magandang ginawa nila at kanilang ipinakita sa isang demonstration ay kung paano sa pamamagitan ng Cisco Network Assistant 3.0 ay madali nang made-deploy o magamit ng mga customers itong bagong solusyon nila. Sabi nga nila, hindi na kailangang ikaw ay isang Cisco Certified Network Associate para mapagana ang kanilang network solution.

Napakagandang balita nito sa mga kababayan natin na may small and medium businesses. Siguradong iyung mga matagal nang gustong magkaroon ng teknolohiya ng CISCO na kanilang nakikita lamang sa mga enterprise level ay matutuwa. Ang exciting na isipin na sa tulong ng CISCO ay maatim na ng ibang mga entrepreneur nating kababayan ang convergence na dati ay parang guni-guni lang para sa isang SMB.

-0-0-0-0-0-0-0-

Isa lamang ito sa nagiging pandaigdigang kaganapan kung saan ang mga kumpanya na dati ay nakatuon sa mga enterprise level na businesses lang ay nagsisimula nang magbigay ng pansin sa mga small and medium businesses. Technologically speaking, exciting ngayon para sa mga SMBs dahil paunti-unti ay nagiging abot kamay na sa kanila ang convergence technology. Ganiyan naman talaga ang usapan sa technology eh, habang tumatagal ay nagiging mas mura na siya. Dahil iyan ang adhikain ng mga maka-tech. Ang technology for all.

-0-0-0-0-0-0-0-

TANONG: Yung Sony Ericsson T68i ko po ay colored pero mahina ang message tone at monotone, pwede ko po ba itong ipa-upgrade? Pwede po bang papalitan ng polyphonic tone ang celphone na monotone?

SAGOT: Unfortunately po once ang phone ay ginawang monotone ay iyon na ang kanyang capability. Mayroon daw nga na mga nag-u-upgrade ng cellphone from monotone to polyphonic pero bakit pa? Baka masira pa ang cellphone mo, eh hindi naman nila papalitan iyan. Bumili ka na lang ng bagong phone na mura na, pwede pa ang mga truetones. As for yung mahina mo na message tone, try mo na maghanap ng mga matitinis na monotone dahil ito iyung mga mas malalakas, baka masyadong mabababa ang mga tones na pinipili mo kaya hindi mo siya marinig. Pwede din na dahil luma na ang cellphone mo ay may tama na iyung speaker kaya mahina na rin ang ringtone.

TANONG: Good AM, tanong ko lang po kung madaling masira ang cellphone pag pinalitan ng backlight?

SAGOT: Depende. Kung ang nagpalit ng backlight ay kompetenteng technician at original parts ang ginamit ay okay ka lang. Ngunit, kung basta-basta lang ang trabaho at parts, makakasigurado ka na masisira ang cellphone mo.

TANONG: Paano ko malalaman ang security code ko na nakalimutan ko kasi hindi na makainsert ang ibang SIM dahil may security code na lalabas?

SAGOT: Sorry I can't help you. Baka naman nakaw iyang cellphone mo? Paano mo naman makakalimutan ang apat na numbers na security code ng cell mo? May paraan para ma-bypass ang security code ng cellphone, dalhin mo sa manufacturer kasama ang inyong proof of purchase at baka matulungan ka nila.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

075 - 051203

walastech 074 - 051201 Bagong Computer vs Second Hand

walastech 074 - 051201 Bagong Computer vs Second Hand Ni Relly Carpio

TANONG: Good AM po gusto ko pong bumili ng kahit second hand na computer kaya lang po ay di namin alam tumingin kung may sira na ito baka maloko lang me sa halagang 10 thousand.

SAGOT: Unang una po mas maganda kung ang inyong bibilhin ay iyung brand new, dahil una, may warranty pa po lahat ng parts nito at pag nagkaroon ng problema ay madaling mapapalitan ng walang bayad. Pangalawa, ang technician ay kasama din sa warranty kaya walang bayad din sa pagcheck-up. Oo, mas mahal, pero mas kaunti naman ang poproblemahin ninyo. Ako, na masasabing may kaalaman naman sa computers ay hindi mo mapapabili ng second hand computer maliban na lang kung kakilala ko ang pagbibilhan ko, as in kabarkada ko. Mahirap na po kasi eh. Hindi mo alam kung kailan papalya iyung computer, at kung pumalya na ay mapapagastos ka sigurado sa repair at parts.

