WALASTECH 044 - NEW EVAT

ANG KATOTOHANAN NG BAGONG VAT Ni Relly Carpio

Noong nakaraang linggo ay nagpameeting ang Computer Manufacturers, Distributors and Dealers Association of the Philippines o COMDDAP. Sila ang organisasayon ng mga primerong kumpanya na siyang nagbebenta ng mga produkto at serbisyong saklaw ng mga computer.

Nagimbita sila ng mga ilang miyembro ng media at ipinakinig sa amin ang presentasyon ni Atty. Ruel Soriano ng Quiason Makalintal Barot Torres & Ibarra Law Firm. Siya ay isang eksperto sa taxation law. Siya ay nagsalita tungkol sa bagong E-VAT law na siyang naka binbin ngayon sa Korte Supremo.

Ayon sa kanilang speaker ay dahil sa bagong VAT ay siguradong tataas lahat ng presyo ng mga apektadong produkto. At dahil saklaw ng bagong batas na ito ang kadamihan sa mga ICT companies ay siguradong tataas ang mga presyo ng mga ICT products and services. Bagong pahirap na naman. Maliban kung maayos at maamendiyahan ang batas para hindi maging malaki ang dagok sa mga kumpanya para hindi ito maipasa sa ating mga consumer.

Ayon kay COMDDAP President Wesley Ngo maaring tumaas ng hanggang 6% ang lahat ng presyo ng mga computer parts and services dahil sa bagong E-VAT law. At sabi naman ni Atty. Soriano ay siguradong magtataas ng mga business margins ang mga kumpanya para lamang mabawi ang kanilang ginastos.

Pero totoo nga, sa bagong batas na ito ay kikita ng malaki ang gobyerno, at dahil dito ay bababa ang budget deficit natin. Pero ang kinakatakot ng COMDDAP, at siya namang sinangayunan ni Atty. Soriano ay baka dahil sa pagtaas ng mga taxes na ito ay mawalan na ng mga kumpanya na siyang magnenegosyo dito sa Pilipinas.

Sana nga ay maayos ng ating mga mambabatas at ng ating mga huwes itong bill na ito at sana ay dinggin nila ang hinaing ng ICT sector na siyang isa sa ating mga inaasahan ngayon na magaangat sa ating bansa mula sa kahirapan.

Di kaya masyado nating minamadali ang pag-ayos ng budget kapalit ng kawalan ng investors at ng mga trabaho? Ito nga lang ba ang paraan para maayos ang ating budget deficit? Tama ba na ang tuunan ng pansin ng ating mga mambabatas ay ang pagpataw ng bagong buwis sa pangangalakal ng mga lehitimong kumpanya imbis na ang paghabol sa mga asogeng smugglers na dapat parusahan?

-0-0-0-0-0-0-0-

Isang sobrang simpleng halimbawa: Sa bagong VAT ay madadagdagan ng 2% pa lahat ng business transactions; at madadagdagan ng 6% ang presyo ng mga computer products and services.

Dagdag 8% ang presyo ng lahat ng text at tawag. Papayag kaya kayo na mas lumaki ang text sa piso?

-0-0-0-0-0-0-0-

TANONG: Palagay mo may sweldo ang training ng call center rep?

SAGOT: Hindi lang po palagay, alam ko na meron po. Pero hanggang nasa training ka ay ang tawag lang dito ay stipend o allowance. Pero hindi na rin biro ito dahil minsan ay nasa 14,000 pesos a month ang kanilang binibigay na allowance.

TANONG: Meron po ba kayung alam na trabaho na sa bahay lang? Tulad po ng online typist? May computer at internet po kasi ako dito sa bahay. Gusto ko po sa bahay na lang magtrabaho. Lourdes

SAGOT: Meron po akong naririnig na ganiyan, at mayroon nga akong pamangkin na nagsabi sa akin na ganyan ang kanyang trabaho noon. Ngunit iyung kanyang nakuhang kliyente ay isang doktor na ipinatra-transcribe iyung kaniyang mga audio records. Mayroon niyan kaso kailangang hanapin mo din sa internet. May mga call centers na itatayo pa lamang gamit ang teknolohiya ng Voice Over IP o VOIP na iyan ang service. Isa na dito ang Five9 Call Center.

TANONG: Willing po ako mag undergo ng speech training, I live here in Parañaque, please give me call center company where I can apply. TY and God Bless. Rachel del Rosario

SAGOT: Ang suwerte mo naman Ms. Del Rosario dahil kadamihan ng mga call centers ay nasa South ng Metro Manila. Ang Libis lang ang nasa bandang North ng Metro Manila, at iyon ay nasa East side pa. Try nyo po maghanap sa Alabang at sa Makati. Kung gusto ninyong mas malayo ng kaunti ay naindiyan ang ortigas. Lima po ang sentro ng mga contact center companies dito sa Pilipinas: Libis, Ortigas, Makati, Alabang, and Cebu. Sabi nila ay susunod daw ang mga lugar ng Subic at Clark na dati nang may mga contact center; at sa far South ay ang Cagayan de Oro at Davao.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

WALASTECH 043 - HIYA AT YABANG

HIYA AT YABANG Ni Relly Carpio

Naiintindihan ng Team WALASTECH kung gaanong kahirap na matuto ng mga bagong bagay. Madalas kasi ay nauuna ang hiya at yabang. Hiya dahil ayaw mong umamin na mangmang ka sa makabagong teknolohiya. Yabang dahil gusto mong magmukhang marunong kahit hindi mo naman alam.

Natutunan ko ito dati ng ako ay sinabihan ng isang kaibigan na sobra akong magmarunong sa computers. Nang ako ay magmarunong na kaya kong sagutin kahit anong tanong tungkol sa computer ay may tinanong siya sa akin na sobrang simple pero hindi ko masagot. Hanggang ngayon, hindi ko alam kung ano sagot sa tanong na iyon, pero ang aral ng pangyayaring iyon ay nakatatak sa aking pagiisip hanggang sa ngayon.

