TECH PARA MAKATULOG

TECH! GUSTO KONG MATULOG! Ni Relly Carpio

Nakakaasar! Nakakaasar kapag iyung tiyempong tinatamad kang magtrabaho tapos ang sarap matulog kasi sobrang init sa labas pero ang sarap ng lamig ng hangin nung electric fan. Siguro naman naranasan nyo na iyon diba?

Iyun ang pakiramdam ko ngayong mga panahon na ito, kasi kung hindi mainit ay umuulan. Ang sarap maging tamad at matulog na lang buong araw. Pero hindi naman pwede diba? kailangang magkayod! Ito tuloy ang rason kung bakit lalo akong naiinip na dumating ang panahon na ang teknolohiya ay sobrang advanced na imbis na sayangin ng mga tao ang kanilang panahon upang kumita ng pera at magpawis ay wala na tayong gagawin kung hindi ang mag-isip at magmuni ng mas higit na dunong, o palawigin ang kultura at sining!!! Iyung parang napapanood natin sa mga sine na ang mga tao ay nag-iisip na lamang ng mga bagay na magpapaganda na lamang sa buhay at ng kapakanan ng sanlibutan imbis na nagpapakahirap sa trabaho.

Iyan ang tinatawag na the "promise of technology: a better life." Na sa gamit ng science ng dunong ay gaganda ang ating mga buhay. At hindi niyo naman masabi na hindi kayo naapektuhan nito. Ito na lang eh: nababasa ninyo ang balita na minsan ay wala pang 24 hours ang nagdaan ng mula ito ay mangyari. Dati halos impossible iyon, ngayon eh sisiw na yan dahil sa bilis ng komunikasyon.

Pero mukhang talagang matagal pa ang panahon bago ang mga tinatamad at nagmumuni ay maaring makapagpetiks na lang kahit kailan nila gusto. Haaaay...Trabaho na Juan! Now na! Now na!

-0-0-0-0-0-0-0-

Sa TECHnews, ang IBM ay naglabas ng bagong mainframe computer na kanilang tinawag na IBM System z9. Ito ay halos doble ang kakayahan sa sinundan nito na IBM eServer zSeries z990. Ang mga mainframe ang pinakamalalaking mga computer sa mundo, ito ang gamit ng mga gobyerno, mga banko, at mga utility companies tulad ng Manila Water at ng Meralco. Ang IBM ang pandaigdigang eksperto sa mga mainframes.

Ang ibig sabihin nito para sa ating mga abang tao ay kapag ginamit ng mga ito ang IBM System z9 ay mas mabilis nilang maseserbisyuhan ang mas madaming tao. Ang mainframe na ito ay sinasabi ng IBM na maaring magbago ng pamamaraan ng pag-kalakan sa mga industriya at komersiyo na saklaw ng Information and Communications Technology o ICT.

-0-0-0-0-0-0-0-

TANONG: Last July 3 nagload ako ng 10 pesos. Inabot ako ng July 5 na nakakapagsend ng message. Dati kasi lagi na lang kinakain ang load ko. The next day, di ko na magamit ang cellphone ko kasi bigla nawalan ng signal. Kala ko talagang di ko na magagamit, ginagawa na lang laruan ng anak ko. Two days na alang signal, ngayon ok na uli. May kinalaman kaya yung bigla kong free load na text? Talk N Text ang gamit ko. - K8 Marikina

SAGOT: Iyung load normal lang iyong minsang lumampas siya ng deadline time, sa dami ng minomonitor niyan, at sa dalas mong mag load ng pakaunti-unti ay magkakapatong-patong na ang expiry niyan. Iyung pagkawala ng signal mo baka sa cellphone na iyan. baka may sira na ang antenna module ng phone mo kaya nag-on-off siya. Patingnan mo sa authorized service center kabayan.

TANONG: Good PM! I'm Lance Madrid of Puerto Princessa City. Problema ko po cell ko, kasi po matagal makapagsend ng message, nakakailang pindot ako ng send bago siya magsend. Kahit malakas po ang signal ko, ano po kaya problema ng unit ko? Model nga po pala cel ko eh Nokia 6630, isa pa po naglock ang memory card ko, paano ko po ma-open?

SAGOT: Dahil bago po ang phone ninyo, baka po may mas kinalaman ang setup ng inyong phone sa local network kaysa problema sa network o sa cellphone ninyo. Minsan kasi ay napupuno ang tinatawag na message center ng mga network provider, kung ipapatingnan ninyo sa kanila cell ninyo ay maayos nila ito para mas bumilis ang serbisyo. Tungkol naman sa inyong memory card, tanungin niyo po ang mga service people doon sa customer service ng inyong provider ay baka mayroong marunong mag-unlock ng memory card. Dalawang paraan iyan, may software lock via setup ng phone at physical write-protect lock na nasa memory card mismo, parang maliit na switch. Patingnan nyo na lang po pareho.

-0-0-0-0-0-0-0-

Belated Happy Birthday kay David Montecillo ng Green Lightworks Inc. at Happy Baptismal kay Ginger Franz Ocampo of Better Living, Parañaque mula sa Team Walastech at Tito Edwin Sallan

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-025-

RESPECT YOUR CELL

GIVE A LITTLE RESPECT Ni Relly Carpio

Kahit anong bagay kapag hindi binigyan ng respeto makatapos bilhin makaka-asa ka na hindi ito magtatagal. May mga readers na nagsasabi na sira ito o sira iyon. At sa aking palagay madami sa mga problema na ito sa cellphone ay baka naiwasan kung naalagaan ng kaunti pa ang mga cellphone.

Madaming nagsasabi na alagang-alaga naman nila cellphone nila and that talagang nasira lamang siya. Ok fine! Di ko naman sinabi na hindi ninyo inalagaan ang inyong mga cellphone eh. All I'm saying is kung naalagaan pa ng kaunti, maybe, hindi na nasira ang cellphone.

Ang manual ng isang cellphone o ng kahit na anong gamit na elektrikal ang siyang magbibigay ng tips sa inyo kung paano patatagalin ang buhay ng inyong cellphone. may kanya-kanyang tips ang mga manufacturers, pero may mga pare-pareho sa mga iot na madali namang tandaan at isagawa. Mga general guidelines for cellphone care.