Naandiyan pa iyung mga nanloloko na technician sa mga taong walang masyadong alam sa computer. Iyung bebentahan ka ng computer na ang parts sa loob ay second hand, o kaya ay pasira na. Nakakaasar isipin na may mga asoge talaga na ganoon pero ganun talaga ang buhay eh. May mga asoge.

Ang solusyon? Kung cannot afford ninyo ang bagong computer ay mag-ipon pa ng kaunti. Sa halagang 16,000 ay makakapagpabuo ka na ng isang computer na maari nang gamitin ng estudyante para sa mga project sa school at maari na ring gamitin sa mga games. Iyun kasing mga system na nasa 25k pataas ay top of the line iyung mga iyan, at madalas ay gaming system na iyan na talagang mahal kumpara sa simpleng work station.

Kung talagang hindi na kayang dagdagan ang budget gamitin na lang ang 10 thousand para rumenta ng paulit-ulit sa computer shop. Sa 30 pesos per hour medyo dalawang linggo na diretsong gamit na rin iyon. Medyo pwede kang magcomputer o internet ng isang oras kada araw sa isang buong taon.

Kada bibili ng computer, dapat isipin na ang gagastusin dito ay dapat na mabawi para maging investment siya imbis na gastos. Kung para sa iskwela ay dapat iyung pinakasimple lang na maaring makuha dahil gagawing gaming computer lang iyan ng mga anak mo kung kukuha ka ng top of the line. Lalong hindi makakapagaral ang mga anak mo sa kakalaro ng computer.

TANONG: Tanong ko lang po kung paano iblock yung cell thru text? Nawala na po kasi resibo ng pagkabili kaya di po madala sa NTC. Nanakaw po kasi yung cell ng kapatid ko kaya lang di naireport dahil akala nasa bahay lang. Nakita niya po doon sa kabarkada niya kaya lang di na lumitaw nung kukunin na namin yung cell. Thanks po and more power to your column nsa WALASTECH! PJ BULACAN

SAGOT: Una nakikiramay ako sa iyo PJ dahil sa nawalan kayo ng cellphone. Ngayon, obviously mahirap na ipahuli ang "kabarkada" ng kapatid mo dahil mahirap patunayan na iyon nga ang cellphone ninyo kung wala sa inyo ang resibo. Unfortunately ay wala ring paraan para ipablock through text ang isang cellphone. Sorry. Bumili na lang kayo ng bagong cell, at sa susunod ay magingat lalo na sa mga "kabarkada" niyo.

TANONG: Hello ano po ba ang mangyayari sa cellphone na laging pinaglalaruan tulad po ng space impact? Wala ho bang masama dito? More power po.

SAGOT: Dalawa lang ang mangyayari, mauubos ang battery mo at mabubura ang keypad sa sobrang gamit. Pero okay lang kahit na walang tigil kang maglaro sa cellphone mo. Game on! Kung talagang hardcore ka gamitin mong pang tanching sa tumbang preso ang cellphone mo. Iyon nakasisira ng cellphone, pero gaming hindi.

-0-0-0-0-0-0-0-

Congratulations sa MSU Iligan na nanalo ng P1Million sa Trend Micro Technology Challenge

Makatapos ng 48 oras ng programming, tinalo ng Iitians ng Mindanao State University ang ibang finalists para mapanalunan ang grand prize na One Million Pesos. Second place ang team Code Green ng De La Salle University na nanalo ng Five Hundred Thousand Pesos. Di naman nagpahuli ang Savers ng UP Diliman sa third place na siya namang nanalo ng Two Hundred Fifty Thousand Pesos.

Congrats din sa mga ibang finalists: AMACUPS ng AMA Quezon City, Phoenix ng Mapua Institute of Technology, icarOs ng Rizal Technological University, UP Bibbo ng UP Diliman, Vulcan ng UP Diliman, Checkmate ng University of San Jose-Recoletos, at XCEL ng Xavier University.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

074 - 051201

walastech 073 - 051129 pasensiya sa gamit

walastech 073 - 051129 pasensiya sa gamit Ni Relly Carpio

Madalas, marami sa mga natatanggap namin na problema sa cellphone ay maiiwasan kung ang gumagamit ay maging pasensiyoso lamang ng kaunti. Hindi naman kasi palaging ang cellphone ang may problema eh. Kadalasan ay iyung gumagamit din ang may topak.