"Oh eh anong kadramahan naman ito?" Ika nyo. Simple lang: Minsan matagal ang sagot namin sa inyo dahil maski kami ay hindi namin alam ang sagot. Hinahanap pa namin ang tamang sagot sa inyong katanungan. Hindi kasi kami pwedeng mahiya at hindi kayo sagutin, o magyabang at magkunwari, dahil ang aming ginagawa ay isang serbisyo sa inyo aming mga mambabasa at hindi namin pwedeng isantabi ang inyong pagtitiwala. Kaya sa mga naiinip sa aming mga kasagutan sa inyong tanong, muli, kaunting pasensiya.

-0-0-0-0-0-0-0-

TANONG: Ask ko lang kung ano problem ng PC ko kasi laging naghahang. Im in a middle of something tapos biglang magrereset, winXP ang OS ko, 160 MB RAM.

SAGOT: Marami pong maaring dahilan kung bakit naghahang at negrereset ang isang computer. isa na diyan ay baka ang OS ninyo na ininstall ay kulang sa tinatawag na security and version upgrades. Magconnect po kayo sa internet at idownload itong mga ito. Pwede rin po na masyadong mababa ang inyong RAM. Mas maganda kung nasa 256 Megabytes na RAM na kayo kapag naka Windows XP kayo. O kaya ay masyadong mababa ang clock speed ng inyong processor. marami po talagang mga rason kung bakit magkakaganyan ang inyong computer. Ang pinakamaganda ay kung nasa warranty pa iyan ay tumawag kayo sa inyong pinagbilhan at iparepair, kung wala naman ay maghanap na ng mapapagkatiwalaan na technician at patingnan ang inyong unit.

TANONG: Ako po si louie tatanong ko lang kung paano ipablock yung phone ko 7610 poh yung fone ko naholdap po kasi ako...

SAGOT: Tatlo pong bagay ang kailangan ninyo: ang IMEI number ng inyong phone, ang resibo na nagpapatunay na kayo ang bumili ng phone, at isang pulis report na may kaakibat na notarized notice of loss through theft ang inyong cellphone. Dalhin po ito sa quick action center ng National Telecommunications Commission sa NTC Bldg., BIR Road, East Triangle, Diliman, Quezon City. Maari niyo po silang tawagan sa 9267722 o i-email sa ntc@ntc.gov.ph para sa karagdagang kaalaman.

Kapag napatunayan nila na kayo po talaga ang mayari ng cellphone ay kanila pong ipapablock ang IMEI number nito at hindi na ito magagamit uli. Pero tulad ng sabi namin ay may merong mga asoge diyan na nagpapalit ng IMEI number ng mga nakaw na cellphone. Tubuan sana sila ng kulugo sa ano...

TANONG: Pwede ko ba pa-upgrade ung KB or kilobytes ng cell unit ko kasi masyado na po siyang mababa built in cam po kasi siya. Thanks.

SAGOT: May nakapagsabi sa akin na may mga technician na ginagawa iyan, pero sa aking tingin ay ito ay delikado dahil hindi naman dinesign ang cellphone na inyong binili para gumamit ng ganoong kalaking memory, di lamang sinisira ng upgrade na ito ang warranty ng inyong cellphone pero maari din itong maging sanhi ng pagkasira ng inyong cellphone mismo.

Ang pinakamagandang solusyon dito ay ipatransfer na lang ang pictures mula sa inyong cellphone via infrared o bluetooth sa computer. May mga nabibiling external infrared interface para sa mga computer na may kasama nang software, nang sa gayon ay hindi na magiging issue ang maliit na memory ng inyong cell. Magtanong lamang sa mga mapapagkatiwalaang computer shop.

TANONG: Paano po makakabili ng 2 SIM card na pareho number niya? At kung may text message pareho sila tanggap. Thanks.

SAGOT: Wala pong ganoon dahil mula ng magkaroon ng GSM network dito sa Pilipinas ay nasugpo na ang cloning na siyang naging problema ng sinaunang cellphone system sa ating bansa. Hindi po legal ang magkaroon ng clone SIM. At iyung may mga back-up SIM tulad ng sa mga premium accounts ng mga network providers ay isang SIM lang ang maaring gamitin sa anumang oras.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-043-

walastech 042 - VALUE ADDED SAKIT NG ULO

VALUE ADDED SAKIT NG ULO Ni Relly Carpio

VALUE Added Services, andaming nayayamot sa kanila pero kung wala naman sila eh di ang boring ng ating mga cellphone. Alam mo naman kasi ang pinoy, kailangan palaging unique. Tingnan mo na lang ang mga pampasaherong jeepney sa daan, may magkapareho ba? Wala diba? Sa cellphone pa kaya eh papayag ka?

Asus! Hipokrito! Kunwari pa ito. Aminin mo na, hindi mo lang alam paano baguhin iyan kaya iyang kalembang ng sorbetero pa rin ang ringtone mo. Iyan ang nakakayamot sa mga VAS at sa mga content providers, love -hate relationship tayong mga subscribers sa kanila, kasi minsan trip na trip natin ang gawa nila, minsan naman pakiramdam natin ay naloko tayo. Kasi nga naman hindi katunog ng Spaghetti Song iyung MIDI na sabi nila ay Spaghetti Song, o ang labo nung mukha sa wallpaper ni Aubrey Miles! Pero pag swak naman eh halos sambahin natin sila kasi "Ang cool ng cellphone ko!"

-0-0-0-0-0-0-0-

TANONG: Bakit minsan sobra delay kung dumating yung mga text sa akin? Halimbawa may text sa akin ng umaga, dating siya hapon na. Sa unit po ba ang problema or sa network provider? alen of pcg

SAGOT: Pareho po. Sa cellphone po ang solusyon na mas madali para bumilis ang pagpadala at paghandle ng messages ng network provider. Mayroon pong tinatawag na message center ang mga network provider. Mayroon po silang inilalaan na dami ng users sa kada message center number at server. Kapag sobrang dami na po ng gumagamit ng number na iyon ay maco-congest na po ito at babagal na sa paghandle ng messages. Tumawag lamang po sa network provider at humingi ng bagong message center number na iyong ipapalit sa dati na nasa message settings ng inyong phone lamang.

