walastech 072- 051126 ang suggestion ni KJ

walastech 072- 051126
Ang suggestion ni KJ
Ni Relly Carpio

"Suggestion lang po, bakit di po kayo magdiscuss tungkol sa internet,
mga latest online community website. Ano meron sa friendster bakit
click ito sa pinoy! Thanks This is KJ from Dasma, Cav."

Okay, fine, whatever. Joke! Alam niyo kasi itong si KJ ang hula ko eh
wired itong bata na ito eh. Wired meaning nakaconnect ito sa internet,
isa sa halos 8 milyong Pilipinong marunong maginternet at gumamit ng
computer. Maaring isa rin siya sa 2 milyong Pilipinong may internet
connection sa bahay.

Ngayon, dahil sa wired siya, sa tagalog: naka-alambre (kewl diba?),
nakita na ni KJ ang gusto kong maranasan ng lahat ng ating mga
kababayan. Ang magkaroon ng access sa internet para kanila ding
magamit ang lahat ng karunungan na maaring makuha mula sa internet.
Isa lamang aspeto ng internet ang sinasabi ni KJ na mga internet
groups.

Pero dahil iyon ang hiningi mo KJ, pagbibigyan ka ng Team WALASTECH.
Ang sinasabi ni KJ na "Friendster" ay isang napakasikat na online
community na makikita sa internet address na www.friendster.com at
isang free site. Free site kasi walang bayad para pasukin ang website
na ito at gamitin ang kanyang mga features o serbisyo. Ang friendster
ay sumikat dahil dumami ang mga gumamit nito na pinoy. At ng kumalat
sa Philippine Internet community na lahat halos ay kumukuha ng
friendster, naging uso na mayroon kang friendster account. Pero
kapagdaka, ang pagiging uso ay naging essential o kailangan. Dahil sa
dami ng mga miyembro na pinoy, naging napakadali niyang paraan para
hanapin ang mga nawawalang mga kaibigan, kaklase dati sa iskwela, at
para makapagpalit ng mga picture ng mga kamaganak na nasa ibang bansa.

Mula dito ay may ibang mga online community websites ang siya ring
nagpumilit na makuha ang attensiyon ng mga Pinoy Netizens (Netizen =
citizen ng internet) pero sabi nga nila, iba na ang nakauna. Ngayon ay
di lamang Friendster ang siyang nakikinabang sa napakanatural na
gawain ng pinoy na magbarkada kahit nasaan sila. Pati na rin ang
Yahoo!, ang isa sa pinakamalaking free mail at search engine companies
sa mundo ay nakakuha ng malaking Pinoy netizen share. Marami sa atin
ay may mga Yahoo! Accounts at tahasang ginagamit ang Yahoo! Groups na
internet mailing list naman ng Yahoo!. Kasama na siyempre ang walang
kamatayang Yahoo! Messenger na maaring pasukin gamit ang cellphone na
mas kinalolokohan ng Pinoy.

Sa pamamagitan ng internet at ng mga online communities na ito ay may
nabuo na isang bagong klaseng barangay ng mga Pilipino. Siguro ang
pinakamagandang tawag dito ay ang Netizen Barangay na ikaw KJ, ay
isang miyembro. Nawa'y makuha mo na turuan ang mga ibang mga kababayan
natin tungkol sa Internet para lumawig ang ating online Barangay.

-0-0-0-0-0-0-0-

TANONG: Mr. Carpio nais ko po sana itanong paano po ba malalaman na
ang nabili na cell phone ay reconditioned. Ano po ba ang sign nito?
Para maging maingat po ako. Salamat.

SAGOT: Magaling din kasi ang mga nagre-recondition ng mga cellphone
eh. Maliban na lang kung sabihin nila sa pagbenta na ito ay
refurbished ay halos hindi mo malalaman na ito nga ay hindi na
brandnew. Siguro ang pinakamadali ay tingnan mo ang kahon. Kung medyo
hindi ganoong kapulido ang pagkakagawa, pati iyung pagprint ng manual
ay maaring ito ay refurbished na cellphone. Madalas kasi ay ang
pinagtutuunan nila ng pansin ay ang cellphone at hindi ang kahon. Pero
ang pinakamadaling paraan para makasiguro ay huwag na lamang bumili sa
mga nagbebenta na medyo kaduda-duda. Bumili sa mga stall sa mga mall o
sa mga authorized dealers mismo. Kung talagang gusto mong makasiguro
ay sa shop ng manufacturer ka mismo bumili. Good luck.

TANONG: Congrats!!! You win 500 load from SMART Type 0921******* and
send to 808 so you can claim you 500 load now thank you! SMART ZED
1515# DTI# 354256. Fake po ba ito? Salamat.

SAGOT: Hindi ko na po pinakita iyung number na pinadala ninyo, pero
peke po ito. Sa mga nag pa-pasaload kita mo na agad kung ano gustong
mangyari ng asoge na nagpadala sa inyo. Sa pagkakaalam ko ay medyo
palyado ang format ng text na ito, pero kung tama ang pinadala niya ay
sa pagreply mo para sa premyo mo ay ang load mo ay malilipat sa
kaniya. Ang sabi ng SMART ay "Kung wala kang sinalihan, paano ka
mananalo." Mag-ingat sa mga text na ganito at sa mga tao na
nagpapadala ng mga text na ganito. Tandaan na ayon sa batas ay kung
ikaw ay manalo sa isang general contest ay dapat na padalhan ka ng
telegrama na nagsasaad na nanalo ka; at sa isang official satellite
office ng kumpanya na nagpa-contest ka lang maaring abutan ng iyong
premyo. Kung ang mga ito ay hindi nasunod, malaki ang pagkakataon na
manloloko ang mga iyan. Ipapulis nyo!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones,
Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa
http://walastech.blogspot.com ang mga dating issue.

-072- 051126-

walastech 071 - 051124 BATTERY O BUHAY?

WALASTECH 071 - 051124 BATTERY O BUHAY? Ni Relly Carpio

Hindi magandang gawain ang magtipid sa pamamagitan ng pagbili ng mga mumurahing mga kagamitan. Dapat isipin ng isang mamimili ang quality o kalidad ng isang produkto bago niya ito bilhin. Isang magandang halimbawa ang napagusapan namin ng bayaw ko kaninang almusal.

Ang sabi niya ay may nakita siya sa bangketa na nagbebenta ng mga battery na gawa sa china. 100 para sa 50 pesos. Ang tanong ko sa kanya: "Eh kuya, gaanong katagal naman ang charge ng bawat batterya?"