1) Iwasang mabagsak ang cellphone. Kahit na anong gadyet, kahit na nga bumbilya eh, kapag na-alog o nabagsak ay nasisira. Diba ang sabi nga huwag aalugin ang TV at ang mga ilaw kasi baka mapundi? Medyo kahit katatawa ay may kaunting katotohanan iyan. Sensitibo ang mga gadyet, pero kahit ganun ay malayo na naabot ng shock resistance technology ng mga cellphone. Isipin nyo na lang kung gaano kagaling ang pagkakagawa ng cellphone pwede ninyong ibulsa-bulsa, i-itsa-itsa, at okay lang. Huwag naman maging pasaway at ipang-tumbang preso ang cellphone.

2) Iwasang mabasa ang phone. Dekuryente po iyan, at kahit mukhang bareta ng Mr. Clean ang inyong cellphone ay hindi po sabon iyan. Kapag nabasa ang circuit board ng cellphone, goodbye na iyan! Huwag ding isahog sa sinigang tulad ng ginawa ng aking isang kaibigan! Hindi masarap ang sitaw, gabi, baboy at cellphone. Hyuk! Hyuk! Hyuk!

3) Iwasang madumihan ang cellphone. Ang alikabok ay maaring pagsimulan ng pag-overheat ng mga circuit board o pag-rust ng mga connections na makakasira dito. Kung sa tingin ninyo na hindi nakakasira ang alikabok, bakit mo pa nililinis ang electric fan? Diba?

4) Iwasang gumamit ng non-original parts and accessories. Oo sige, tama ka na, wala nga namang housing na original na Hello Kitty ang design. At ang original na battery ay over 1000 ang presyo. Pero may kwento ako sa inyo, may isang young actress noon na nasunugan ng Mitsubishi Pajero dahil ang kanyang cellphone ay kanyang naiwang nakasaksak sa loob ng kotse habang ito ay nakaparada. Ang nangyari? Nagliyab ang upholstery ng kotse nang mag-overheat ang battery at nalusaw ang cellphone. Ang comment ni young actress: "Hindi ko naman alam na pwede palang mangyari iyon."

Hindi sinagot ng kumpanya ng cellphone ang pagkakasira ng kotse niya dahil hindi original ang kanyang battery, kung original daw iyon ay iyung control chip nung battery ay mag-aactivate at i-shu-shut off ang charging kung sobrang uminit ang battery. Nakakatakyut!!!

Ito pa, ang original housing ng mga cellphone ay gawa sa materials na mas resistant to scratching ang breakage. Also, ang resilience o tamang kalambutan ng plastic na gamit sa mga housing ay katulong ng ibang mga shock resistance features ng mga cellphones. Ibig sabihin kung papalitan mo ang housing ng hindi original, maaring lumaki ang chance na masira ang inyong cellphone kapag nabagsak dahil iba ang specifications ng plastic na ginamit ng manufacturer ng non-original accessory housing. Ok?

-0-0-0-0-0-0-0-

Tanong: Mr. Carpio naka SUN Cellular SIM po ako. Pag natawag po ako ay laging "error in connection" ang nalabas. Cellphone ko po ba o yung mismong network ang may problema? - Brian, Alabang

Sagot: Brian, hindi ka nag-iisa. Nahihirapan akong sagutin ito dahil madali kasing sabihin ng kahit na sinong network provider na ang problem with their network ay dahil sa atmospheric conditions (dahil sa ulan, sunburst, cosmic wave, may dumaan na kalapati sa tapat ng cellsite) kung kaya mahina ang signal o wala. Alam nating lahat na SUN cellular ang pinakabagong player sa mga network providers. Intindihin na lang natin na maaring may mga panaka-nakang problema, bago nga naman diba? Pero ang sabi naman ng SUN ay ginagawa nila ang lahat ng kanilang makakaya para gumanda service nila. Commitment to our customers nga diba?

-0-0-0-0-0-0-0-

May iiwan lang ako na mga tanong na inyong pag-isipan aking mga giliw na mambabasa: 1) Dapat bang maghanap ng magandang serbisyo mula sa isang kumpanya kung ang product nila ay unlimited o libre? 2) May karapatan bang umangal ang mga customer kung alam nilang ang produkto ay unlimited o libre? 3) Dapat bang kutyain ang isang kumpanya for "bad service" kung ang kanilang produkto ay unlimited o libre? 4) Dapat ka bang magtitiis sa libre para makamura, kung ang iyong sinasayang ay ang iyong oras na dangang mas mahalaga?

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

TOPICS WANTED

ANONG GUSTO MONG TOPIC? Ni Relly Carpio

Tinext ako ng utol ko na si Auggie. Sabi niya, nakakasawa na daw marinig ang tungkol sa warranty at dapat daw mag feature naman daw ako ng mga mas interesting topics. Ang iniisip ko, ano nga ba ang mas interesting topics.

Sa aking paniniwala, the three most interesting topics are: sex, drugs, and rock and roll. Ang problema eh ang pwede ko lang pag-usapan dito ay mga T.E.C.H. (Telephones, Electronics, Computers, and Hardware). Alam niyo aking mga kaibigan, lumalabas sa mga text-in-questions, ang gustong malaman ng tao ay mostly, tungkol sa cellphones.

Hindi ko naman ma blame ang mga readers. Maski ako minsan ay madaming tanong tungkol sa cellphones. Kaya nga naisipan ko na simulan ang column na ito, para matulungan iyung mga kababayan ko na walang access sa information tungkol sa cellphones at kung ano-ano pang mga technology.

Iba na nga kasi ang panahon ngayon, we as a race know more now and have discovered more in the past 100 years than at any time of our existence. Kung kukunin mo ang lahat ng natutunan ng sangkatauhan nitong nakaraang 100 taon lamang ay di iyon kayang mapantayan ng halos 99,900 years na tayo ay naandito sa mundo.

Paano mo nga naman masasabayan lahat iyang teknolohiya na iyan kung pinoproblema mo pa ang trabaho, pera, pamilya, mga kaibigan at gobyerno! Madami nga sa mga nagtatanong ay aminado na wala na silang panahon na magbasa ng manual, pagkabili ng cellphone o gadget eh gamit na agad, bahala na si Batman! Parang kaibigan kong si Chinx, ayun, nakakatatlong linggo na iyung dalawa niyang bagong cellphone ng kagagamit ay ni hindi pa rin niya nababasa ang mga manual, at kada tuturuan ko pag meron siyang di maintindihan na napindot niya, "Ayusin mo na lang! Nagmamadali ako, tsaka mo na ako turuan!"