May solusyon din mula sa network providers iyon naman po ay i-expand at i-upgrade ang kanilang systems para makahandle ng mas madaming messages. Hindi po naman namin sinasabi na nagkukulang ang network providers. Hindi biro ang kanilang ginagawa na hayaang makapagtext ang halos 40 milyong Pilipino araw-araw. Hanggang ngayon po ay SMS capital of the world pa rin tayo dahil sa kanilang serbisyo.

TANONG: May I ask kung paano ide-deactivate yung VAS na aking ipinaoff na pero tumutuloy pa rin. Nagpadala na sila ng text na hindi na daw ako makakareceive pero kinabukasan ay mayroon uli. Di tuloy ako makapagload ng 300 kasi mauubos lang ito kaagad kung araw araw mababawasan ng 2.50. I hope you can help me with your problem.

SAGOT: Actually kung araw-araw ay 2.50 lang ang mababawas sa iyung load ay aabot ito ng 120 days. Mauunang mage-expire ang load mo at 60 days bago ito maubos. Pero oo naiintindihan ko yamot mo, dahil hindi ka nag-iisa, andaming nagte-text ng ganitong problem. Bweno, kung ito ay nangyayari sa inyo, ito ang the best: tumawag sa inyong network provider at magfile ng formal complaint thru their toll free numbers.

Mayroon pong over 1000 content providers na gumagawa ng VAS at ibinebenta sa mga over 30 million subscribers ng mga cellphones. Ang usapan po ng kita sa kanila ay padamihan ng magdo-download. Mayroong pagkakataon na nagkakaproblema sa system at hindi agad natatanggal sa lista ang inyong subscriptions, kaya napapadalan pa rin kayo.

May isa akong source na nagsabi na may iba na nananadya at kapag nahuli ay kamot ulong magsosori at saka lang aaksiyunan ang pagtanggal ng subscription pero wala na pera mo. Walang balikan, kasi hindi ka nga naman pwedeng magsampa ng kaso dahil mas mababa ng 5000 pesos ang usapan, na ayon sa ating batas ay siyang kailangang malampasan para magkaroon ng lehitimong kaso.

At ano ngayon kung mayamot ka? Eh di lumipat ka ng network! Isa ka lang sa milyon-milyon! Diba? Kaasar ano? Pero pag nagfile ka ng formal complaint, magkakaroon ng paper evidence na ayaw na ayaw ng mga asoge na iyan, kaya maaksiyunan na. Mahirap na nga namang magkaisa lahat ng mga ina-asoge nila at kasuhan sila diba?

-0-0-0-0-0-0-0-

Doon sa mga nagrequest na ilathala po namin muli ang impormasyon tungkol sa single SIM load business na PinoyGSM reLoad, eto po: pwede po kayong tumawag sa numerong 4396422. Ang kanilang opisina ay pwedeng bisitahin sa 309 Consolacion Bldg, Araneta Center, Cubao, Quezon City. Sa mga gumagamit ng Internet, pwede din pong puntahan ang kanilang website sa http://www.pinoygsm.com o sulatan sila sa hello@pinoygsm.com via email.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-042-

walastech 041 - how to make a resume

ANG RESUME Ni Relly Carpio

MADALAS kung nag-a-apply sa trabaho ang kailangan lang ay magpuno ng bio-data at magdala ng NBI Clearance tapos ito ay ipasa sa kumpanya na inaaplayan. Pero pagdating sa pag-apply sa mga trabaho na mas malaki ang kita, o kaya ay iyung nasa corporate na setting tulad ng mga opisina, ang paggamit ng Resume (basahin na re-siyu-mey) ay siyang dapat na gawain. Lalo na kapag ang inaaplayan ay isang ICT field job tulad ng call center.

Ang Resume ay nilalaman ang lahat ng makikita sa bio-data, at iba pa. Ang siyang pinakamadalas na dagdag sa resume ay iyung mga tungkol sa iyo na dapat malaman ng company kung saan ka nag-apply. Ano naman ang pakialam ng isang kumpanya kung anim na taon kang janitor kung ang habol mong trabaho ay data encoder? Ano connect non?

At hindi pang lahatang application ang resume, di tulad ng biodata. Kada klase ng trabaho na ina-applyan mo ay kailangan ng ibang klaseng resume. Putting your best foot forward ika nga.

Ayon sa isang article, may apat na bagay na dapat mong palaging ilagay sa resume mo ito ay ang: volunteerism, association memberships, computer proficiency, at mga ibang linguahe na iyong alam.

Iyung volunteerism ay iyung mga ginawa mong volunteer work kahit saan, kesa sa barangay, Red Cross, simbahan, o iskwela. Ang memberships naman ay iyung mga religious groups, clubs, o chuva na iyung kinasasalihan. Oks nga naman iyon diba? Dahil malalaman ng kumpanya na ikaw ay isang responsableng mamamayan, hindi isang patay-gutom na tambay diba?

Sa computer proficiency, isulat mo lahat ng program na alam mong gamitin sa computer. Huwag kang mahiya kung Word at Windows 98 lang ang alam mo, buti nga may alam ka eh. Kasi lalo na sa corporate ay lubhang importante kung marunong kang magcomputer, kahit na iyung patype-type lang.

Sa other languages ay swak agad tayo kasi karamihan sa mga Pinoy ay tri-lingual! Tatlong linguahe: Filipino, English at mamili ka na--Ilonggo, Cebuano, Panggalatok, Zambal, atbp.

Ang madalas na pagkakaayos ay ganito: Objective - sabihin kung anong klaseng trabaho at posisyon ang iyong hanap at kung bakit ikaw ang swak sa trabaho na iyon. Sunod ay Experience - iyung mga napagdaanan mo na mga trabaho, simulan mula sa may kinalaman sa inaaplayan! At kahit na gaanong kaliit na trabaho, basta marangal, isama mo. Ikatlo, Education - huwag mo nang isama ang grade school, mula highschool na lang at pati iyung mga special electives at vocational courses isama mo. Huli ang Other Skills/Information - kaya mo bang mag balance sa gulaman at ngumuya ng barbed wire? Dito iyan at ang ibang pang bio-data na datos, pati na rin iyung mga binanggit kanina na computer o language skills at associations o memberships.