Sabi niya na siyempre sandali lamang, pero kahit na, nakamura ka naman diba? Napailing na lamang ako. Naaalala ko kasi noon na napilitan akong gumamit ng ganoong batterya. Ang nangyari? Pumutok iyung batterya sa loob nung flashlight na gamit ko. Ang laman ng mga battery ay mga chemical na nakakalason, kaya napilitan tuloy ako na itapon na lamang sa maayos na paraan ang flashlight...hindi ko na siya malinis dahil nilusaw na ng mga asido iyung mga plastic sa loob. Dahil nagtipid ako sa battery ay lalo pang napalaki ang gastos ko.

Mula noon ay hindi na ako gumamit ng mga ganoong batterya. Sana sa aking kuwento ay may matutunan din kayo, at nawa'y hindi mangyari sa inyo ang sinapit ko. Ang pagtitipid ay dapat ding ilagay sa lugar, at huwag na huwag sa mga importanteng elektronikong kagamitan at gadgets.

-0-0-0-0-0-0-0-

TANONG: Hello po! Tanong ko lang kung makakasira ba ng cellphone yung charge ng charge kasi ako po isang araw china-charge ko po kinabukasan lowbat na at tanong ko lang kung may alam kayong bilihan ng headset na para sa model na ito: MOTOROLA C651.

SAGOT: Hindi po problema kung palaging china-charge ang battery ng cellphone. Nasa gamit po kasi ng cellphone iyan. Kung palaging gamit ang isang cellphone ay natural lang na maubos agad ang charge nito, lalo na kung gagamitin sa pag-uusap. Ang battery time kasi ng isang cellphone ay nasa mga 255 hours kapag bago. Ito ay nababawasan ng isang minuto kada ilaw o tunog o vibrate ng cellphone at nababawasan ng isang oras kada minuto ng tawag, hanggang sa maubos ang oras na ito. Ito ang tinatawag na standby time ng isang cellphone. Kung iyong gamit ang iyong cell sa games o kaya sa unlimited calls, umasa ka na sa dalawang oras lang na pag-uusap sa telepono ay low batt ka na.

Habang tumatagal ay lumiliit ang standby time ng battery ng cellphone hanggang sa sobrang kaunti na lamang ng standby time nito na halos walang silbi na ang battery. Ang tawag dito ay battery deterioration. Nagsisimula ito nasa anim na buwan makatapos unang gamitin ang isang battery.

Ang headset na hanap mo ay matatagpuan sa mga MOTOROLA shops sa mga mall, tulad nung nasa digital Exchange sa Glorietta 3 sa Makati. Kung wala sila ay maari mo itong ipaorder sa kanila.

TANONG: Good PM po! Masisira po ba ang cellphone pag chinarge ng magdamag? Sasabog po ba ang battery?

SAGOT: Bawat makabagong battery na rechargable at ang mga charger mismo ng batteries ay may capacitor at circuit break kung sakaling tumaas na masyado ang voltage ng charge o kaya ay mag-overheat ang battery. Ito ay kung ang inyong charger ay iyung original o kaya ay iyung maasahan ang brand. Kung hindi, baka magkasunog kayo ng di oras.

Dapat at pwedeng iwanan ang charger kahit na ilang araw, dahil mayroong controller chip naman ang mga chargers na siyang naghahandle ng trickle charge o iyung charge na maliit na siyang nagme-maintain ng full charge sa isang battery. Kapag ito ay may sira o nasira, diyan nagsisimula ang mga short circuit na maaring maglead sa pagsabog ng battery o ng pagkalusaw nito.

Para makasigurado ay magandang ang bilhin lamang na batteries at chargers ay mga originals o kaya ay gawa ng mga known manufacturers na mapapagkatiwalaan. Paano niyo malalaman na mapapagkatiwalaan? May warranty ang mga ito at mabibili sa mga stalls ang shops ng authorized dealers and distributors.

Magandang naitanong ito ng ating reader dahil hindi malimit na ang isang defective battery ang nagiging rason para magkaroon ng sunog o disgrasya sa isang pamamahay. Ano ngayon sabi ninyo basta nakatipid? Ano mas mahal? Original battery o ang magpagawa ng nasunog na bahay? O mas masaklap...ang nakitil na buhay?

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-071 - 051124-

WALASTECH 070 - 051122 MGA MAGITING NA TECHGURO

WALASTECH 070 - 051122 MGA MAGITING NA TECHGURO Ni Relly Carpio

Congratulations sa mga nagawaran ng Philippine Innovative Teachers Leadership Awards ng Microsoft, Partners in Learning, at ng DepEd. Ito ay sina: Christie Anne Dagamac mula sa Ipil NHS Ormoc City, Region 8; Ma. Cecila T. Correa ng Manila Science HS; Cecilia M. Estoque mula sa Agusan NHS, Butuan, Caraga; Francisco S. Garcia ng Manila Science HS; at si Evelyn R. Manahan mula sa City East HS, Sta. Filomena, Iligan City, Region 10. Mabuhay kayo mga magiting na guro!

Sila ay nakalap mula sa 138 na teachers na sumali mula sa lahat ng sulok ng bansa. Mga teachers na gumagamit ng Information and Communications Technology sa pagtuturo. Ang winners ay pinili mula sa top 25 na nag-participate sa isang four-day teambuilding and immersion workshop sa Antipolo City at Marikina City.

Ang 25 na ito ay nakatanggap din ng scholarship grant para sa online Masteral Program on Education Technology sa Philippine Normal University at sa Cebu Normal University at ng Learn.Ph Foundation.

Ang lima ay pupunta sa Seoul, South Korea para ilaban ang kanilang mga award winning na paraan ng pagtuturo sa ibang mga guro sa Asya na siya ring ginawaran ng Microsoft sa Innovative Teachers Regional Conference. Ito ang ikalawang beses na ginawa ito ng Microsoft dito sa Pilipinas. Ang naunang ITLA batch ay gagraduweyt na sa Summer 2006.

-0-0-0-0-0-0-0-

TANONG: Pinutulan daw ako ng linya ng SMART at GLOBE posible po ba yun?

SAGOT: Oo, kung hindi ka nagbabayad ng bills mo kung ikaw ay nakapost-paid o kaya ay lumampas ka ng dalawang buwan na hindi nagloload sa iyong zero-balance na prepaid SIM, o kaya ay may nagcomplain sa iyo sa NTC at ikaw ay pinutulan ng service dahil iyong ginamit sa illegal activity ang iyong cell at ito ay napatunayan.