Naisip ko tuloy, ganito rin kaya ang pagiisip ng madami sa mga aking mambabasa? Ang naisip kong sagot sa sarili ay: "Eh bobo ka pala eh! Kaya ka nga gumawa ng column na ito para mabilis na matulungan ang iyong mga kababayan diba? Sanaaaa!"

Dangang ganoon na nga ang nangyayari, naisip ko na dagdagan ang serbisyo ng Walastech sa inyo. Kung mayroon kayong topic na gusto ninyong idiskurso ko dito, text nyo lang ako o i-email, at bibigyan natin ng oras o espasyo.

-0-0-0-0-0-0-0-

Tanong: Good PM po. Itatanong ko lang po itong Nokia 5110 kung bakit patay sinde ito kung magtetext. Minsan patay talaga. Thanks po sa sagot.

Sagot: Ito ay di kalimitan na problema ng Nokia 5110. Dahil sa construction niya na ang housing ay maluwag para may shock resistance, kapag naiipit ang LCD area nito sa bulsa o sa loob ng bag ay lumuluwag ang connection nito sa main module ng cellophone. At dahil ang mga LCD ay hindi designed na paputol-putol ang kuryente, nasisira ito katagalan. Patingnan ang inyong phone sa mapapagkatiwalaang repair center at ipaayos o papalitan ang LCD.

Tanong:Good AM po, magtatanong lang po me, kasi nabasa me # mo sa jaryo. Puedi po malaman kung ano keyword ng ringtone ng helo garci saka untitled. Pakitxt nu nlang po d2. Wala me kasi mahingan nyan e. Salamat po. - Lubel

Sagot: Ako din walang "hello garci" na ringtone. Wala yatang legal content provider na mag-o-offer ng "hello garci." Iyung Untitled pwede pa. Tingnan nyo lang sa mga diyaryo o kaya magsurf thru GPRS-WAP para mahanap. Kung talagang gusto mo ng "hello garci" meron niyan sa mga gray market cellphone stalls sa mga mall.

Tanong: Magagawan pa ba ng paraan na magkaroon ng signal ang CP ko kasi bumagsak siya.

Sagot: Nakow! Hala lalabasan iyan ng kalabaw! Joke! Joke! Pwede pa iyan, baka naman lumuwag lang ang kabit nung antenna. Sa bandang taas sa likod iyan ng cellphone, at kung iyon ang tumama, eh kaya lang nasira iyan. Patingnan at ipaayos sa trusted cellphone repairman. Kung sinuwerte kayo, kaunting soldering lang oks na iyan, kung minamalas-malas, bagong antenna module ang kailangan ninyong bilhin.

-0-0-0-0-0-0-0-

Belated Happy Birthday kay Elizabeth Ihada ng Ormoc, Leyte at kay Zab Cabato ng Las Piñas, Manila mula sa Team Walastech!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-23-

TROUBLESHOOTING VERSUS REPAIR

Troubleshooting VS Repair Ni Relly Carpio

"Good PM! Nagrerepair po kayo ng cell? Please textback."

Hinde. Kaya kong magtroubleshoot ng cell at tumingin kung ano problema hanggang maayos ko siya through simple elimination processes at kung anik-anik na pahampas-hampas here and there, pero hindi po ako nagre-repair.

Bakit? Kasi po hindi ako authorized cellphone technician. Meron po na mga cellphone technician, at merong mga authorized cellphone technician. Ang pinagkaiba nila ay ito: Ang authorized technician kapag ginalaw ang inyong bagong cellphone at kanyang naayos, tuloy ang inyong warranty. Kapag hindi niya naayos o kanyang nasira ang inyong cell habang inaayos niya ito, papabalik niya sa assembly plant ang cell at kayo ay bibigyan ng bagong unit. Kapag matatagalan ang repair service ng cellphone nyo ay papahiramin kayo ng service unit para may cellphone pa rin kayo.

Ang unauthorized na cellphone technician, buksan lang niya ang cellphone ninyo, tanggal na ang warranty. Oo! Ganoon kalupit ang katotohanan.

At sa tingin ninyo, kapag hindi niya naayos ang inyong cellphone o nasira niya, ano sasabihin niya? "Ay mam, hindi ko maayos eh, eto na lang ang bagong cell..."

BWAHAHAHAHAHA! Hinde! ang sasabihin niya..."Sorry boss...(sabay kamot sa ulo)...defective ata iyung unit niyo, blah! blah! blah!, hindi ko maayos eh...gusto niyo dalhin nyo na lang po sa (network provider) at sa kanila ipaayos...sorry po. Ah...800 po iyung pa-repair nyo."

Sira na cell nyo, bayad pa kayo. At huwag ka nang umangal bok at baka makuyog ka pa ng mga iyon dahil magkaka-kilala iyang mga damuho na iyan. Sorry ka na lang.

Pero, hinde...hindi ako nagre-repair ng cellphone. Ang tawag po sa aking ginagawa ay troubleshooting: Ito po ay okay lang na gawin ng ninoman. Ito ay saklaw o within the warranty. Ito po ay paghanap ng solusyon sa mga maliliit na problema na hindi na kailangan ng repair technician. Kahit sino po ay pwedeng gawin ito. Kaya kapag nakikita nyo po na sinabi ko na "dalhin sa authorized repair center" ibig sabihin eh hindi na pwede ang troubleshooting, at anumang ayos na kailangan ay makakasira na ng warranty.

Tsaka please lang din po mga giliw kong readers. Isang maliit na English lesson: Bastos ang sabihin mo na: "Please textback." Kahit sabihin mong may please iyan, parang sinasabi mo na rin na "Paki bilisan mo ang pagsagot." Diba medyo maantot? Mas maganda ang: "Thank you for the reply." Hane? Thank you for your questions.

~0~0~0~0~0~0~0~

Tanong: Ang cell ko Nokia 3350. Tanong ko po magkano bayad para activate ng GPRS and MMS. At makatanggap na po ba ako ng cam picture TY. Tumagal pa kayo! Ericson ng Bacoor

Sagot: Libre po ang pa-activate ng GPRS at MMS. Dalhin lamang po sa customer service center o sa authorized repair center and inyong cell at ipa-setup ang cell. Tapos po niyan eh, basta kakasya pa sa cell ninyo ay makakatanggap kayo ng cam pictures.

Tanong: Bakit po ang cellphone lumalabo ang lens minsan pag nagte-text?

Sagot: Baka po nabagsak ang inyong cell at lumuwag na ang LCD o kaya ay nasira ito. Patingnan ang cellphone sa authorized repair center.