Gumamit ng mga Action Words kung tawagin. Mga salita tulad ng: team work/player, multi-tasking, executed, organized, performed, maintained, supervised, managed, directed, developed, implemented. At siguraduhin na maayos ang tenses at concise ang pagsulat, resume ito, hindi nobela. Huwag kalimutan ang maayos na punctuation! Magpatulong sa kakilala na magaling sa ispokening dollar.

-0-0-0-0-0-0-0-

TANONG: Bakit di nakakareceive ng tones or pic messages yung phone ko? Kaya ang laki ng gastos ko sa load kadalasan kasi puro download lang ako. Ang mga narereceive ko na pic messages ang lumalabas lang ay "0" o "?" Pero nakakareceive naman ako ng MMS.

SAGOT: Hindi po lahat ng mga VAS content na ginagawa ng mga content providers ay para sa lahat ng telepono. Obviously, kung ang market share ng cellphones ay mostly NOKIA eh di sila ang igagawa ng content. Kaya madalas, kung ibang brand ang cellphone mo, ay sorry ka na lang, di ito marerecognize o paling ang sizing pag nakuha mo man.

The best ay magsurf na lang thru WAP at mula doon magdownload kaysa sa mga codes na nakikita sa mga ad sa diyaryo o sa TV kasi madalas pang NOKIA iyung mga iyon. Or magpunta sa mga stall na nagbebenta ng content at sa kanila bumili. At least kung hindi tumakbo sa cell mo ay pwedeng balik bayad. Mamumuti mata mo sa kakakintay kung magcocomplain ka sa networks pag na-asoge ka na ng mga content providers.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue. Halaw ang mga tips mula sa Resume Writing 101 na article mula sa www.collegeboard.com.

-041-

walastech 040 - Original sim

ORIGINAL SIM Ni Relly Carpio

Ang SIM ang tinatawag na utak ng iyong cellphone. Siya ang nakakaalam ng iyong phone number, siya ang tinatawagan ng iyong mga kaibigan at siya ang nagtatago ng lahat ng number ng iyong mga ka-text. Siya rin ang nagtatabi ng mga text mo.

Masaklap ang masiraan ng SIM. Para ka na ring nawalan ng cell o para ka na ring nawala sa mundo dahil sa mga mawawala sa iyo. Importante na alagaan ang SIM nyo. Iwasan na ito ay magasgas o madikit sa mga magnet.

-0-0-0-0-0-0-0-

TANONG: Good PM sir, gaano po ba katagal bago masira ang isang SIM Card?

SAGOT: Kapag na-program na ang SIM card ay mayroon itong standby time na umaabot ng dalawang taon bago ito mag-expire. Kaya pag bumibili kayo ng bagong SIM card ay mayroong nakadikit dito na sticker na may "Use By: <date>." Kapag ang SIM ay hindi na-activate by this date, ay ito'y matatanggal na mula sa network. Kapag na-activate naman ay ito ay magkakaroon ng two months expiry period na permanente.

Kung sa loob ng two months na ito ay walang load ang SIM o two months ito na hindi tumawag o nagpadala ng text ay ide-deactivate ito ng network. Kapag ang isang SIM ay na-deactivate ay hindi na ito muling i-activate muli.

Kaya siguraduhin na may load ang inyong SIM at gamitin ito kahit minsan sa loob ng dalawang buwan.

TANONG: Good AM po! Ask ko lang po kung masisira ba ang cell pag pinalitan ng SIMcard? Tnx.

SAGOT: Hindi po. Ang GSM cellphones ay designed na gamitan ng kahit ilang SIM cards. Madalas nga lang na ang cellphones ay locked lamang sa isang network provider ng bansa na inyong pinagbilhan nito. Pero pwede namang ipa-openline at mayroon din naman na nabibili na mga openline na phones. Ang problema lang ay may mga phones na kapag nilagyan ng bagong SIM ay kinokopya agad ang telephone numbers na naka-save sa loob nito sa internal phonebook niya. Magkakahalo-halo ang mga telephone numbers ng inyong mga SIM.

Also, medyo sensitive ang mga SIM at kapag palit ng palit ay maaring ang SIM ay magasgas at masira. Mabilis ding makaubos ng battery time ang pag-bukas sara ng cellphone dahil sa kababasa nito sa SIM.

TANONG: Sir bakit kaya insert card ang nag appear sa cellphone ko tapos pag binalik, wala ang signal, pag bumalik ang signal oks na ulit, then balik back again to insert card, God Bless.

SAGOT: Dalawa lang po iyan, either sira na po ang dock ng inyong SIM card, iyon po iyung pinaglalagyan ng SIM card, o kaya ay sira na po ang SIM ninyo at nagluluko na iyung chip niya kaya hindi masyado mabasa nung cellphone.

Testingin nyo po ang cell nyo with a different cell o testingin ninyo ang inyong SIM sa ibang cellphone para malaman kung alin ang sira. Madali naman pong ayusin pareho iyan dahil kung iyung SIM ay bumili na lang kayo ng bago, kung iyung cell naman ay baka kailangan lang linisin ang connectors ng SIM dock. Nagkakaroon po kasi ng umido ang mga connectors ng cellphone pagkatagalan dahil madami po diyan ay gawa sa tanso lamang.

TANONG: Good PM po! Tanong ko lang po kung pwede po i-upgrade itong Nokia 5110 para magkaroon ng SMART Menu. Thank you and more power.