TANONG: Good Evening, isa po ako sa tagasubaybay ng column niyo sa PM dito sa Aklan. Tanong ko lang po kung ano sira ng cellphone ko, may lumalabas po kasing contact service pag binuksan ko at naka hang lang siya?

SAGOT: Kaya lumalabas ang contact service dahil maluwag na ang pagkakadikit ng SIM mo sa contacts nito sa loob ng cellphone, pwede rin na damaged na ang SIM mo kaya hindi na ito gumagana. Maari din na ang cellphone mo na mismo ang may problema dahil sabi mo nga ay naghahang ito. Alam kong nasa Aklan ka at medyo mahirap maghanap pero, kung kaya mo ay dalhin mo na sa authorized service center ang cellphone mo o kaya ay sa iyong trusted technician.

TANONG: Hello Good AM, NOKIA 3530 po ang unit ko, tanong ko lang po nawala ang signal ko sa TNT at GLOBE pero sa SUN Cellular malakas ang signal ang sabi po ng manggawa...

SAGOT: Naputol ang text mo eh, so huwag na nating isipin kung ano pa sinabi nung gumagawa. Assuming na lang na open line ang cell mo dahil more than one network provider ang siyang kayang i-detect ng iyong cellphone, maari na nablock ang IMEI mo sa network, pero dahil malabo iyon, mas malaking tsansa na nagkatama lang ang pagka-open line ng cell mo. Meaning dapat siguro ay ipa-openline mo na lang uli ang cell mo. Mahirap malaman kung paano nangyari iyan, pero nangyari, maaring sa antenna, sa software, sa firmware, pero ayan na eh diba? Paayos mo na lang sa iyong manggawa...alam naman niya iyong problema eh.

TANONG: Good AM. Ask ko lang po sana, me unit po ako ng 3210, chinarge ko po battery tapos binuksan ko kaninang AM ok naman po. After one hour nawala po display sa LCD, kala ko po maluwag lang diniinan ko pa po LCD, wala po talaga lumabas, ano po kaya problema nito? Thanks - Phet

SAGOT: Marami po ang maaring problema ng iyong cellphone. Isa na diyan ay sira na ang iyong LCD. Parang bombilya din kasi iyan na kapagdaka ay lumalabo hanggang masira na siya. Pero dapat intindihin na talagang ganiyan ang mga cellphone, makatapos ang warranty ay dahan dahan nang masisira ang mga parts niyan hanggang hindi na siya gumana. Lahat ng electronic devices ay ganyan. Maliban na lang kung alam mo ang ginagawa mo ay hindi po maganda na diinan ang LCD kung ito ay magluko, isang maling kibit diyan eh basag iyan. Patingnan niyo na lang po sa inyong trusted technician ang inyong cellphone. Lumang model na rin po kasi iyan eh.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com sasagutin namin sa mga susunod na column. Basahin sa http://walastech.blogspot.com ang mga dating issue.

-070-051122-

WALASTECH 069 - 051119 - BAGONG IPOD VIDEO

WALASTECH 069 - 051119 - BAGONG IPOD VIDEO Ni Relly Carpio

Sa TECHNEWS: Nirelease ng Apple ang bago nilang Video iPod kamakailan. Ito ay ang Fifth Generation na iPod at ito ay di lamang nagpapatugtog ng MP3, pero ito ay pwedeng magpakita ng video, oo video, malinaw na video sa screen nito na 2.5 inches ang laki.

Pwede kang manood ng video dito mula MTV hanggang sa mga sine. Dapat isipin na ang iPod na ito ay halos kasing laki lang ng isang maliit na pakete ng Skyflakes. Pero kaya nitong magpalabas ng aabot sa 150 hours ng video (oo lampas anim na araw na diretsong panonood). Kala mo hightech ka na dahil mayroon kang 15 inch TV? Think again.

Sinasabing ito na ang siyang magiging pinakapopular na portable video player. Kasi kung titingnan mo ang mga portable video player sa market ay ang lalaki ng mga ito, talagang hindi maaring pantayan ang liit ng Video iPod. At sa data capacity niya ay hindi rin ito naman it maaring maliitin. May dalawang model na available sa dalawang kulay (black and white). Ang 30 GigaByte model (kasya 15,000 songs, o 25,000 photos, o 150 hours na video) na mabibili sa PhP20,990, oo tama basa ninyo, hindi nila pinalitan ang presyo mula sa fourth generation pero may video na. May 60 GB din na PhP26,990 lang.

Kasabay ng mga ito ay ni-launch din nila ang kanilang mga mas pinagandang mga PowerBook laptops (12-inch, 15- inch, at 17-inch) at ang mga bagong iMac G5 home desktop computer na may bagong multimedia manager na tinatawag nilang Front Row. Muli na namang pinalawig ng Apple ang boundary ng technology sa kanilang imbensiyon na ito.

-0-0-0-0-0-0-0-

TANONG: Bakit hindi matanggal "you have active divert" sa screen ng cell ko pag may tinatawagan ako kahit na in-off ko na yung pagkadivert ko di pa rin matanggal papaano po ba ito matatanggal?

SAGOT: Sa network po kasi nakadepend ang divert nyo. Baka dapat ay iyong icheck muna sa network kung naka activate pa rin ang inyong divert. Pwede rin na sinasabi lang ng cellphone mo na naka active pa iyan pero sa network ay disabled na siya. Hindi naman malaking issue kung nakadivert ang cell mo dahil maari mo namang i assign kung anong number ang pupuntahan ng divert diba? Eh di gawin mong blank para walang problema.

TANONG: Good day po. Ask ko how to activate and to set my Motorola C651. Thanks in advance!

SAGOT: Actually out of the box ay pwede na iyang cellphone mo, lagay mo lang ang iyong SIM ay oks ka na. siyempre, sa kahit na anong cellphone, maganda na basahin mo ang iyong manual habang iyong china-charge ang iyong cellphone for the first time. Dito mo kasi malalamana ang iba pang mga functions ng iyong cell. Ngayon, kung ang ibig sabihin mo naman ay ang activation ng GPRS at MMS sa iyong cell, maganda na dalhin mo na lang sa customer service center ng iyong network provider o ng manufacturer (Motorola) at sa kanila ipa set-up ito. Siguraduhin na may minimum load ang iyong cell phone bago magpasetup.

TANONG: Good AM po, 3350 ang unit ko, ano ang benefit na dulot pag inactivate ang GPRS/MMS po? Ty.