Kaya sa susunod na magkaproblema kayo sa cellphone, tingnan niyo muna kung bakit kaya nagkaganoon? Masyado niyo bang minadali ang pag-text ninyo? Nagkasabay-sabay ba ng pindot kaya nagluko? Baka naman ubos na batterya? Malakas ba ang signal niyo, baka out of coverage area kayo?

Kaunting tiyaga lang at pasensiya, ang sabi nga ng mga matatanda: Tsong! Lamig lang.

-0-0-0-0-0-0-0-

TANONG: Good AM WALASTECH! May mga pagkakataon na may text message ako na hindi narereceive sa cellphone ko. Ngayon napapadalas. Kaya minsan tawag na lang ako lalo pag importante. Bakit kaya sablay na sa text cell phone ko? Tnx.

SAGOT: Hindi ang cellphone mo ang may problema, obviously kasi kung napapansin ninyo ay madalas na nagkakaproblema ang mga network providers nitong mga nakaraan na linggo. Kung hindi ka makatawag ay ang tagal pumasok ng mga text sa mga pinadadalhan. Ang tawag dito ay network congestion. O sa madaling salita ay nagkakatrapik sa frequency na gamit ng networks.

Isipin niyo na lang kasi kung ano ang dapat na magawa ng mga network providers. Kailangang maipadala nila ang mula 3 milyon hanggang 30 milyong text messages araw-araw. Kailangan din nilang magbigay sa mga tawag (lalo na ngayong may unlimited ang mga ibang network providers). Huwag nating kalimutan iyung mga gumagamit at nagdodownload ng mga Value Added Service na mga pictures at tones, etc. So imagine niyo kung gaanong kagulo iyon diba?

Kaya huwag ng mabigla na nangyayari ito paminsan-minsan. Ang solusyon sa dilemma mo? Tumawag ka sa network provider mo at humingi ng bagong message center number. Ito ang iyong ipasok sa setup sa messages menu.

TANONG: Hi pwede bang magtanong kasi yung cellphone ko pag nagtetext ka, tapos biglang may negtetext sa akin tapos naghang yung ring tuloy-tuloy siya kailangan pa i-off yung cell. Ibig sabihin nong may sira na yung cellphone ko?

SAGOT: Wala pong sira ang inyong cellphone. Lahat ng mga electronic devices na pwedeng mag multi-tasking ay makakaranas ng pag-hang o iyung biglang pagtigil ng lahat ng galaw. Ang nangyari sa inyo ay umulit-ulit ang huli niyang ginagawa. Normal ito, lalo na kung ang nangyari ay iyung nangyari sa inyo. Iyung nagtetext ka tapos may biglang pumasok. Maski mga bagong cellphone ay nagkakaganyan basta matapatan.

Maski tao eh, try mo: sumulat ka ng ABC sa isang papel habang nagkakandirit ka, tingnan natin kung hindi ka mahira. O kaya ay mag-addition ka habang may nagsasabi sa iyo ng random numbers sa background.

Iyun lang ang nangyari sa cellphone mo, nahira siya, kaya nag-hang siya. pasensiyahan mo na. Tama din ang ginawa mo na tinanggal ang batterya para mamatay ito, dahil iyon lang ang solusyon sa naghang na electronic device, ang i-reset ito.

TANONG: Good PM! Ask ko lang kung bakit yung cellphone ko, kapag nauntog lang ng mahina nawawala na iyung image...tapos sometimes Insert SIM-card? Tapos kapag i-on ko, SIM card rejected. Tapos, pagkatapos ng lahat...magiging okay na...

SAGOT: Wow! Patingnan mo na iyan sa isang trusted technician kasi...kung hindi, tapos ang cellphone mo. Maluwag o malapit ng masira ang LCD mo, maluwag na ang SIM holder mo, o kaya ay may short circuit na ito. Kapagdaka baka masira pa talaga SIM mo.

TANONG: Tanong ko lang po, kasi po mag te-text sa akin na pending saka delivered doon sa tinext ko. Saka bakit po biglang nag-off itong cellphone tapos nag-o-on din ng kusa! Ano po kaya sira?

SAGOT: Sa una mong tanong, pumunta ka sa message setup at i-off mo iyung message status, o message reporting, o delivery reports. Iyun kasi iyung mga natatanggap mo eh. Sa pangalawa, baka sira na ang battery connectors mo o kaya ang battery mismo o ang power switch ng cellphone mo. Patingnan mo na sa trusted technician o sa service center ng manufacturer.