Tanong: Bakit pag tumatawag ako sa anak ko may echo ang boses, o boses ko rin naririnig ko na may echo?

Sagot: Baka po naka-handsfree unit ang inyong anak. Ito po iyung earphones at micropono na kinakabit sa cell. May mga model po ng cellphone na kapag ginamitan ng generic na handsfree ay hindi nag-aactivate ang auto shut off ng unit microphone, kaya po parang dalawa ang naririnig ninyo, at kapag malakas ang earpiece ay maririnig ninyo sarili ninyo.

Tanong: Bakit po di ma-open ang wallpaper na dinownload ko? Ang unit ko ay T630 Ericsson.

Sagot: Hindi po lahat ng content ay compatible sa lahat ng cellphone. Madami sa mga content providers (iyung mga gumagawa ng ringtones, wallpapers, themes, etc.) ay nakafocus lamang sa isa o ilang brand. Pumili po ng mabuti bago magdownload, o kumuha na lang mula sa mga kapareho ng unit model.

Tanong: Bakit laging insert SIM card ang nagrerehistro sa screen ng cellphone ko sa tuwing magsend ako ng text message, kailangan i-off cellphone para maayos muli. Why?

Sagot: Baka po maluwag na holder ng inyong SIM, o kaya ay sira na ang inyong SIM. Humiram ng ibang SIM at testingin sa inyong cellphone, kapag maayos, ang SIM ang may problema, kung hindi, ay ang inyong cell. Kung ang cell ay ipaayos agad sa authorized repair center, nakakasira po ng SIM ang paulit-ulit na reload.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-022-

SONA at LCD

Mabuhay Techfans! Napanood nyo ba iyung SONA nung Lunes? Okay ba? Ewan ko kung may nakapansin sa inyo doon sa isang sinabi ni PGMA, sabi niya 5000 high schools na daw ang may access sa computers sa Pilipinas.

Kung inyong mararapatin, sa tingin ninyo, gaanong kadaming estudyante iyon, at sa dami ng estudyante na humahawak sa computer na iyon, gaanong kadami sa kanila ang magiging bihasa sa computer. Hindi ako nagiging negatibo kabayan, ang sinasabi ko lang ay totoo, malayo na naabot natin mula dati, pero malayo pa rin ang ating hahabulin.

Pero tulad ng sinabi ko dati, ang Pilipinas na ang isa sa mga pinakamaunlad na bansa sa Timog Asya pagdating sa computer literacy. Isipin nyo na lang kung gaano kasama sa ibang mga bansa! Sana, ay ituloy ni PGMA ng DepEd at ng CICT (Commission on Information and Communications Technology) ang kanilang pagpursige sa pagbigay ng computer education sa ating mga istudyante. Andiyan ang kinabukasan, andiyan ang susi ng mas mataas na edukasyon ng ating mga kabataan.

-0-0-0-0-0-0-0-

Nabigla ako sa dami ng text na nakuha ko tungkol sa mga problema sa mga cellphone, lalo na pagdating sa baterya at sa LCD. Sa mga susunod na issue ng WALASTECH ay muli nating tatalakayin ang mga iyan. Pero sa ngayon, ito munang mga ito:

TANONG: Good PM po sa inyo gusto ko lang pong itanong kung ano po ang problema ng cellphone ko. Tuwing madiin po ang upper housing ng cell ko parating insert SIM card. God bless!

SAGOT: Okay, malamang ay ang inyo pong housing ang problema diyan. Baka ho masyadong masikip ang housing kaya po naiipit ang battery at ang SIM holder. Kung hindi po naman ay may tama na ang SIM holder, kung maluwag po ito ay iyan po ang message na ilalabas niya. Iwasan po na ang SIM ay papalit-palit. Nakakasira po iyan ng SIM at ng cellphone. Subukan nyo po na humiram ng SIM at ilagay sa cell nyo, kung ganoon pa rin ho ang problema ay iyung cell, kung hindi, nasira na po ang SIM ninyo.

TANONG: Bakit nagbi-blink ang LCD ng cellphone ko? Nokia 3300 po ang unit ko. Pinalitan ko na po sya ng bago battery pero ganun pa din. Di po kaya sa LCD mismo na problema? Paul of Pasig

SAGOT: Paul, tama ka. Ang LCD na siguro ang may problema. Baka lumuwag ang connector ng LCD sa logic board at power connector ng iyong cell. O kaya ay nasira ang iyong LCD dahil sa pagkabasa o pagkabagsak. Dalhin ang cellphone sa authorized service center.

TANONG: Ano po ba ung maari pang mailagay dito sa cell ko na Nokia 7650? Yung mga nalalaman niya? Tiyaka pwede ko po bang palakihin ung KB memory ng N7650 ko? Wala ung nasasalpak na memory card tnx po.

SAGOT: Wala pong memory card slot ang Nokia 7650. Iyan na po talaga ang memory (KB) size niya. May narinig po ako ng mga nag-papalaki ng memory ng N7650, pero bakit pa? Hindi kasama sa warranty ang ganoong service. Maraming pwedeng ilagay sa N7650 pero hindi lahat ay kanyang nagagamit. Mag trial and error na lang po kayo sa inyong mga makukuha na content. More in the future tungkol sa mga ganitong mga Smart Phones.

TANONG: Sir good PM this is Den Pequena. I was wondering, do you know any authorized service center who could open Nokia 6630 by Vodafone from japan? And would you know how much it costs? I learned that in Greenhills and Harrison, someone is doing those kind of jobs. Its just that i wanted to make sure na who else I can trust except those with recognized establishment. They may cost a bit higher but I believe they won't gyped me. Anyway, hope you could help me, thank you, more power n God bless.

SAGOT: Salamat din sa iyong text Den Pequena. Okay, ang Vodafone ay network provider tulad ng Globe, Smart at Sun dito sa atin. Napapagkamalang Vodafone phones ang kanilang mga unit dahil nilalagyan nila ng logo ang lahat ng phones na kanilang binebenta, pero ito ay mga parehong mga phones na binebenta dito sa atin. Para sagutin ang iyong tanong, oo, may mga tao na nag-o-open line sa Harrison Plaza at sa Greenhills. May neg-text nga sa akin na sila ay authorized na taga-open ng mga Nokia.