SAGOT: Meron po na pang SMART Menu ang lahat ng cellphones. Ang tawag po diyan ay SIM Services Menu. Kaso, dahil medyo luma na po ang Nokia 5110 ay namimili na po siya ng SIM type. Baka po bago ang gamit ninyong SIM (mga later 128k o mga bagong 256k), at baka incompatible na ito sa Nokia 5110. Network dependent po kasi ang paglabas ng SIM Services Menu. Either mag downgrade kayo ng SIM o mag upgrade ng phone. Mas suggest po namin iyung magbago ng phone dahil hindi na po masyadong supportado ang Nokia 5110.

-0-0-0-0-0-0-0-

PAPA DOIE'S TIP OF THE DAY: Kapag nagpapaayos ng cellphone bantayan ng mabuti lalo na pag hindi kakilala ang nag-aayos. May raket ang iba na kunyari ay may mahuhulog na parte ang cellphone mo, pagpulot nila ay nasalisihan ka na. "Ay nahulog..." sabay pulot ng ibang part na nakatago sa kanyang kandungan. Iyon na ang magiging sunod-sunod na pagkasira ng iyong cellphone at pabalik-balik na paayos. Maging alisto ng hindi maloko.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-040-

WALASTECH 039 - MERRY CHRISTMAS

MERRY CHRISTMAS Ni Relly Carpio

Hindi maaring ikaila na malapit na naman ang pasko, ang lamig na at heto nga at ako'y nagkasakit na nitong nakaraang mga araw dahil sa pabagobagong ihip ng hangin. Pero medyo masaya na rin ako dahil ang ibig sabihin nito ay malapit na Pasko!

At ang ibig sabihin noon para sa ating mga techies ay discounted prices on all of our favorite stuff!!! Pag pasko mas mura ang mga cellphones, MP3 players, lahat!!! Kaya sa inyong mga naghahanap na bumili ng cellphones eh mag-ipon ipon na kayo hane? Dalawang buwan na lang.

Tungkol diyan sa pagbili ng cellphones, may mga nagtatanong tungkol diyan. Sa palagay ng WALASTECH! ay ang pinakamaganda ay bumili ka ng brandnew mula sa mga network providers at sa manufacturers. Kasi, value for money sila. Kapag sa kanila ka bumili ay may warranty sigurado ang inyong binili, at pag ito ay nasira ay madali mong mapapaayos at mapapalitan kung kailangan.

Kung hindi kaya ng budget ay naandiyan ang tinatawag na graymarket. Dito mabibili ang mga secondhand (may dating may-ari at ibinenta o sinangla), refurbished (may sira dati, inayos at binebenta muli), reconditioned(may sira o wala dati, inayos at binebenta uli ng halos brandnew ang presyo). Lahat ng mga ito ay mas mababa ang presyo kaysa sa mga unit na galing sa network providers na bago. Pero dahil nga ang mga ito ay maaring gamit na ay mas malaki ang tsansa na baka ito ay masira muli. Ang masakit, wala nang warranty ang mga ito kaya nasasa nagbebenta na lamang ang inyong pag-asa pag nasira ito bigla.

Ang masakit ay iyung mga nagbebenta ng nakaw at smuggled. Ito iyung tinatawag na blackmarket. Mahirap nga naman malaman kung ang binebenta ng gray market ay galing sa blackmarket diba? Ito pa ang isang dapat isipin kung bibili sa graymarket. Galing ba sa nakaw ito?

Isipin ninyo siguro: "Oh eh ano ngayon? Di naman ako nanakawan eh?" Ito kasi iyon, baka buhay ang naging kapalit ng cellphone na iyan diba? Baka makarma ka pa. Paano kung pinatay iyung pinagnakawan niyan? O sinaktan? At kung tatangkiling mo ang nakaw na cellphones eh gaano katagal bago ikaw ang manakawan.

Ganito kasimple iyan: Kung walang bibili ng nakaw, walang magnanakaw. Paano mo malalaman na nakaw? Tanong mo kung pwedeng patesting bago mo bilhin, siyempre papayag iyan. I-on tapos i-type mo ang *#06# sa keypad. Ang lalabas na number ay ang IMEI ng telepono. Kung ang number na ito ay sobrang sunod-sunod, nakaw iyan.

Kung gusto mong makasigurado, at ikaw mayroong internet access i-check mo muna sa www.numberingplans.com iyung IMEI number nung cell na bibilhin mo kung wala ito sa kanilang database, nakaw ito. Kung gusto mo iapapulis mo na iyung nagbebenta...

-0-0-0-0-0-0-0-

TANONG: Good PM po, ask ko lang po kung bakit ayaw makasend o makareceive ng pics at tones ang infrared ko? Nasisira din po ba yun at napapagawa? Magkano po kaya? Nokia 3200 po unit ko. Thanks and more power. Angel of pcg

SAGOT: Tulad ng lahat ng kagamitan ay di maiiwasan na masisira din iyan. Pero maari din naman ipaayos. At hindi tulad ng ibang mga parts ng cellphone eh dapat eh mura lang iyan dahil hindi ganoong kamahal ang infrared parts. Dalhin nyo lang po sa mapapagkatiwalaang repair center.

Pero maari din po kasi na ang pinanggagalingan ng datos ay incompatible sa inyong cellphone at hindi sila nagakakaintindihan lamang, testingin muna gamit ang ibang cellphone bago dalhin sa paayusan.

-0-0-0-0-0-0-0-

Nais batiin ng TEAM WALASTECH ang aming newest member si Papa Doie. Siya ang aming expert sa aftermarket units and repair. So mula ngayon kung may gusto kayong malaman tungkol sa mga hinahanap nyo na unit o binebenta ay maari nyo na rin i-text kay Papa Doie sa WALASTECH sa SMART 09182772204! Dagdag serbisyo lang po sa inyo, aming mga giliw na mambabasa.

-0-0-0-0-0-0-0-

Sa mga interesado: Contact Center in Shaw blvd. area looking for nine call center agents. Needs to be fluent in English for the Australia and U.S. market. Please call Pia at 7268686 for more info.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-39-

walastech 038 - SIGNAL STRENGTH

SIGNAL STRENGTH Ni Relly Carpio

May mga nagtanong sa akin tungkol sa problema nila sa signal ng kanilang cellphone. Kung paano ang kanilang mga cell ay nawawalan ng signal pagdating sa kanilang kuwarto o pagdating sa ibang lugar.