-0-0-0-0-0-0-0-

Congratulations sa mga participants at semi-finalists ng University of Santo Tomas High School Cover Prince and Princess 2006 beauty titlists. At sa organizer nito, ang Multiverse led by Ms. Aivie Cabato for a successful event. Salamat sa inyong pagimbita sa WALASTECH para mag-judge sa inyong patimpalak. Greetings to the other judges, at kay Mrs. Hanilet Banzuelo Adviser ng HS Student Council. Salamat din sa Ever Bilena for their sponsorship.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

073 - 051129

walastech 072- 051126 ang suggestion ni KJ

walastech 072- 051126
Ang suggestion ni KJ
Ni Relly Carpio

"Suggestion lang po, bakit di po kayo magdiscuss tungkol sa internet,
mga latest online community website. Ano meron sa friendster bakit
click ito sa pinoy! Thanks This is KJ from Dasma, Cav."

Okay, fine, whatever. Joke! Alam niyo kasi itong si KJ ang hula ko eh
wired itong bata na ito eh. Wired meaning nakaconnect ito sa internet,
isa sa halos 8 milyong Pilipinong marunong maginternet at gumamit ng
computer. Maaring isa rin siya sa 2 milyong Pilipinong may internet
connection sa bahay.

Ngayon, dahil sa wired siya, sa tagalog: naka-alambre (kewl diba?),
nakita na ni KJ ang gusto kong maranasan ng lahat ng ating mga
kababayan. Ang magkaroon ng access sa internet para kanila ding
magamit ang lahat ng karunungan na maaring makuha mula sa internet.
Isa lamang aspeto ng internet ang sinasabi ni KJ na mga internet
groups.

Pero dahil iyon ang hiningi mo KJ, pagbibigyan ka ng Team WALASTECH.
Ang sinasabi ni KJ na "Friendster" ay isang napakasikat na online
community na makikita sa internet address na www.friendster.com at
isang free site. Free site kasi walang bayad para pasukin ang website
na ito at gamitin ang kanyang mga features o serbisyo. Ang friendster
ay sumikat dahil dumami ang mga gumamit nito na pinoy. At ng kumalat
sa Philippine Internet community na lahat halos ay kumukuha ng
friendster, naging uso na mayroon kang friendster account. Pero
kapagdaka, ang pagiging uso ay naging essential o kailangan. Dahil sa
dami ng mga miyembro na pinoy, naging napakadali niyang paraan para
hanapin ang mga nawawalang mga kaibigan, kaklase dati sa iskwela, at
para makapagpalit ng mga picture ng mga kamaganak na nasa ibang bansa.

Mula dito ay may ibang mga online community websites ang siya ring
nagpumilit na makuha ang attensiyon ng mga Pinoy Netizens (Netizen =
citizen ng internet) pero sabi nga nila, iba na ang nakauna. Ngayon ay
di lamang Friendster ang siyang nakikinabang sa napakanatural na
gawain ng pinoy na magbarkada kahit nasaan sila. Pati na rin ang
Yahoo!, ang isa sa pinakamalaking free mail at search engine companies
sa mundo ay nakakuha ng malaking Pinoy netizen share. Marami sa atin
ay may mga Yahoo! Accounts at tahasang ginagamit ang Yahoo! Groups na
internet mailing list naman ng Yahoo!. Kasama na siyempre ang walang
kamatayang Yahoo! Messenger na maaring pasukin gamit ang cellphone na
mas kinalolokohan ng Pinoy.

Sa pamamagitan ng internet at ng mga online communities na ito ay may
nabuo na isang bagong klaseng barangay ng mga Pilipino. Siguro ang
pinakamagandang tawag dito ay ang Netizen Barangay na ikaw KJ, ay
isang miyembro. Nawa'y makuha mo na turuan ang mga ibang mga kababayan
natin tungkol sa Internet para lumawig ang ating online Barangay.

-0-0-0-0-0-0-0-

TANONG: Mr. Carpio nais ko po sana itanong paano po ba malalaman na
ang nabili na cell phone ay reconditioned. Ano po ba ang sign nito?
Para maging maingat po ako. Salamat.