Sa aking palagay, okay, pabukas ninyo, ingat lang sa mga ito, panoorin ng mabuti ang kanilang ginagawa at huwag na huwag iiwan ang cellphone ng walang resibo! Humingi ng warranty of service mula sa pinag-paayusan kung sakaling masira kaagad makatapos nilang kalikutin. Hindi ko alam ang presyo at hindi ako makapagbibigay dahil depende iyan sa mga nag-aayos, walang set na presyo. Siguro ang pinakamaganda kong maibibigay na payo eh, kapag masama kutob ninyo sa pinagpapa-ayusan, ay kunin ang cellphone at umalis. Huwag ipasa-alang-alang ang cellphone para lang makamura po.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

BATTERY

Mabuhay! Kay dalas na ang problema ng ating cellphone ay ang battery. Kung hindi low batt ay walang charger, o kaya ay kailangan nating iwan ang cellphone sa tabi ng saksakan at pati tayo, dahil sa dami ng ka-text ay hindi rin makaalis sa tabi ng saksakan.

Ang baterya ang buhay ng cellphone. Ito ay madalas gawa sa tawag na Nickel Metal Hydride o NiMH battery. Ito na ang mas bagong klaseng baterya ng cellphone. Mas magaang, mas matagal ang lakas na naitatabi at hindi kasing delikado nung mga lumang baterya na mas malaki tsansa na pumutok o tumagas.

Ang baterya ng cellphone ay may warranty lamang ng anim na buwan, ito lang ang parte ng cellphone na may warranty na hiwalay sa warranty ng buong unit. Dahil makatapos ng anim na buwan, kahit na anong baterya ay magsisimula ng mag-deteriorate o humina makaraan ang anim na buwan. Kaya makatapos ang ilang buwan ng gamit ay hindi na dapat umasa na tumagal ang charge ng cell.

-0-0-0-0-0-0-0-

Q: Pwede po bang magtanong, kasi isang buwan ko pa lang nabili ang cell ko, pag chi-narge ko kahit di ko gamitin kusa lang magdischarge ano ang sira nito?

Baka po walang sira iyan, kahit ano pong cellphone, kapag inyong hindi ginamit ay mauubos ang charge. Depende ho sa gamit ay hanggang tatlong araw lang iyan bago kailangang i-charge muli. Kasi iyung sinasabi nila na 255 hours standby time ay inyo lang maabot kung pagkacharge ay wala na kayong pipindutin sa cellphone.

Kada tunog, pindot, o ilaw ay nagbabawas sa oras na ito. Kada vibrate at text ay nagtatanggal ng isang minuto mula sa standby time. Kada isang minutong usap ay nagta-tanggal ng lampas isang oras na standby time. Pero kung gusto ninyong makasigurado ay ipacheck up sa authorized service center.

Q: Gusto ko lang pong itanong: cellphone ko madali ma-low batt. Pag itinawag, one bar agad. Kapag nakacharge at di pa full na binunot gumagana pa rin kahit di na siya nakacharge. Bagong palit po battery, pinatingnan ko po, mechanism na po sabi nila.

Siyempre iyan ang sasabihin nila kasi hindi na nila maayos. Madami kasing mga nag-aayos diyan ng cellphone na kapag hindi nila maayos ay sasabihin na kahit ano para hindi masabi na nasira nila.

Sa authorized service centers hindi nila sasabihin iyan. Sasabihin nila kung kaya nilang ayusin o hindi, kung pwede pang isalba o hindi, kasi nga naman lahat ng gawa nila ay may warranty at binabantayan sila ng mga handheld manufacturers. Iyan ang unang una ninyong bantayan, kapag hindi kayang i-esplika ng nag-aayos sa inyo kung ano ang problema, kunin ang cellphone at umalis na, baka ano pa ang mangyari sa cellphone niyo.

Ngayon, tungkol sa inyong cellphone, dahil nagpalit na po kayo ng battery, baka iyung terminal connections sa cellphone ang may tama kaya hindi niya nagagamit ng maayos ang battery. Baka din po na short circuit na ang inyong cell o kaya ay may internal malfunction na. Dalhin agad sa authorized repair center.

Q: Any idea on which unit is good on e-load business. Pag walang power ang unit anong sira? Kainis naman pagawa ko ng pagawa kung anu-ano sira. Nakakatakot pa ang mahal ng service.

Ang magandang pang e-load na business ay ang murang unit, para mas malaki kita diba? Hindi malaki babawiin. Mayroon ng mga brandnew units na tig 2500 na pwedeng pwede nang gamitin para sa e-load. Mas magandang brand-new unit dahil mas mahirap na magkaproblema.

Tingnan ang warranty kung pwede pa rin siya kahit gamitin sa business ang cellphone. Minsan kasi ay navo-void ang warranty kapag ginamit para sa commercial use ang isang cellphone.

Pero kung ma-void man ay okay pa rin, dahil nga bago, hindi sirain. Mas sigurado, at dahil galing sa authorized distributor, maaring ipaayos ng walang pangamba sa kanila. Hindi dapat mahal ang service, dahil nga kapag may warranty ka ay libre iyan.

Pag walang power ang cell, baterya o kaya ay iyung connectors ng cellphone ang siyang may problema. Dalhin sa authorized service center at doon ipaayos. Huwag magtesting ng bagong baterya. Kung grounded iyan ay maaring masira ang bagong baterya, sayang ang pera. Pwede mo na sanang ipambili ng lobo. Hehehehe.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

ERRATA: I forgot to mention two newer types of batteries, Litihium Ion and Lithium Polymer which I will discuss in a future issue of the column.

LOAD ISSUES

Load Questions Ni Relly Carpio

"Pare? May Load ka pa ba? Penge naman o." Alam nyo ba na ang linyang iyan eh hindi ninyo maririnig sa ibang lugar sa mundo? Kasi ang Pilipinas ang siyang gumawa ng teknolohiya na ito at ngayon lamang ginamit ng mag ibang bansa makatapos kunin ang ideya mula sa atin. Diba kaya nga nabigyan ng international award ang Smart diba?

Anyway! Hay nako, buong araw madami sa atin iyan ang iniisip. Kalahati ng bansa: May load pa ba ako? Mas madami pa kaysa: Mag-resign kaya si Gloria?

Tanong: Gud AM! I want to know what's the problem of my cellphone. Everytime I load di makaabot sa expiry date nya. Bigla lang mawawala? If I change my SIM ganun din po ba ang mangyayari? I need your help.