SAGOT: Okay, sa gamit ng GPRS ay maari kang magcheck ng WAP internet sa iyong cellphone, at sa mga wapsite na ito ay maari kang magdownload ng content tulad ng tones, games, pictures, etc. At sa gamit ng MMS ay maari mo itong mapadala sa mmga kaibigan mo na may MMS din na nakaactivate. Iyon nga lang medyo may gastos na kapalit. Pero sayang naman ang cellphone mo kung hindi mo imamaximize ang functions niya, dapat nag cellphone ka na lang na walang GPRS at MMS.

TANONG: Paano po bang magtrace ng number. Ang iba gamit lang ang cellphone.

SAGOT: Medyo malabo tanong mo eh, paanong i trace? kasi kung hindi dineactivate ng caller ang give call ID function ay hindi mo makikita ang number ng tumatawag. Pero ang default ay naka-on ito, kaya pag may tumawag ay alam mo na agad ang number. Kung i-trace as in hanapin ang caller ay ang location services ng mga network providers ang siyang iyong sinasabi. Ito ay ang paggamit ng mga cellsite para ma pinpoint kung nasaang area ang isang SIM na nakaload sa bukas na cellphone. Pero ito ay maari lamang kung ang hinahanap ay papayag na ipaalam sa nagtatanong kung nasaan siya. Constant monitoring ito ng network at ito ay madalas gamit ng mga magulang na binibigyan ang kanilang mga anak ng cellphone para palagi nilang alam kung nasaan ito. Pero may alam din ako na nilagyan nila ng locator service ang cellphone ng kanilang mga magulang habang ang mga ito ay natutulog, kaya alam nila kung saan gumimik para hindi nila makasalubong ang kanilang mga magulang habang akay-akay ng mga boyfriend!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-069-051119-

WALASTECH 068 -051117 - CHIKKA MAY SUN NA!

WALASTECH 068 -051117 CHIKKA MAY SUN NA! Ni Relly Carpio

Sa TECHNEWS: Ipinaalam kamakailan ng CHIKKA, ang premyadong computer to cellphone mobile text service dito sa Pilipinas na sila ay konektado na rin sa SUN CELLULAR. Kinukumpleto nito ang kanilang coverage ng lahat ng local network providers kasama ang GLOBE at SMART. Ngayon ay kahit na anong cellphone ay maari nang matext ng libre sa pamamagitan ng CHIKKA at ng internet.

Inanunsiyo rin nila ang kanilang pagprovide sa India ng kanilang services. Umaabot ng 50 milyong taga-India ang gagamit ng proudly Philippine Made na free SMS technology ng CHIKKA. Congratulations sa CHIKKA at salamat sa pagbigay ng libreng SMS services sa mga internet users.

-0-0-0-0-0-0-0-

Sa mga hindi pa nakakaalam tungkol sa CHIKKA, sila ay isang kumpanya na may naimbento na teknolohiya na maaring gamitin para makapagpadala ng libreng text sa gamit ng internet. Basta ang kailangan ay iyung idownload ang program nila at gamitin ito para makaconnect sa kanilang SMS network sa internet. Mula doon ay pwede ka nang magpadala sa kahit na anong network ng libre. Ang pagsagot ng iyong tinext ang siyang may bayad.

-0-0-0-0-0-0-0-

TANONG: Ano po ang pwedeng pasukin na work for college undergraduate na kagaya ko? Pwede po ba ako magapply sa call center? Saan po ba pwede mag-apply? Thanks and more power. D.L.A.

SAGOT: Pwede kang mag-janitor o mag basurero din. Iyan ang nakakatawa sa bansa natin eh, may mga kumpanya na janitor lang ang kailangan eh dapat may 2 years college ka! Samantalang sa mga ibang bansa ay kahit high school lang pwede na. Anyway, hindi lang naman call center ang naghahanap ng college undergrads eh. Pero kung tapos ka ng college mas marami kang mapapag-apply-yan na mga trabaho.

TANONG: Good PM, ask me lang kung pwede mablock ang cell ko, ninakaw kasi 3 months ago na. Kaya lang wala na yung IMEI niya naitapon ko na kasi. Pwede ba kahit yung cell number kasi minsan nag text sa akin gusto makipag text mate. Salamat EDNA

SAGOT: Sorry, pero hindi mo maaring maipablock ang cellphone kung wala sa iyo ang IMEI number ng cellphone. Ang phone number ay magagamit para mapa-block ang SIM na alam naman nating napakadaling palitan diba? Pero kung walang IMEI at walang recite of purchase, hindi mo maaring maipablock ang lost/stolen cellphone.

TANONG: Hi! Sir good PM bakit yung cellphone ko pag magtext ako report ang magreply sa akin?

SAGOT: Naka-on po sa settings ng message setup ang message status report. I-off po ito para matigil kasi may charge po ang mga report na iyan kung nasaan na ang SMS mo. Ginagamit iyan para malaman mo kung natanggap na ng pinadalhan mo ang iyong text.

TANONG: Good PM po! Bakit po di na ako makapasok sa SMART unlimited gayong dati mabilis lang naman, mga 2 weeks na ako nagpaparegistered pero laging message sending failed, bakit po kaya? Salamat po! Yhen

SAGOT: Kasi po andami po na pinipilit na makaaccess sa unlimited service ng SMART. Baka naman talagang natatapatan ka lang ng heavy traffic, kaya hindi ka makalusot. Subukan mo na sa early morning o late night na pasukin iyung unlimited service para walang masyadong kalaban.

TANONG: Good PM pwede ba malaman ang contact number ng NTC thanks from Tondo Mla.

SAGOT: Heto po: National Telecommunications Commission sa NTC Bldg., BIR Road, East Triangle, Diliman, Quezon City. Maari niyo po silang tawagan sa 9267722 o i-email sa ntc@ntc.gov.ph.

TANONG: Good AM po, gusto ko lang magtanong tungkol sa cell ko ang tagal mag full charge. Four hours at 30 minutes ang pag charge sana bigyan niyo po ako ng good advice. Joelito Cebu

SAGOT: Ako tatlong oras mag charge, bago cell ko. Hindi lahat ng cellphone battery ay pare-pareho, may mga mas maliit na mabilis i charge at may mas malaki na matagal. May tinatawag na fast charger para mas sandali ang charging time ng battery. Pero para malaman ang tamang tagal ng pag charge ng iyong cell, magandang tingnan sa manual o itanong sa manufacturer mismo kung gaanong katagal ang tama. Kung may problema, paayos mo na o bumili na ng bagong battery o charger, alin man sa dalawa ang sira.