SAGOT: Magaling din kasi ang mga nagre-recondition ng mga cellphone
eh. Maliban na lang kung sabihin nila sa pagbenta na ito ay
refurbished ay halos hindi mo malalaman na ito nga ay hindi na
brandnew. Siguro ang pinakamadali ay tingnan mo ang kahon. Kung medyo
hindi ganoong kapulido ang pagkakagawa, pati iyung pagprint ng manual
ay maaring ito ay refurbished na cellphone. Madalas kasi ay ang
pinagtutuunan nila ng pansin ay ang cellphone at hindi ang kahon. Pero
ang pinakamadaling paraan para makasiguro ay huwag na lamang bumili sa
mga nagbebenta na medyo kaduda-duda. Bumili sa mga stall sa mga mall o
sa mga authorized dealers mismo. Kung talagang gusto mong makasiguro
ay sa shop ng manufacturer ka mismo bumili. Good luck.

TANONG: Congrats!!! You win 500 load from SMART Type 0921******* and
send to 808 so you can claim you 500 load now thank you! SMART ZED
1515# DTI# 354256. Fake po ba ito? Salamat.

SAGOT: Hindi ko na po pinakita iyung number na pinadala ninyo, pero
peke po ito. Sa mga nag pa-pasaload kita mo na agad kung ano gustong
mangyari ng asoge na nagpadala sa inyo. Sa pagkakaalam ko ay medyo
palyado ang format ng text na ito, pero kung tama ang pinadala niya ay
sa pagreply mo para sa premyo mo ay ang load mo ay malilipat sa
kaniya. Ang sabi ng SMART ay "Kung wala kang sinalihan, paano ka
mananalo." Mag-ingat sa mga text na ganito at sa mga tao na
nagpapadala ng mga text na ganito. Tandaan na ayon sa batas ay kung
ikaw ay manalo sa isang general contest ay dapat na padalhan ka ng
telegrama na nagsasaad na nanalo ka; at sa isang official satellite
office ng kumpanya na nagpa-contest ka lang maaring abutan ng iyong
premyo. Kung ang mga ito ay hindi nasunod, malaki ang pagkakataon na
manloloko ang mga iyan. Ipapulis nyo!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones,
Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa
http://walastech.blogspot.com ang mga dating issue.

-072- 051126-

walastech 071 - 051124 BATTERY O BUHAY?

WALASTECH 071 - 051124 BATTERY O BUHAY? Ni Relly Carpio

Hindi magandang gawain ang magtipid sa pamamagitan ng pagbili ng mga mumurahing mga kagamitan. Dapat isipin ng isang mamimili ang quality o kalidad ng isang produkto bago niya ito bilhin. Isang magandang halimbawa ang napagusapan namin ng bayaw ko kaninang almusal.

Ang sabi niya ay may nakita siya sa bangketa na nagbebenta ng mga battery na gawa sa china. 100 para sa 50 pesos. Ang tanong ko sa kanya: "Eh kuya, gaanong katagal naman ang charge ng bawat batterya?"

Sabi niya na siyempre sandali lamang, pero kahit na, nakamura ka naman diba? Napailing na lamang ako. Naaalala ko kasi noon na napilitan akong gumamit ng ganoong batterya. Ang nangyari? Pumutok iyung batterya sa loob nung flashlight na gamit ko. Ang laman ng mga battery ay mga chemical na nakakalason, kaya napilitan tuloy ako na itapon na lamang sa maayos na paraan ang flashlight...hindi ko na siya malinis dahil nilusaw na ng mga asido iyung mga plastic sa loob. Dahil nagtipid ako sa battery ay lalo pang napalaki ang gastos ko.

Mula noon ay hindi na ako gumamit ng mga ganoong batterya. Sana sa aking kuwento ay may matutunan din kayo, at nawa'y hindi mangyari sa inyo ang sinapit ko. Ang pagtitipid ay dapat ding ilagay sa lugar, at huwag na huwag sa mga importanteng elektronikong kagamitan at gadgets.

-0-0-0-0-0-0-0-

TANONG: Hello po! Tanong ko lang kung makakasira ba ng cellphone yung charge ng charge kasi ako po isang araw china-charge ko po kinabukasan lowbat na at tanong ko lang kung may alam kayong bilihan ng headset na para sa model na ito: MOTOROLA C651.