Sagot: Ako man dati ay litong-lito tungkol sa mga Pasa load o Autoload o anumang load na iyan, kasi nga eh, gaanong katagal ba? Bakit hindi na lang hanggang maubos diba? Kung natatandaan niyo ay may isang politiko na nagdala ng issue na iyan sa congresso. Paano daw pag hindi mo naubos load mo at umabot iyung deadline? Saan napupunta iyung load, paano na iyung ginastos nung customer? Gusto niya sana na mag-isplika ang network providers at baguhin ang sistema. Ano nangyari? Wala...kayamot.

Anyway, eto po ang mga solusyon: Magload ng 300 lamang palagi. Gumamit ng load card. Bakit? Kasi mabibili mo ito ng mas mura (May alam ako na 273 isang card! Laban ka?), at may libre pa ito na texts. Ang expiry niya ay two months, siguro naman mauubos mo iyon bago dumating ang dalawang buwan.

Kung walang 300, kumuha ng 50 na Pasaload o Autoload. Bakit? Kasi ganito ang sukat ng expiry. Sa kada 10 piso ay may isang araw ka. Pag nagload ka ng 25, kahit 29 ay dalawang araw (48 hours) pa rin iyan. Pag 50 niload mo, may limang araw ka (120 hours) bago ito mag-expire. Siguro naman sa limang araw eh ubos mo na iyon. At kung sakaling may kailangan kang tawagan ay may limang minuto ka na tawag, hindi lang dalawang minuto. For emergencies ika nga?

Huwag magload ng patingi-tingi, kasi iyung expiry date ay reset ng reset lang pero ganoon pa rin, dalawang araw pa rin, mas magandang pag medyo bumaba ka ng 10 pesos tsaka ka na lang magload uli ng malaki-laki. Wag iyung patagpi-tagpi, dahil pati ikaw malilito hanggang ma-expire na ang load mo, at wala ka nang magagawa kundi magtanong ng: "Pare? May Load ka pa ba? Penge naman o."

~0~0~0~0~0~0~0~

May kopya ka na ba nung bagong movie ni Jet Li? Sa DVD? Talaga? Alam mo bang bawal iyan? Ano? Wala kang pakialam at hindi ka takot kay Bong Revilla kamo?

Hay nako. Alam mo bang pagnanakaw iyan? Oo? Pero ginagawa mo pa din? Dahil ang mahal ng original? Okay, okay. Una, hindi ako nagmamalinis, noong bata ako ay naranasan ko rin na makanood ng mga sine sa mga betamax (iyung mga bata diyan, ang betamax ay iyung nauna sa VHS format) pero hindi iyon rason na hanggang ngayon na madali nang makakuha ng kopya ng sine o ng software para sa computer ay gagamit ka pa rin ng pinirata na kopya.

Kaya lang naman dati ginagawa ang pamimirata sa Betamax ay halos hindi tayo inaabot ng mga sine noon galing sa USA, at ang paraan lang para makadating dito ay sa pamamaraan ng bootleg copies kung tawagin. Tanungin ninyo kahit na sinong manga-nganta diyan kung wala silang bootleg copies noong dekada 80. Sinungaling iyan.

Pero sa ngayong panahon na lahat ng bagay ay maari ng makuha ng madali, hindi na maganda na payagan pa rin ang pagpirata. Isa lamang pong pakiusap, dahil sa ayaw natin at sa gusto, ang paglipana ng piracy ay isang issue na tinitingnan ng mga multinational companies na pwedeng mag-invest ng pera dito sa ating bansa.

Kapag ang piracy rate ay mataas sa isang bansa, hindi nila nagugustuhan na magtayo dito ng opisina o dalhin ang kanilang business dito dahil baka nga naman mapirata rin sila. Parang ganito iyan eh: magtatayo ka ba ng sari-sari store sa gitna ng lugar na lipana ang nakawan? Hindi diba? Pakiusap lang mga kababayan, hinay-hinay naman.

Ayon sa Business Software Alliance, isang worldwide organization ng mga leading software developers, na siyang nagmo-monitor ng software piracy sa buong mundo, ang nawala sa Pilipinas nung isang taon ay PhP3.7 billion dahil sa software piracy. Ang Piracy rate ng Pilipinas ay nasa 71% porsiyento para sa 2004, bumaba ng isang porsiyento mula noong 2003. Pero ang nawalang pera sa ating bansa dahil sa kawalan ng investors ay umabot ng US$69 million dolyares mula US$55 million nung nakaraang taon.

Isipin sana natin ang ating bayan, kundi, ay ating sarili. Iwasan ang piracy.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

COMMON CELL PROBLEMS

MGA KARANIWANG PROBLEMA NG CELLPHONES Ni Relly Carpio

Mabuhay! Medyo dumadami na ang mga tanong na natatanggap ng Walastech! mula sa inyo aming mga giliw na mambabasa. Kaya ngayong araw na ito ay aming sasagutin ang karamihan nila para naman maibsan ang pagintay ng iba sa inyo. Doon sa aming sinagot na intayin ang kasagutan at hindi pa rin namin nadudulungan ay kaunting pasensiya pa po. Medyo technical po siguro ang inyong tanong o kaya ay wala pang nakakarinig ng ganoong pangyayari.

Tulad ng tanong ni Digoy ng Harangalan, Pasig na medyo mahirap sagutin:

Q: Ako po si digoy ng harangalan pasig ang problema ko yung Sun SIM ko pag gabi wala ng signal. 3530 po yung unit ko kapag ibang SIM okay naman! Salamat po.

Nung una ay akala ko ay nagpapatawa lang si Digoy, pero sabi niya seryoso daw siya. May joke kasing umikot dati na ang Sun Cellular ay may signal lamang kapag nakatayo ka sa ilalim ng araw. Siyempre, walang katotohanan iyan, at pambibiro lamang ng mga walang magawa sa buhay.

Digoy, ganyan talaga kapag bagong tayo ang isang network provider (para akong si Tiya Deli Magpayo ah! Hi Tiya Deli!). Eniwey, may panahon na magdadaan bago matakpan ang buong area ng mga cellsite. Isipin nyo na lang na ang kada cellsite ay umaabot lamang ng 24 na milya ang signal, pag lumampas ka na doon ay wala na. At kapag ito ay naharangan ng building o bundok ay mababawasan na ang layo nito.

Isipin nyo kung gaano kalala kapag sa loob ng lunsod, di tulad sa lugar na walang masyadong mga bundok o building, kasi ang cellphone signal ay base sa radio waves na hindi kaya na makatagos sa makakapal na buildings o kabundukan.