-0-0-0-0-0-0-0-

Congatulations kay Mr. Rajendra Pangrekar, ang bagong appointed na Country Manager ng Ericsson Philippines. Naway sa inyong paggabay ay maging mas maaga ang pagdeploy ng 3G cellphone networks sa Pilipinas. Welcome to the Philippines at mabuhay po kayo!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-068 -051117-

WALASTECH 067-051115 ANG KINABUKASAN NG TELEPONO

WALASTECH 067-051115 ANG KINABUKASAN NG TELEPONO Ni Relly Carpio

Naibenta kamakailan ng CISCO ang kanilang ika-anim na milyong IP phone. Ang Cisco Systems Inc. ang pinakamalaking kumpanya sa buong mundo na nagaayos ng networking sa internet. Ang IP phone ang siyang ginagamit para mag Voice Over IP na tawag. Ito ang teknolohiya na gamit ng mga callcenters at ng mga multinational companies para makatawag overseas ng halos libre sa pamamagitan ng pagpadaan ng voice palusot sa internet.

Ano ngayon diba? Anim na milyon lang pala eh! Eh diba 40 milyon na ang mga cellphone sa Pilipinas? Cellphone iyon, alam niyo ba na 2 milyon lang ang landline sa Pilipinas?

Ang ibig sabihin nitong ika anim na milyong IP phone ng CISCO ay isa lang: ang worldwide demand para sa IP Communications ay tumataas. At hangga't tumataas ang demand sa isang bagay sa buong mundo ay tuloy ang development niyan. Anumang teknolohiya na madevelop dahil sa malaking demand kapagdaka ay magiging commercially available para sa mga consumer. Sino iyon? Tayo.

Imagine niyo na lang ito: balang araw, gamit ang VOIP, ang tawag kahit saan sa mundo ay magiging halos libre. Galing diba?

Ang nakabili ng ika anim na milyung IP telephone ng CISCO ay ang Westpac bank ng Australya. Ang ibang mga major global customers ng CISCO ay ang Bank of America, Merrill Lynch, Boeing, at Ford Motor Company - dito sa atin naman ay ABS-CBN, Insular Savings Bank, Davao Light and Power Corporation, Pag-Ibig Home Development Mutual Fund, at IBM Philippines.

Sabi ni Mr. Luichi Robles, Country Manager ng Cisco Systems Philippines "The pace of IP Communications adoption is relentless. It took Cisco three years to sell its first million IP phones worldwide but only four months to sell the sixth-million…" Kitang kita na ang future ng communications ay ang IP Telephony.

Palapit na ang araw na ang milyon-milyon na bagong bayani ng ating bayan ay malaya nang matatawagan ng kanilang mga minamahal kahit na kailan, at kahit na nasaan man sila ng halos libre. Congratulations sa CISCO at more power.

-0-0-0-0-0-0-0-

TANONG: Paano po ba magdownload ng games sa aking cellphone kasi po nabura ng aking anak ang mga games sa aking cellphone?

SAGOT: Lagii! Sayang. Okay, dalawa ang choice mo, ang una ay kung may GPRS ang iyong phone ay pumunta ka sa game section ng internet WAP site ng iyong network provider at magdownload ka na lang ng bagong games. Kung wala, sa technician ka na lang makakakuha ng mga kopya ng games mo sa pamamagitan ng data cable.

May mga nagbebenta ng games sa mga greymarket stalls at sa mga tiangge. Ingat lang sa pagpili ng technician at bantayan ng mabuti ang cellphone. Tandaan! Hindi nila kailangang buksan ang housing ng cellphone para makapaginstall ng games. Data cable lang iyan na ikakabit sa saksakan sa ilalim o sa isang panel sa ilalim ng luklukan ng battery. Mura lang iyan, may mga binebenta na 3 games for 100 pesos.

TANONG: Paano makakapasok sa callcenter kahit na highschool lang ang natapos pero willing matuto? Salamat po.

SAGOT: Maghanap ng may opening at mag-apply. Hehehe. May isa akong kaibigan na nagsabi sa akin na medyo tama iyung sinabi sa akin nung isang reader. Nagiging medyo masikip na daw ang mundo ng call center. Hindi dahil sa kaunti na lang ang openings, bagkus lumalaki ito at baka daw umabot hanggang 200,000 openings balang araw! Ngunit ang dami na daw na nag-aaply dahil marami na raw taong nakakaalam tungkol sa mayaman na mundo ng contact centers (Ehem-ehem, thank you! Thank you! Bow.).

Kaya siguro kailangang linawin na kahit sinasabi ko na ang kailangan lang ay may lakas ng loob, willing matuto, at masipag; hindi mo maikakaila na hindi pwedeng kahit sinong Herodes na lang ang kukunin nila. Kailangang talunin mo pa rin lahat ng ibang nag-aaply diba?

Pero ipaglalaban ko na kung wala iyung tatlo kong binangit ay ni hindi man lang siguro nakatayo si Herodes mula sa salamyaan! Good luck.

TANONG: Good am! Pwede ba palagyan ng caller ringtune yung NOKIA 5110? Thanks po! Albert

SAGOT: Itong si Albert, love ko ito eh, love kong sakalin. Pasaway ito eh, paulit-ulit ng tanong, parang hindi marunong magbasa. Ito ha, para malinaw: ang "caller ringtune" ay pwede sa kahit na anong cellphone. Ang "ringtone" ang siyang namimili ng cellphone. Gets? Kasi ang caller ringtune ay nakasalalay sa network provider dahil sila ang nagse-setup nito sa account/number mo sa kanila, hindi sa cellphone mo. Pagpili at bayad lang ang may kinalaman mo.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-067-051115-

WALASTECH 066-051112 BAGONG PHONES NG ASUS

WALASTECH 066-051112 BAGONG PHONES NG ASUS Ni Relly Carpio

Sa mga nagtatanong tungkol sa mura pero maraming function na cellphones, naglabas kamakailan ang ASUS ng tatlong bagong cellphones. Ang ASUS ay isa sa pinakamalaking computer companies sa mundo kaya alam nila ginagawa nila pagdating sa mga gadget at tech. Sinama ko na rin ang presyo sa inyong mga nagtanong last time kung bakit hindi ko sinama iyung presyo ng mga bagong cellphones.