Ang signal ng cellphone kasi ay base sa kung gaanong kalapit ang inyong cellphone sa cellsite. Ang cellsite ay iyung tower na bakal o iyung plastic na bloke na nasa gilid ng isang building. Kung mas malapit ka sa cellsite at kung ito ay iyung kita, mas malakas ang signal mo. Kapag napalayo ka na, at natakpan ang cellsite ay hihina na ang iyong signal. Halimbawa, kung ikaw ay nakatayo sa likod ng building ng nakaharap sa isang cellsite, mas mahina ang iyong signal kaysa kung nakaharapn ka sa cellsite. Isa ngang kakatwang bagay na maaring mangyari ay kapag tumayo ka sa ilalim ng cellsite ay baka mawalan ka pa ng signal, dahil kung tutuusin ay nakatalikod sa iyo ang mga antenna ng cellsite.

Ito ngayon ang dapat tandaan ng ninuman kapag nawawalan ka ng signal. Nawawalan ka dahil lamang sa ilang pangyayari: Una ay dahil walang cellsite na malapit sa iyo dahil ang distansiya lamang ng isang cellsite ay umaabot ng ilang kilometro lamang. Ikalawa, madaming nakaharang mula sa iyo ay cellsite, mga bagay tulad ng bundok, kabahayan, dingding, kahit nga tao lang minsan ang nakaharang eh pwede na. Ikatlo ay may sira ang cellphone mo at hindi ka na nakakasagap ng signal mula sa network providers. Ikaapat ay may problema ang network providers at nakadown ang network. Ikalima, binomba ng mga asogeng rebelde-kuno ang cellsite at ilang buwan bago ka magkasignal muli.

Kung ikaw ay medyo nahihinaan sa iyong signal ay lumakad lang papunta sa bintana, lalakas na dapat iyan. Iwasan din na takpan ang bandang itaas ng cellphone dahil dito ang antenna module para hindi humina ang signal.

-0-0-0-0-0-0-0-

TANONG: Good AM. kapag matagal na bang di nalalagyan ng load ang SIM eh nawawala ba talaga ang signal nito, halimbawa ang SMART BUDDY? Pwede ba ito mapalagyan ng signal uli? Salamat po! Bert ng QC.

SAGOT: Ang SIM ay dine-deactivate ng network providers kapag umabot na dalawang buwan na wala itong load. Kahit na sinong network provider, hindi lamang ang SMART ay ginagawa ito para mabawasan ang mga active accounts at hindi masyadong macongest ang network ng mga inactive accounts. Kung hindi ito gagawin ng mga network providers ay baka dumating ang araw na hindi na tayo makatawag o makapagtext. Ang palugit nila na dalawang buwan ay matagal na kung tutuusin. Ang SIM, once madeactivate ng network ay hindi na uli maaring i-activate. Bumili na lamang po ng bagong SIM.

TANONG: Paano namin malalaman na original ang battery at charger namin na nabili?

SAGOT: Ang pinakamaganda ay bumili sa authorized dealers lamang para siguradong-sigurado. Pero kung hindi maiiwasan ay siguraduhin lamang na ang lalagyanan ng battery o charger ay selyado, na ito ay may mga tamang selyo, holograms at branding marks. Sobrang galing na kasi ng mga namememke ngayon sa totoo lang na sobrang hirap na talagang malaman.

TANONG: How can I activate my MMS? Cellphone ko po ay Sony Ericsson T68i. Please help me. Tnx.

SAGOT: Ang pagactivate ng MMS sa isang cellphone ay dependent di lamang sa model ngunit sa network provider din. Pero ang pinakamadali ay inyong dalhin sa manufacturer shop o sa network provider mismo para sila ang mag-setup at magactivate. Medyo mahirap po kasi na ipamigay ko ang activation codes sa column. Tawagan ang customer service ng inyong network provider para sa karagdagang tulong at impormasyon.

-0-0-0-0-0-0-0-

Alam namin sa TEAM WALASTECH na ang aming IKLISAGOT sa text sa inyong mga katanungan ay medyo malabo minsan, pero minsan ay mahirap i-explain sa loob ng ilang salita ang solusyon sa inyong mga problema. Kami po ay humihingi ng paumanhin kung sa tingin ninyo ay hindi namin kayo pinagbibigyan, pero kaya nga andito itong column na ito para punan ang kulang sa aming mga kasagutan. Ang aming hiling lamang ay inyong kaunting pasensiya at pagpatuloy na pagtangkilik.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-38-

walastech 037 - ANG TAWAG NG CALL CENTERS

ANG TAWAG NG CALL CENTERS Ni Relly Carpio

Call Centers, ang leader at maaring future ng ICT industry dito sa Pilipinas. May study na booming pa rin ang industry ng call centers sa atin. Hindi problema and marketing ng product ng call center service mula sa atin dahil kumbaga sa palengke ay puro suki na ang mga kliyente natin. Ang masakit ay kulang sa supply.

Supply? Mga tao na siyang nagiging call center agents. Oo, kayo! Ayon kay Alex, isa sa aking mga colleagues, ay mayroong 75,000 na call center agents dito ngayon sa Pilipinas. Alam ninyo kung ilan pa ang kailangan? Hmm? 75,000 uli.

O ano! Gulantang kayo ano? Iniisip ninyo siguro ngayon...aba! Bakit andito ako at hindi doon nagtratrabaho at kumikita ng 12,000 kada buwan? Ito ba ang iyong rason: Kasi mahina kang mag-ingles o kaunti lang ang iyong pinagaralan? Diyan lumalabas ngayon ang sinasabi ng mga contact centers na sila ay equal opportunity workplaces. Meaning, basta willing kang matuto, kukunin ka nila.

Ganitong kasimple iyan mga kababayan. Kung handa kang matuto at magtiis para matuto, at handa kang isaalang-alang ang iyong oras para sa trabaho, pwede ka sa call center. Ano ba naman ang pagtulog mo kung ang kapalit ay dose mil?