SAGOT: Hindi po problema kung palaging china-charge ang battery ng cellphone. Nasa gamit po kasi ng cellphone iyan. Kung palaging gamit ang isang cellphone ay natural lang na maubos agad ang charge nito, lalo na kung gagamitin sa pag-uusap. Ang battery time kasi ng isang cellphone ay nasa mga 255 hours kapag bago. Ito ay nababawasan ng isang minuto kada ilaw o tunog o vibrate ng cellphone at nababawasan ng isang oras kada minuto ng tawag, hanggang sa maubos ang oras na ito. Ito ang tinatawag na standby time ng isang cellphone. Kung iyong gamit ang iyong cell sa games o kaya sa unlimited calls, umasa ka na sa dalawang oras lang na pag-uusap sa telepono ay low batt ka na.

Habang tumatagal ay lumiliit ang standby time ng battery ng cellphone hanggang sa sobrang kaunti na lamang ng standby time nito na halos walang silbi na ang battery. Ang tawag dito ay battery deterioration. Nagsisimula ito nasa anim na buwan makatapos unang gamitin ang isang battery.

Ang headset na hanap mo ay matatagpuan sa mga MOTOROLA shops sa mga mall, tulad nung nasa digital Exchange sa Glorietta 3 sa Makati. Kung wala sila ay maari mo itong ipaorder sa kanila.

TANONG: Good PM po! Masisira po ba ang cellphone pag chinarge ng magdamag? Sasabog po ba ang battery?

SAGOT: Bawat makabagong battery na rechargable at ang mga charger mismo ng batteries ay may capacitor at circuit break kung sakaling tumaas na masyado ang voltage ng charge o kaya ay mag-overheat ang battery. Ito ay kung ang inyong charger ay iyung original o kaya ay iyung maasahan ang brand. Kung hindi, baka magkasunog kayo ng di oras.

Dapat at pwedeng iwanan ang charger kahit na ilang araw, dahil mayroong controller chip naman ang mga chargers na siyang naghahandle ng trickle charge o iyung charge na maliit na siyang nagme-maintain ng full charge sa isang battery. Kapag ito ay may sira o nasira, diyan nagsisimula ang mga short circuit na maaring maglead sa pagsabog ng battery o ng pagkalusaw nito.

Para makasigurado ay magandang ang bilhin lamang na batteries at chargers ay mga originals o kaya ay gawa ng mga known manufacturers na mapapagkatiwalaan. Paano niyo malalaman na mapapagkatiwalaan? May warranty ang mga ito at mabibili sa mga stalls ang shops ng authorized dealers and distributors.

Magandang naitanong ito ng ating reader dahil hindi malimit na ang isang defective battery ang nagiging rason para magkaroon ng sunog o disgrasya sa isang pamamahay. Ano ngayon sabi ninyo basta nakatipid? Ano mas mahal? Original battery o ang magpagawa ng nasunog na bahay? O mas masaklap...ang nakitil na buhay?

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-071 - 051124-

WALASTECH 070 - 051122 MGA MAGITING NA TECHGURO

WALASTECH 070 - 051122 MGA MAGITING NA TECHGURO Ni Relly Carpio

Congratulations sa mga nagawaran ng Philippine Innovative Teachers Leadership Awards ng Microsoft, Partners in Learning, at ng DepEd. Ito ay sina: Christie Anne Dagamac mula sa Ipil NHS Ormoc City, Region 8; Ma. Cecila T. Correa ng Manila Science HS; Cecilia M. Estoque mula sa Agusan NHS, Butuan, Caraga; Francisco S. Garcia ng Manila Science HS; at si Evelyn R. Manahan mula sa City East HS, Sta. Filomena, Iligan City, Region 10. Mabuhay kayo mga magiting na guro!

Sila ay nakalap mula sa 138 na teachers na sumali mula sa lahat ng sulok ng bansa. Mga teachers na gumagamit ng Information and Communications Technology sa pagtuturo. Ang winners ay pinili mula sa top 25 na nag-participate sa isang four-day teambuilding and immersion workshop sa Antipolo City at Marikina City.

Ang 25 na ito ay nakatanggap din ng scholarship grant para sa online Masteral Program on Education Technology sa Philippine Normal University at sa Cebu Normal University at ng Learn.Ph Foundation.

Ang lima ay pupunta sa Seoul, South Korea para ilaban ang kanilang mga award winning na paraan ng pagtuturo sa ibang mga guro sa Asya na siya ring ginawaran ng Microsoft sa Innovative Teachers Regional Conference. Ito ang ikalawang beses na ginawa ito ng Microsoft dito sa Pilipinas. Ang naunang ITLA batch ay gagraduweyt na sa Summer 2006.