Ang tatlong ito ay ang: ASUS V66 na ang focus ay bilang isang phone na pwede mong gamitin para makagawa ng sariling mga MTV. Oo, MTV as in music videos dahil may program siya na pwedeng pagsamahin ang pictures at music. Obviously may MP3 player, camera at FM stereo ang phone na ito. SRP: PhP9,900

Ang ASUS M303 na isang mp3 player phone with 1.3 mega pixel camera with flash na clamshell ang design. Pero lahat ng controls ng MP3 player ay nasa cover kaya di na kailangang buksan para magpatugtog. May third speaker din siya. Bilang special offer may libreng miniSD card (worth PhP1,300) ang mga unang units nito. SRP: PhP14,800 napakamura para sa isang phone na tulad nito.

At ang ASUS P505 na dual processor PDA phone. Oo, sa mga executives diyan, dalawa processor nito, isa para sa phone functions, isa sa PDA. Galing diba? Kung kilala niyo ASUS at ang kanilang mga laptops, sa presyo nito na SRP: PhP34,900 para mo na ring ninakaw ito. At! Hindi pa tapos; andaming extrang accessories na kasama nito bilang special offer nila, extra battery, leather case, etc. (worth PhP4,990).

-0-0-0-0-0-0-0-

TANONG: Bakit po ganun ung SMART? Nagpaload me ng 30, nagtext me ng 3 beses, ang natira na lang e 12 pesos. Ngayun lang nangyari sa akin ito. Bakit po ganun ang SMART? Magnanakaw ng load. Kawawa naman kami na subscriber nila. Sana po ay karmahin sila. Salamat po. Jun of Cavite

SAGOT: Sakit mo namang magsalita, makarma sila? Okay inisip ko kung paano nangyari iyung nangyari sa iyo, ito lang ang nakikita ko na rason: Sa tatlong tinext mo, isa sa kanila ay nasa overseas o nakaroaming service. Okay? 2 pesos (local text) plus 15 pesos (international text) = 17 pesos diba? Minus sa 30 equals 13. Ngayon asan iyung piso? Diba nagcheck ka ng load? Piso. Hindi SMART ang may kasalanan.

TANONG: May text barring ba ang SMART dahil po may naghihiram ng CP tapos nagpapasaload pala. Sana itext nyo po sa akin sagot. Ty.

SAGOT: Walang text barring services ang SMART o ang kahit na sino man sa mga network providers. Merong iyung pwede kang magcomplain sa NTC para mapadeactivate ang number at SIM ng isang nangha-harass sa iyo o kaya ay mayroong mga phones na pwede mong i-bar ang mga tawag na wala sa iyong phonebook, pere walang bar list para sa SMS sa mga local network providers. May napakadaling solusyon sa iyong problema...sabay-sabay po tayong lahat: Huwag mong pahiramin!

Iyan ang pinagkaiba ng PasaLoad ng SMART at ng Share-a-Load ng GLOBE. May password/passcode ang sa GLOBE na kapag hindi alam ng nakikitext ay hindi siya basta pwedeng magnakaw ng load.

TANONG: Ang isang cell ay naka locked tapos biglang na e-off ngayon pag e-on mo ay mag on-and-off na ito, sira na ba ang cell?

SAGOT: Hmmm, sa tingin mo? Hindi sa nang-aasar ako ha, pero, dahil nga ang habol ng WALASTECH ay ang maging marunong lahat ng Pinoy sa teknolohiya dapat paminsan-minsan ay i-challenge ko naman kayo diba? Eto hint: sa tanong mo, palitan mo ng salitang TV ang cell...gets mo? Good! Sa tingin mo sira o hindi? Sa tingin mo dapat mong dalhin sa trusted technician o sa authorized repair center ang cell mo para patingnan ang battery at power connectors o hindi?

TANONG: Paano po maiiopen yung GPRS para makatanggap ng MMS?

SAGOT: Depende po sa network provider ninyo. Kung sa SMART ay inyong kailangang magtext para sa activation, kung sa GLOBE ay kailangang ipa-configure niyo pa. Para sigurado ay dalhin ang inyong cellphone sa customer service center ng inyong network at sa kanila ipa-configure at ipa-activate. Ipa-activate niyo na rin ang MMS ninyo.

Siguraduhing may load kayo bago ito gawin dahil kailangang magsend ng test MMS at para makapagsurf ng GPRS site ay kailangan din ng minimum load.

-0-0-0-0-0-0-0-

TRABAHO: Ang New Horizons International ay naghahanap ng call center agents na mapupunuan ang mga sumusunod na requirements:

- Strong Self Confidence - Aggressive - Excellent written and spoken English - College Graduate in any field - Excellent customer service and selling skills - Prior call center experience is an advantage - Willing to work Graveyard shifts - Fresh graduates are encouraged to apply

Ipadala ang inyong mga resumes sa Lramos@newhorizonsinternational.com o sa kreyes@newhorizonsinternational.com. Para sa mga katanungan, pwede silang tawagan sa 9162536 mula 9am hanggang 12 nn. Hanapin si Lui o si Tin. Ang office nila ay nasa 33rd flr., Raffles bldg., Emerald Ave., Ortigas Center, Pasig City.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers, at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-066-051112-

WALASTECH 065 - 051110

WALASTECH 065 - 051110 THE BEST MP3 PLAYERS Ni Relly Carpio

TANONG: May binebentang mp3 player yung portable po 1 GB ung size? May alam po ba kayong binebentang NOKIA N-GAGE na unit? Ung QD po? Thanks, more power to your column, more power to WALASTECH. allen of montalban

SAGOT: Nung una kong binasa itong tanong mo medyo natawa ako kasi sabi mo "MP3 player, iyung portable." Ang alam ko kasi lahat ng MP3 player eh portable, napaisip tuloy ako kung bakit mo sinabi iyon. Bigla kong naalala na hindi lahat ng tao ay nakakaalam tungkol sa mga MP3 player, na kahit na medyo mula 1997 ay pinaglalaruan ko na ang audio format na ito ay ngayon lang nauuso na maging commercially available ang mga MP3 player. Lalo na ng nilabas ng Apple ang kanilang napakasikat na iPod na siyang number one MP3 player sa buong mundo.

Ngayon sabi mo nga na gusto mo ng magandang MP3 player, Kung ako ang tatanungin, ang top three brands na pwede mong tingnan ay ang Apple, tapos ay ang Creative at huli ang I-River. Totoo marami pang ibang brands diyan, lalo na ngayong na usong-uso iyung mga generic at taiwan alternative MP3 players sa market. Pero sa tingin ko, kung ang magiging basehan ay ganda ng tunog, tibay, at warranty service, itong tatlong ito ay masasabing mga leader, at ang presyo nila ay tama lamang. May mas mura diyan pero gaano kayo kasigurado na tatagal ang mga iyan?