Kailangan kasing punuan ng mga contact centers ang pangangailangan sa pinakamadaling panahon dahil kung wala silang maibibigay ay hindi magdadalawang isip ang kanilang mga kliyente na pumunta sa ibang bansa para maghanap. Sige ka andiyan lang ang India at China. Tig-isang bilyon sila doon.

Kung gusto mong matutong mag-ingles ng mabilisan para makasakay ka sa trend na ito, gawin mo lang ang ginagawa mo na ngayon, hindi ang magkamot ng tiyan, ang magbasa. Ang pagbabasa ang pinakamagandang paraan para matuto ng isang linguwahe. Ito at ang makipag-usap gamit ang linguwahe. O paano? Palitan niyo na from Cebuano ang salita sa bahay ninyo? "Hey Lito!" "Yes Mommy!" "You go to Aling Ising's store and make utang some vetsin."

Diba? Class!

-0-0-0-0-0-0-0-

TANONG: Aside from I want to get experience what is the best answer for: Why I want to work for this company?

SAGOT: I need money! Joke lang!Ü Try: I want to begin an enriching career with this company. I believe in what it stands for and the products/services that it provides. Ang job interview ay hindi nalalayo sa beauty contest, ang tamang sagot ang susi para maging winner ka lola!

TANONG: May age limit ba sa pagpasok o pag-aaply ng trabaho sa call center? Paano po kung 2 years vocational course lang ang nakuha may chance po kaya at ano po yung course na pwedeng kunin sa STI or AMA na para sa call center?

SAGOT: Iyung course na pwedeng kunin nakikipagusap pa po ang WALASTECH sa STI tungkol sa kanilang plano na ibalik ang contact center training course, pero pinaguusapan pa po iyon. Pwedeng pwede na ang vocational studies mo, kahit nga tapos ka lang ng high school pwede eh, basta willing kang matuto, seryoso ka sa trabaho at wala kang takot.

TANONG: Nabasa ko sa column nyo tungkol sa call center equal opportunity work place interesado ako I am 48 years old BSBA graduate widow of 5 kids im not fluent in english.

SAGOT: Kung nakalampas ka ng college, I'm sure kaya mong lampasan ang six months speech training nila. Iyung bayaw ko 47 nasa call center. Dati siyang engineer ng utility company.

TANONG: I wud lyk 2 ask favor if you could give me a call center company where i can apply for a part-time am 39 years old and working as telephone operator in a condo at ortigas, am a single parent of 3 children. Hope you can help me more power! anne ibanez

SAGOT: Madami pong call centers sa Ortigas area. Magtanong-tanong lang po kayo at siguradong malalaman ninyo iyung mga call centers na nakakalat diyan. Tapos po ay mag-apply na agad kayo, in-short habang umiikot ay may dala na dapat kayong resume.

-0-0-0-0-0-0-0-

Ito ay padala ng isang reader, ang attitude niya ang magandang gayahin ng lahat na gustong magtrabaho sa call center: Kaya ko yon kahit age 40 na ako! Sharp memory ko at magalang ako magsalita! Jojo 2nd yr journalism course

Mabuhay ka Jojo, ang mga tulad mo ang mag-aangat sa bansa natin mula sa mga asoge na gustong pumatay dito.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-37-

NETWORK PROBLEMS

MGA PROBLEMA SA NETWORK Ni Relly Carpio

KAMUSTA na mga kababayan? Sarap ba ng bakasyon kahapon? Nitong mga nakaraang araw ay madami kaming nakuha na text na problema sa ibang mga network, kaya naisip ng TEAM WALASTECH na sagutin ang mga tanong tungkol sa network problems ngayong issue na ito.

-0-0-0-0-0-0-0-

Ang Network ay ang siyang ginagamit ng mga cellphone para ito ay makapagcommunicate sa ibang mga cellphone sa loob din ng network at sa mga cellphone sa ibang mga network. Kumikita ang Network providers sa pagbebenta ng service na ito sa kanilang mga subscribers. Ito ang inyong binabayaran kada kumukuha kayo ng load o ng prepaid card, ang serbisyo na ipapadala ng Network Provider ang inyong text at papayagan kayong makipagusap sa telepono.

Masalimuot ang pagiging Network Provider: kada may masamang mangyari sa cellphone, mawalan ng signal, magkaproblema sa pagtawag, ay nasa dulo agad ng mura ang pangalan mo. Tulad ng pagiging isang kolumnista. May masabi ka lang na mali...

-0-0-0-0-0-0-0-

TANONG: Can my text message to my textmates be read by another cellphone or be directed to my wife's cellphone without my knowledge? Pwede ba sya makapakinig ng usapan namin ng katext ko? Thanks.

SAGOT: Una, ang magandang solusyon ay huwag ka nang mang chicks tol. Baka paggising mo isang araw eh putol na ang antenna module mo hane? Pero tulad ng problema sa "Hello Garci" chuva-ek na iyan, medyo mahirap gawin iyung mag-tap ng cellphone ng wala kang kagamitan na espesyal. Sabi nga ng isang network provider, isang judicial order lamang ang makapagpipilit sa kanila na ipakita ang call records ng isang subscriber. Call records lang iyon ha, hindi iyung payagang mag-tap in sa calls.

Ngayon, tulad ng sinabi ko sa iyo nung pinadalhan kita ng IKLISAGOT sa text, kailangang kopyahin ni misis ang iyong SIM para magawa niya iyon. Kapag nagawa niya iyon ay makukuha niya lahat ng text at calls mo ng walang hirap. Naging malaking problema iyan noong panahon bago maging GSM ang networks ng cellphones. Iyung tinatawag na cellphone cloning kung saan kinokopya ang identity ng isang SIM para may ibang makagamit ng number pero hindi siya ang magbabayad. Bagkus ang ninakawan ng number.

Ops! Huwag kayong magpanic. Hindi clonable ang GSM SIMs ng mga current Network Providers. Halos impossible iyon, dahil kailangan ng consent ng Network Provider thru a legal court order para magawa iyon. May kaibigan ba na huwes ang asawa mo?