-0-0-0-0-0-0-0-

TANONG: Pinutulan daw ako ng linya ng SMART at GLOBE posible po ba yun?

SAGOT: Oo, kung hindi ka nagbabayad ng bills mo kung ikaw ay nakapost-paid o kaya ay lumampas ka ng dalawang buwan na hindi nagloload sa iyong zero-balance na prepaid SIM, o kaya ay may nagcomplain sa iyo sa NTC at ikaw ay pinutulan ng service dahil iyong ginamit sa illegal activity ang iyong cell at ito ay napatunayan.

TANONG: Good Evening, isa po ako sa tagasubaybay ng column niyo sa PM dito sa Aklan. Tanong ko lang po kung ano sira ng cellphone ko, may lumalabas po kasing contact service pag binuksan ko at naka hang lang siya?

SAGOT: Kaya lumalabas ang contact service dahil maluwag na ang pagkakadikit ng SIM mo sa contacts nito sa loob ng cellphone, pwede rin na damaged na ang SIM mo kaya hindi na ito gumagana. Maari din na ang cellphone mo na mismo ang may problema dahil sabi mo nga ay naghahang ito. Alam kong nasa Aklan ka at medyo mahirap maghanap pero, kung kaya mo ay dalhin mo na sa authorized service center ang cellphone mo o kaya ay sa iyong trusted technician.

TANONG: Hello Good AM, NOKIA 3530 po ang unit ko, tanong ko lang po nawala ang signal ko sa TNT at GLOBE pero sa SUN Cellular malakas ang signal ang sabi po ng manggawa...

SAGOT: Naputol ang text mo eh, so huwag na nating isipin kung ano pa sinabi nung gumagawa. Assuming na lang na open line ang cell mo dahil more than one network provider ang siyang kayang i-detect ng iyong cellphone, maari na nablock ang IMEI mo sa network, pero dahil malabo iyon, mas malaking tsansa na nagkatama lang ang pagka-open line ng cell mo. Meaning dapat siguro ay ipa-openline mo na lang uli ang cell mo. Mahirap malaman kung paano nangyari iyan, pero nangyari, maaring sa antenna, sa software, sa firmware, pero ayan na eh diba? Paayos mo na lang sa iyong manggawa...alam naman niya iyong problema eh.

TANONG: Good AM. Ask ko lang po sana, me unit po ako ng 3210, chinarge ko po battery tapos binuksan ko kaninang AM ok naman po. After one hour nawala po display sa LCD, kala ko po maluwag lang diniinan ko pa po LCD, wala po talaga lumabas, ano po kaya problema nito? Thanks - Phet

SAGOT: Marami po ang maaring problema ng iyong cellphone. Isa na diyan ay sira na ang iyong LCD. Parang bombilya din kasi iyan na kapagdaka ay lumalabo hanggang masira na siya. Pero dapat intindihin na talagang ganiyan ang mga cellphone, makatapos ang warranty ay dahan dahan nang masisira ang mga parts niyan hanggang hindi na siya gumana. Lahat ng electronic devices ay ganyan. Maliban na lang kung alam mo ang ginagawa mo ay hindi po maganda na diinan ang LCD kung ito ay magluko, isang maling kibit diyan eh basag iyan. Patingnan niyo na lang po sa inyong trusted technician ang inyong cellphone. Lumang model na rin po kasi iyan eh.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com sasagutin namin sa mga susunod na column. Basahin sa http://walastech.blogspot.com ang mga dating issue.

-070-051122-

WALASTECH 069 - 051119 - BAGONG IPOD VIDEO

WALASTECH 069 - 051119 - BAGONG IPOD VIDEO Ni Relly Carpio

Sa TECHNEWS: Nirelease ng Apple ang bago nilang Video iPod kamakailan. Ito ay ang Fifth Generation na iPod at ito ay di lamang nagpapatugtog ng MP3, pero ito ay pwedeng magpakita ng video, oo video, malinaw na video sa screen nito na 2.5 inches ang laki.

Pwede kang manood ng video dito mula MTV hanggang sa mga sine. Dapat isipin na ang iPod na ito ay halos kasing laki lang ng isang maliit na pakete ng Skyflakes. Pero kaya nitong magpalabas ng aabot sa 150 hours ng video (oo lampas anim na araw na diretsong panonood). Kala mo hightech ka na dahil mayroon kang 15 inch TV? Think again.