Ang mga basic 1 GB o gigabyte na MP3 player ay dapat nasa below 9000 pesos range. Kung kaya mong maglabas pa ng kaunti, suggestion ko ang kumuha ka ng iPod Nano, iyung bagong labas ng Apple na nasa 12800 lang pero 2 GB na siya, enough for 500 songs. Value for money siya at maganda ang mga nakuha niya na reviews.

Ang NOKIA N-GAGE QD na hinahanap mo ay dapat mong bilhin sa mga shop ng Nokia mismo o sa mga network providers dahil madalas ay may kasama siya na dagdag kumpara mula sa mga stalls o sa greymarket.

TANONG: Saan po ba makakakita ng colored na cell, yung mura lang, thanks po and more powers. Jay of PCG

SAGOT: Swerte mo naman, intay ka lang ng kaunti, dahil magpapasko na naman at siguradong magkakaroon ng bagsak presyong offer ang mga network providers, sigurado ako na mayroong colored na cellphone diyan na may EMS/MMS/GPRS na below 3500 brand new dahil may nakita na ako at nakabili na ako para kay misis. Check out the Motorola Shops sa mga mall for affordable MMS phones.

TANONG: Pwede po bang maopen ang SIM ko na ngayun na PUK at rejected, may paraan po ba? Thank you po! Nag-inquire na ako noon dito sa aming lugar kaso kailangan daw yung white paper, eh nawala na kasi. Dito ako sa Southern Leyte at medyo no customer service center dito.

SAGOT: Malas mo naman. Maging lesson learned sana ito di lamang sa iyo pero sa lahat ng gumagamit ng cellphone. Huwag mong iwawala ang PUK unlock code mo na matatagpuan sa isang puting pirasong papel na kasama ng lahat ng prepaid na SIM. Just in case na ma-SIM lock mo ang sarili mo. May kopya ang mga network providers nito, pero may panahon bago nila ito mahanap at maibigay sa iyo, siguradong mapeperwisyo ka.

At sa iyo naman kung hindi mo maintay iyung PUK unlock code mo mula sa customer service center, bumili ka na lang ng bagong SIM. Tumawag ka na lang sa kanila para humingi ng tulong, hindi naman ata kailangan na personal ka pumunta eh, pero baka hingan ka ng mga documento bago ka nila tulungan. Goodluck.

-0-0-0-0-0-0-0-

ANNOUNCEMENT: "BATCH '81 IS BACK!" No, not the Mike De Leon film classic. It's the Malate Catholic School High School Batch 81. We're looking for a few good men and a truckload of great memories from an era when cellphones, personal computers and the internet are ideas whose time have yet to come.

On February 11, 2006, MCS Batch 81 will be celebrating its Silver Jubilee Grand Homecoming at the MCS Gymnasium. If you belong to this group, please contact Mr. Jong Ferma at 09175347098 or Mr. Oscar Berico at 09172488385 for more details. Please feel Free to join our mailing list at http://groups.yahoo.com/group/MCSbatch81/. We hope you can join us."

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-065-051110-

walastech 064 - 051108 - PINOY ATAT SA TEXT

WALASTECH 064-051108 PINOY: ATAT SA TEXT! Ni Relly Carpio

Ayon sa isang study na pinagawa ng Siemens noong December 2003 sa buong Asia Pacific, ang mga Pilipino ang pinaka di mapakali kapag tumagal na walang nag-tetext o tumatawag sa kanilang cellphone. Kasali sa study na ito ang China, Australia, Hong Kong, Indonesia, India, Malaysia, Philippines, Taiwan at Thailand. Kumpara sa 20% ng Australia at 37% ng Taiwan, tayo ay nasa 77%. Taka pa ba kayo kung bakit tayo ang SMS capital? Ang pinakamalapit na pasaway? Indonesia sa 66%.

Ano ibig sabihin niyan? Kung kukuha ka ng isang Australyano at Pinoy at pinagsama mo sila sa isang kuwarto kasama ang kanilang cellphones at wala sa kanilang nagtetext, sa isang beses na tingin ng Australyano nakaka-apat na si atat na Pinoy.

-0-0-0-0-0-0-0-

TANONG: Paano ma de activate yung pagpapadala ng SMART ng ringtone saka logo kasi nauubos load ko na hindi ko pa nagamit?

TANONG: Paano po ba mapapahinto ang pagpapadala ng dream trivia ng 232. Kasi po nauubos ang load ko. Salamat po sa inyo.

TANONG: Bakit po kaya ganun ang SIM ko? Dahil sa load ko na laging dinededuct ng nagpapadala ng picmsg at logo. Nag send na ako "pic msgoff" at "stop logo." Kasi nagpapaload po ako ng 30 at 60, 5x pa lang ako nagtext sa mga friends ko check operator kaagad. Kung emergency pa yang pang load ko sana po matulungan nyo po ako.

SAGOT: Kahit medyo nakakalito ang message mo, nage-gets ko naman ang problema mo. Marami sa mga nagte-text sa akin ay nagsasabing may natatanggap sila na VAS na hindi naman nila hiningi. At kahit na nagpadala sila ng STOP o ng OFF+whatever ay wala pa ring nangyayari.

Ang depensa ng network providers ay hindi naman sa kanila ang problema dahil ang VAS tulad ng mga tones at picture messages ay napapadala lamang kapag nagrequest ang subscriber mismo. Ang nagiging problema ay iyon ngang pagiging palya ng sistema ng pag-unsubscribe na parang napakahirap.

Hindi sa SIM mo ang problema, madalas kasi ay may natatanggap ka na ka-ayo-ayo na message lalo na kapag nakita mo iyung salitang "FREE" mag-ingat at basahin ng mabuti lahat ng natatanggap na mga message mula sa content providers na siyang nagbebenta ng mga VAS dahil minsan eh isang text mo lang na mali, siguradong sunod-sunod na ang kaltas mo. Ang masakit eh ang mga padala nila ay nag-iintay na ang load mo ay umabot hanggang doon sa kaya nilang makaltasan, hindi sa sinasadya nila iyon pero ganoon talaga ang messaging system na gamit natin, pag nagkaload ang pinadadalhan ay automatic na magre-retrieve siya ng messages mula sa message center. Kaya nagmumukhang inaabangan kayong magload bago kayo "nakawan."

So ang solusyon? Kapag nagpadala sa inyo uli ng VAS, basahin ng mabuti bago sumagot o magtext o ano man. Kung ayaw mo ang offer nila, burahin agad para hindi ka na magkamali ng reply. Kung nakasubscribe ka na at ito iyung VAS na siyang gusto mong itigil, hanapin ang kanyang content title, ito ay naka ALL CAPS madalas at magreply ng STOP at iyung kanyang content title sa number na siyang nagpadala sa iyo (hal: STOP BAKOKANG o kaya ay OFF PEKAS at i reply sa number na nagpadala).