Ang kasagutan sa iyong tanong Digoy, baka naman pagdating ng gabi ay nagkakaroon ng interference mula sa electronikong bagay na siyang humaharang sa signal mula sa cellsite na malapit sa inyong lugar. Mga halimbawa nito ay mga high tension cables na mas nagagamit pag gabi dahil sa pagbubukas ng ilaw ng inyong mga kapitbahay, o kaya ay isang malaking neon billboard sign na nakasakto sa cellsite. Iyung mga iba ay hindi siguro naapektuhan.

Q: Hello po tanong ko lang po. Pag nagcha-charge kasi ako nagre-reconnect charger. Ano po ba ang may sira ung phone ko o ung battery? Thank you po. More power - Mariel

Salamat Mariel. Maaring pareho. Ang battery kasi ng isang cellphone ay may six months warranty lamang, pag lumampas na ng anim na buwan ay nagsisimula nang mag detetriorate ang battery hanggang sa hindi na siya makapag charge. Maari rin na iyung charger. Humiram ng kaparehong charger sa kakilala o sa service center para malaman kung alin ang may problema. Tandaan, gumamit ng original batteries at chargers. Huwag isapeligro ang buhay at ari-arian para lamang makatipid ng kaunti. Ang pekeng baterya at charger ay maaring pagsimulang ng sunog.

Q: Gud PM po, tanong ko lang po kung bakit yung cell ko 3530 kapag kino-connect ko ng GPRS "secure server unknown" ang lumalabas. Ano po ba ibig sabihin nito? Ipa-a-activate ko pa ba? globe user

Ang ibig sabihin ng secure server unknown ay hindi niya nahahanap iyung computer server na siyang dapat nagbibigay sa kaniya ng data para mag-internet via GPRS. Nakaset sa cellphone kung ano ang kanyang hahanapin na WAP site, kapag hindi niya ito nakita dahil ayaw siyang papasukin ng secure server, mali ang setup ng cellphone.

Pumunta lamang sa customer service ng Globe o sa authorized service center ng Nokia at ipa-configure o setup ang inyong cellphone. Ipa-activate mo na rin ang MMS mo habang naandoon at testingin kung maayos.

Q: Gusto ko lang itanong kasi ang model ng cell ko sa NOKIA 3510, na activate na ang MMS and GPRS kaya lang di makadownload ng PTONS (Polytones?), possible kaya na wala talaga GPRS services ang unit ko? Rhea A

Minsan kasi ang polytones na ginawa ng content provider ay hindi compatible sa lahat ng phone. May mga klase din kasi ng polytones, at kapag hindi iyon para sa phone mo, baka hindi niya tanggapin. Ang Nokia 3510 ay may GPRS, MMS, at Polytone capability, iyon nga lang, dahil hanggang polytones lang siya, ay hindi siya pwede sa mga hi-fi polyphonic tones (iyung mga tinatawag na 40 polytones) at mga trutones. Ang iyong maaring gawin ay manigurado na lamang sa polytone bago magdownload.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column.

CELL LIFE

Ang Buhay ng Cellphone Ni Relly Carpio

Sira ba cellphone mo? Gaanong katanda na ba iyan? Umabot ba ng isang taon mula nung iyan ay iyong binili? Hindi? Bakit? Sa tingin mo, kasalanan mo ba o ng manufacturers ng cellphone dahil mababa ang kalidad ng kanilang pagkakagawa sa cellphone?

Sa panahon na ito na lahat ng mga elektronikong kagamitan o gadgets ay nagmumurahan at maaring mabili kahit saan, kay lehitimo, o hindi lehitimong mga taga-benta; ang dapat tuunan ng isang mamimili ng mga gadget, mapa cellphone o anupaman ay iyung maasahan na matibay at may warranty. Madaling magsalita na mas matibay ang isang cellphone kumpara sa isa, pero hindi lang iyon ang basehan. Ang dapat tingnan ay ang kabuuan ng isang gadget, dahil maraming mapapagpilian diyan. Tingnan ang sumusunod: affordability, battery life, dust resistance, functions, shock resistance, splash resistance, signal range, stylishness, usability at value. Kung ang cellphone na inyong pipiliin ay mas madami sa mga nabanggit na iyan mas okay siya.

Mas mahal minsan magpaayos ng isang gadget kaysa ang bumili ng bago. Hindi dahil nanloloko ang mga kumpanya na gumagawa ng mga ito subalit ganoon na talaga kasi ang ihip ng hangin ngayon sa industriya ng gadgets. Sobrang bilis ng pagdating ng makabagong teknolohiya na mas kikita sila sa pag benta ng bagong mga model kaysa ayusin ng ayusin ang mga nasisirang mga luma. Disposable Products ang minsang bansag sa mga gadgets na nabibili ngayon.

At dahil nga dito, ay maganda na kapag ikaw ay bumili ng cellphone ay basahing mabuti ang manual, kahit na hindi cellphone, mapaanumang gadget pa ito. At huwag mong sabihin na hindi mo maintindihan dahil Ingles. Kasi may tagalog na manual na kasama ang kadamihan ng cellphone ngayon. Nasa manual ang maraming mga tips at impormasyon ukol sa inyong cellphone na makakatulong para di lamang tumagal ang buhay nito ngunit paano rin ninyo magagamit ng mabuti ang lahat ng functions o mga nagagawa ng inyong cellphone.

Kapapalit ko lamang ng cellphone nitong magpasko. Ang huli kong cellphone ay tumagal ng tatlong taon mula nung binili ko ito nung Disyembre ng 2001. Pero hanggang ngayon ay gamit pa rin ito ng asking asawa. Mahina na ang baterya at medyo gusgusin na ang hitsura, pero oks pa rin naman. Kapag pinalitan ko ang housing niyon at ng baterya eh malaking tsansa na parang bago pa rin iyon.

Ang aking mga cellphone ay aking binili mula sa authorized dealers sa mall. Kahit na mas mahal ang mga ito kaysa sa mga reconditioned o "GSM" (Galing Sa Magnanakaw) na cellphones ay nakasisiguro naman ako na ang mga unit na ito ay may warranty o garantiya na kapag nagkasira ito sa loob ng isang taon ay libre ang magiging paayos. Mas importante na nakakasiguro ka sa cellphone kaysa makamura pero palpakin ka naman.