Sinasabing ito na ang siyang magiging pinakapopular na portable video player. Kasi kung titingnan mo ang mga portable video player sa market ay ang lalaki ng mga ito, talagang hindi maaring pantayan ang liit ng Video iPod. At sa data capacity niya ay hindi rin ito naman it maaring maliitin. May dalawang model na available sa dalawang kulay (black and white). Ang 30 GigaByte model (kasya 15,000 songs, o 25,000 photos, o 150 hours na video) na mabibili sa PhP20,990, oo tama basa ninyo, hindi nila pinalitan ang presyo mula sa fourth generation pero may video na. May 60 GB din na PhP26,990 lang.

Kasabay ng mga ito ay ni-launch din nila ang kanilang mga mas pinagandang mga PowerBook laptops (12-inch, 15- inch, at 17-inch) at ang mga bagong iMac G5 home desktop computer na may bagong multimedia manager na tinatawag nilang Front Row. Muli na namang pinalawig ng Apple ang boundary ng technology sa kanilang imbensiyon na ito.

-0-0-0-0-0-0-0-

TANONG: Bakit hindi matanggal "you have active divert" sa screen ng cell ko pag may tinatawagan ako kahit na in-off ko na yung pagkadivert ko di pa rin matanggal papaano po ba ito matatanggal?

SAGOT: Sa network po kasi nakadepend ang divert nyo. Baka dapat ay iyong icheck muna sa network kung naka activate pa rin ang inyong divert. Pwede rin na sinasabi lang ng cellphone mo na naka active pa iyan pero sa network ay disabled na siya. Hindi naman malaking issue kung nakadivert ang cell mo dahil maari mo namang i assign kung anong number ang pupuntahan ng divert diba? Eh di gawin mong blank para walang problema.

TANONG: Good day po. Ask ko how to activate and to set my Motorola C651. Thanks in advance!

SAGOT: Actually out of the box ay pwede na iyang cellphone mo, lagay mo lang ang iyong SIM ay oks ka na. siyempre, sa kahit na anong cellphone, maganda na basahin mo ang iyong manual habang iyong china-charge ang iyong cellphone for the first time. Dito mo kasi malalamana ang iba pang mga functions ng iyong cell. Ngayon, kung ang ibig sabihin mo naman ay ang activation ng GPRS at MMS sa iyong cell, maganda na dalhin mo na lang sa customer service center ng iyong network provider o ng manufacturer (Motorola) at sa kanila ipa set-up ito. Siguraduhin na may minimum load ang iyong cell phone bago magpasetup.

TANONG: Good AM po, 3350 ang unit ko, ano ang benefit na dulot pag inactivate ang GPRS/MMS po? Ty.

SAGOT: Okay, sa gamit ng GPRS ay maari kang magcheck ng WAP internet sa iyong cellphone, at sa mga wapsite na ito ay maari kang magdownload ng content tulad ng tones, games, pictures, etc. At sa gamit ng MMS ay maari mo itong mapadala sa mmga kaibigan mo na may MMS din na nakaactivate. Iyon nga lang medyo may gastos na kapalit. Pero sayang naman ang cellphone mo kung hindi mo imamaximize ang functions niya, dapat nag cellphone ka na lang na walang GPRS at MMS.

TANONG: Paano po bang magtrace ng number. Ang iba gamit lang ang cellphone.

SAGOT: Medyo malabo tanong mo eh, paanong i trace? kasi kung hindi dineactivate ng caller ang give call ID function ay hindi mo makikita ang number ng tumatawag. Pero ang default ay naka-on ito, kaya pag may tumawag ay alam mo na agad ang number. Kung i-trace as in hanapin ang caller ay ang location services ng mga network providers ang siyang iyong sinasabi. Ito ay ang paggamit ng mga cellsite para ma pinpoint kung nasaang area ang isang SIM na nakaload sa bukas na cellphone. Pero ito ay maari lamang kung ang hinahanap ay papayag na ipaalam sa nagtatanong kung nasaan siya. Constant monitoring ito ng network at ito ay madalas gamit ng mga magulang na binibigyan ang kanilang mga anak ng cellphone para palagi nilang alam kung nasaan ito. Pero may alam din ako na nilagyan nila ng locator service ang cellphone ng kanilang mga magulang habang ang mga ito ay natutulog, kaya alam nila kung saan gumimik para hindi nila makasalubong ang kanilang mga magulang habang akay-akay ng mga boyfriend!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-069-051119-