O kaya ay mag text ng STOP ALERT sa 211 kung naka-SMART ka. Kung wala pa rin ay tumawag na sa toll-free customer service number ng iyong network provider at magrequest na tanggalin ang inyong mga subscriptions. Libre naman ang tawag kaya huwag ng magatubili, 24 hours iyan. Kahit busy ay kulitin mo na lang kaysa makaltasan ka ng 15 pesos uli bukas diba.

At sa susunod, basahin kasi ng mabuti ang mga text at huwag basta-basta mag-rereply, hindi lahat ng "FREE" ay libre.

-0-0-0-0-0-0-0-

TANONG: I have just read your column about call center! May I know if there is still available for that position? I am undergraduate of AB English. I live here in Zambales! Tnx...

SAGOT: Tulad ng sabi ko dati, aabot ng halos 75,000 na posisyon na sa call center ang napupunuan dito sa Pilipinas. Ang magandang balita ay 75,000 na posisyon muli ang kailangang punuan, at lumalaki ito kada may bagong contact center company na pumapasok sa ating bansa para mag invest. Ngayon, ang problema mo na lang ay walang masyadong mga call center sa Zambales. Punta ka dito sa Maynila, sigurado ako na ang tulad mo na AB English undergraduate ay may magandang pagkakataon para makapasok sa call center.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-064-051108-

WALASTECH 063 - 051105 - OSY

WALASTECH 063 - 051105 - OUT OF SCHOOL YOUTHS DON'T BE A FOOL, STAY IN SCHOOL Ni Relly Carpio

TANONG: Pwede po ba pumasok sa call center kahit 4th year pa lang. Ga-graduate pa lang sa march? Please textback. Thanks po.

SAGOT: Pwede po, kaso kung may maipapayo lang ako sa iyo, tapusin mo muna ang iskwela mo. At kung maari ay magcollege ka rin, dahil ang tapos ng college ay mas malaki ang pagkakataon na makapasok di lamang sa call center, pero sa kahit na anong trabaho. At kung college graduate ka ay mas malaki ang tsansa mo na mapromote kaysa sa mga hindi tapos ng college, lalo na ng mga hindi tapos ng high school.

Hindi sa sinasabi ko na nakasalalay sa kung ano ang natapos mo sa iyong dunong at kakayahan, pero sa mundong ito, ang walang diploma ay walang katunayan ng abilidad. Masaklap isipin na ang basehan ng karunungan ng isang tao ay isang papel na bigay ng mga institusyon na di sa madalas ay mga bobo ang mga produkto. Pero, iyan ang katotohanan.

Pero importante din na tapusin ang pag-aaral. Hep! Bago ka magreact, kaya nga pag-aaral ang sinabi ko at hindi pagpasok sa iskwela. Kasi ang pagpapalago ng dunong ng tao, kahit na galing ito sa iskwela o kaya sa mga nobelang pantasya ay dunong pa rin, at hindi dapat maliitin, ngunit dapat namnamin.

Kaya sa iyo, tapusin mo ang iskwela mo. Malay mo, may matutunan ka. Don't be a fool, stay in school.

TANONG: Bakit walang signal yung SIM kong SUN cellular? Pero sa iba may signal! Paano po kaya yun? Wala po talagang signal. NOKIA 5110 po ang cellphone ko pero sa NOKIA 3310 pwedi paho! Paano po kaya yun hindi ko rin magamit yung SUN ko ngayon. Albert Canlas ng QC

SAGOT: Walang signal ng SUN diyan sa lugar ninyo dahil a) natatabingan ng harang ang cellsite na nakatapat sa lugar ninyo o b)sira na ang antenna module ng iyong cellphone. Dahil sabi mo na pwede kapag nagpalit ka ng cellphone, mas katanggap-tanggap na ang cellphone mo ang problema at hindi ang network provider. Patingnan mo ang iyong cellphone sa trusted technician o sa authorized service center.

TANONG: Paki explain nga po anu po ba iyung callcenter? Ito po yung mga taong sinasabing "customer representative?"

SAGOT: Ang call center ay iyung siyang tinatawag din na contact center. Ang mga trabahador dito ay tinatawag na customer service representative o CSR Agent. Gamit ang teknolohiya na Voice Over IP (VOIP) ang mga callcenter ay nakatatawag o nakatatanggap ng mga tawag mula sa ibang bansa. Mga tawag na may bayad kada minuto ng serbisyo. Ito ay binabayaran ng kumpanya na siyang nagpagawa ng call center o kaya ng mga taong tumatawag. Masasabi na mga dakilang tagasagot ng telepono ang mga CSR Agents.

Ganito ang prinsipyo ng mga call centers at ito ay nagagawa lamang dahil sa teknolohiya ng VOIP na ginagamit ang internet bilang libreng daanan ng mga tawag mula sa kahit anong lugar sa mundo. Kaya kung may naliligaw sa kalagitnaan ng London South at siya ay tumawag sa isang payphone at du-mial sa 1818 para magtanong kung nasaan ang pinakamalapit na bus station, ang kanyang tawag ay dadaan sa internet at malalagak sa isang call center dito sa Makati at sasagutin ng Pilipino na nagkukunwaring taga Inglatera sa kanyang boses para tulungan si abang naliligaw. May bayad kada minuto siyempre.

TANONG: Ano sira ng cell ko ayaw gumana yung headset niya pero sa ibang cell ok yung headset. NOKIA 3200 unit ko.

SAGOT: Sira ang cellphone mo o kaya ay incompatible ang yung headset sa iyong cellphone. Kung sa ibang 3200 ay gumagana siya, ang cellphone mo ang may problema. Patingnan sa trusted technician o sa authorized service center.

TANONG: Anong sira ng cel ko? Bigla na lang mamamatay tapos nagkakaroon ng guhit na itim sa screen. 3650 po ang unit ng cell ko! Salamat po! Angel of Cavite

SAGOT: Dalawa lang iyan: a)sira na ang LCD ng iyong cellphone o b)sira na ang battery mo. Baka kasi may tama na ang LCD ng cellphone mo kaya siya nagluluko ng ganoon, o kaya ay hindi na kaya ng battery mo na patakbuhin ang LCD ng iyong cell. Patingnan sa trusted technician o sa authorized service center.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-063-051105-