Siyempre hindi ko na kailangang sabihin sa inyo na iwasan na mabagsak, palanguyin, isawsaw sa sabaw ng sinigang, ipasagasa sa kotse, o pangatngat sa aso ang cellphone. Mga bagay na ginawa na ng aking mga kaibigan sa kanilang mga cellphone dahil sinusukat nila ang kanilang katangahan. Kasi, maaring masira ang cellphone dahil sa ganyang pagtrato; at baka hindi saklaw ng inyong warranty iyan.

~0~0~0~0~0~0~0~

Q: Gud PM. Ano po ang problema dito sa Nokia 3210 ko bakit ayaw na itong magrecharge; mag charged sandali lang mahinto na at one bar pa rin. Thanks - Dong

Dalawang problema lang po iyan, maaring diskargado na ang inyong baterya, anim na buwan lang po kasi ang warranty ng mga cellphone batteries at makatapos ang panahon na iyon ay lumiliit na po ang kapasidad niyan o kaya ay grounded na ang inyong cellphone kaya po kahit na magcharge kayo ay di na umaabot sa baterya o hindi na niya nagagamit ng lubos ang charge. Patingnan po sa isang authorized service center.

~0~0~0~0~0~0~0~

Comment mula sa isang mambabasa: Ganda ng topic mo noong (July 16, 2005), eto talaga ang matagal ko na sanang gustong itanong sayo. Keep up the good work. God Bless!

Salamat po sa inyong nakakatabang puso na comment. Kami po dito sa WALASTECH! at PM ay masaya na kayo ay mapaglingkuran. Nais po kasi ng column na ito ang matulungan ang ating mga kababayan para matututo tungkol sa Information and Communications Technology at kung paano natin ito magagamit upang mapaganda ang ating mga buhay.

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column.

VALUE ADDED SERVICES

Value Added Services Ni Relly Carpio

Mabuhay! At magandang PM sa inyo! Madaming nagtetext sa akin na sila ay nagkakaproblema sa kanilang mga nadodownload, na sila ay pinapadalhan araw araw ng mga logo o whatever at nauubos ang kanilang load dahil hindi nila alam patigilin ito.

Eto ha...ganito patigilin ang mga hindi nyo na gustong download: tumawag sa inyong network provider. From any Globe Handyphone, dial 211, from any Smart Cellphone dial *888, at from any Sun Cellphone dial 200. Sundin ang mga instructions at kumausap ng customer service representative. Intayin nyo, libre iyang tawag na yan, at sabihin ang problema niyo. Kung magaatubili kayo eh hindi matatapos problema niyo.

Hindi kasi pwede na basta ibigay ko sa inyo ang lahat ng deactivation codes ng lahat ng VAS ng lahat ng network providers diba? Medyo kukulangin kami ng papel. Pinakamaganda ang tumawag kayo kasi kada pangyayari na ganito ay iba-iba. Mababait naman ang mga customer service representatives eh. O! Tawag na, nas matapos na ang pagdudusa!

~0~0~0~0~0~0~0~

Lahat ng mga free ringtones, free logo, free whatever na inyong nadodownload ay tinatawag na Value Added Services. At kahit na madami dito ay libre, mayroon din na binibili kada download.

Ang mga gumagawa ng mga ito, ay tinatawag na content providers. Sila ay mga maliliit na kumpanya na kumikita lamang sa dami ng nagdodownload ng kanilang mga ginagawa. Mayroon din na content department ang mga network providers tulad ng Globe at Smart pero iyung talagang malalaki ay iyung mga independent.

Ang content providers ang siyang gumagawa ng lahat ng logo, picture message, animated picture, wallpaper, animated wallpaper, screensaver, monotones, polytones, trutones, themes, games at videos na inyong dinodownload at pinagpapasapasahan.

Ang kada download ay may bayad na nagsisimula sa 2.50 para sa mga lumang logo, hanggang 50 for games. Ngayon, di ko na siguro kailangang sabihin na mag-ingat sa pagdownload kasi isang maling pindot mo eh...goodbye bente!

Q: Hi gud am po, sa bumubuo ng WALASTECH. Tanong ko lang po, bakit laging nag tetext sa akin ang smart kahit di naman ako nag rerequest. Nauubusan tuloy load ko, kahit di pa ko nakakapagtext.

Ganyan talaga pag may cellphone ka, may commercial pa rin, siyempre paano mo malalaman kung may special offer ang iyong network provider kung hindi nila sasabihin sa atin diba? Tapos sasama loob natin kapag huli nating nalaman at patapos na. Ngayon, sabi mo nauubos ang text mo, baka may napagsubscriban ka na VAS o Value Added Service. Tinanong namin ang Smart at ang sabi nila ay:

"If he is referring to Smart/CP SMS updates on promos, vas, events and the like, all he has to do is text STOP ALERT to 211. This is actually in compliance with NTC Memorandum Circular No. 03-03-2005 re: Rules and Regulations on Broadcast Messaging.

If subscriber wants to unsubscribe from a VAS that he has subscribed to, he should text STOP to the access number of the service he is subscribed to. Hope these helps."

O naintindihan mo iyon? Sa susunod na magtext sa iyo iyung nagpapadala ng umuubos ng load mo, mag reply ka ng STOP at ipadala mo duon sa number na nagpadala sa iyo, ok? At kung nakukulitan ka sa kanilang mga free announcements eh sundin mo iyung nasa taas.

Q: Tuwing may dodownload po ako ng rintones eh wala po akong narerecieve pero nababawasan ang load ko. Cell po ba ang may problema? Tnx po sa Walastech.

Oo, baka ang cellphone mo ay hindi nakakatanggap ng ganitong mga datos o VAS. Hindi kasi lahat ng VAS na gawa ng content providers ay para sa lahat ng cellphone. Namimili din iyon ng cellphone. Depende kasi sa demand iyan, kung mas madaming mga Nokia users ang nagdo-download, eh di sila ang mapapagbigyan diba? Pwede rin na natatanggap mo, pero hindi mo nakikita, lalo na kung ang gamit mo ay naka-Symbian OS, tulad ng 6600 at 7650 na kapag nagdownload ay nilalagay sa ibang folder minsan (kadalasan sa downloads folder).

Pero, kung hindi ka naman nakaganoon na cellphone eh, halimbawa ako, araw araw ay may natatanggap ako ng free ringtones at kung ano-ano, kaso...hay nako, hindi naiintindihan ng aking cellphone, kaya sorry na lang ako. Minsan kahit WALASTECH! ka eh minamalas pa rin.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.