TANONG: Good PM po! Tanong ko lang po kung paano magpablock ng cellphone kasi nanakaw ang cellphone ko noong Sunday. Paano pls?

SAGOT: Tumawag sa inyong Network Provider at magpatulong. Kakailanganin ninyo ang tatlong bagay: ang IMEI number ng inyong cell, ang resibo ng pagbili ninyo ng cellphone at isang affidavit of loss na ginawa sa loob ng tatlong araw ng pagkawala ng cellphone. Kailangan ng isang police report para makagawa ng affidavit of loss from theft. Dadalhin ninyo ito sa NTC at sila na ang magproprocess ng pag-block ng cellphone mula sa network.

Sa cellphone lang iyan. Tungkol sa inyong SIM at cellphone number, kapag line kayo ay bibigyan na lang kayo ng inyong Network Provider ng bagong SIM with the same number for a small fee. Kung naka-prepaid kayo, sorry na lang. Ngayon pa lang, para safe, kopyahin na ninyo ang lahat ng contacts ninyo sa cellphone sa isang address book at itabi ng maayos at i-update regularly. Ito lang ang alam kong fool-proof na paraan para maibsan ang sakit ng mawalan ng cellphone. At least hindi nawala ang contacts niyo.

TANONG: Bakit po itong cell phone ko kahit na may signal ayaw magsend? Ano po dapat gawin pagsend ko palaging message sending failed. Ano po kaya sira, at mahirap magsend? God bless sa iyong column.

SAGOT: Baka hindi po nakaset ang tinatawag na message center number sa messages setup. Kapag ang walang nakaset na message center number sa cell ay hindi ito makakatanggap o padala ng mga text. Tumawag po kayo sa inyong Network Provider at hingin ang number ng Message Center para sa inyong network at ilagay doon sa setup. Huwag matakot, kaya mo iyan, simple lang na problema iyan. O kung gusto mo gumastos ka ng 800 para lokohin ka ng technician na may "software problem" ang cellphone mo kaya di ka nakakapagsend.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

ANO BA IYANG TSAT NA IYAN?

ANO BA IYANG TSAT NA IYAN? Ni Relly Carpio

CHAT ang makipagusap tungkol sa mga bagay-bagay, makipagututang-dila. Siyempre mas class sabihin ang: Care to chat? kaysa: Hey you wanna make ututang-dila?

Ang chat ay bansag din sa pakikipagusap sa internet sa pamamagitan ng pagpapadala ng maiigsing mga message. Kahit mayroon ng Video-Chat sa internet ay ngayon pa lamang nauuso ang makipagusap ng parang sa telepono sa pamamagitan ng internet. Kaya ang siyang naging palasak na paraan ng pakikipagugnay sa internet ay nahati sa tatlo: ang email kung saan nagpapadala ka ng sulat sa mga tao na iyong gustong makausap, ang bulletin board service o BBS kung saan magpapadala ka ng sulat na maaring mabasa ng madaming tao, at ang chatrooms kung saan maari kang magpadala ng mga maigsing mensahe na mababasa ng mula isa hanggang isang libong tao na nasa "loob" ng chatroom.

Matagal nang may chat. Bago nagkaroon ng matinong email ay mayroon nang matinong chat client dahil sa nauna ang BBS na parang chat pero hindi mabilisan.

Ang chat kasi eh pagkatapos mong ipadala ang message ay darating na agad sa kausap mo. Parang text. Hindi tulad ng BBS noon na may panahon pa. Pero wala nang BBS ngayon, napalitan na siya ng mga tinatawag na Forums sa Internet.

So? Ano gamit ng chat? Para sa halos 8 milyon nating kababayan na may mga kamaganak sa ibang bansa, sa pamamagitan ng free-chat ng mga Instant Messenger services ng mga free-email clients tulad ng Yahoo, at Hotmail at ng kung alin-alin pa ay maari kayong makapagusap at makita pa sila sa pamamagitan ng webcam. Sa pagdating ng Voice-Over-Internet-Protocols o VOIP ay maari pa ninyong makausap sila ng parang nasa telepono.

Magkano? Libre. Oo libre. Ang babayaran mo lang ay iyung paggamit ng computer kung sa cybercafe ka makikipag video chat, o iyung pambili ng computer, at bayad sa Internet Service Provider kung gusto mo naman sa bahay.

Aabutin ka ng mga 20,000 para sa matinong pang videochat sa bahay, at kailangan kang magbayad monthly para sa internet at sa kuryente, pero kung gusto mo na buong day-off ni mister sa Jeddah ay nakikita mo siya sa camera at nakakausap sa pamamagitan ng chat ay okay lang. Kung gusto mo iset-up mo sa ulunan ng lamesa ninyo ay pwede na uli kayong kumain na parang naandoon siya mismo sa bahay!

Parang iyung commercial sa TV. Totoo iyon at affordable na dahil ang mura na ng teknolohiya. Kung gusto ninyong magkaroon niyan ay magtanong sa mga mapapagkatiwalaang computer shop. Long distance calls? Laos na iyan.

Siyempre magandang makita mo muna at matuto kung paano iyang chat bago ka mag-invest sa computer at internet connection. Maghanap ng marunong, pumunta sa internet shop at magpaturo.

-0-0-0-0-0-0-0-

TANONG: Pinablock ko po ang unit ko Nokia 6230, ibinigay ko serial number sa NTC pero di ko pinablock ang SIM ko kasi alam ko rin tinanggal. Cgurado po bang blocked na yon at di magagamit? Madali po bang ma-unblock iyon? Pwede pa bang mapa-blocked uli? Thanx much!

SAGOT: Ito ngayon ang masakit na katotohanan: Hindi sigurado ang blocking, madaling magpa-unblock at hindi na pwedeng i-block uli. Kaasar ano?

Kasi mayroong mga asoge diyan na imbis na i-report ang mga obvious na nakaw na cellphone ay pikit matang aayusin ang blocked na cellphone para lang sa ilang daang piso!

Ang tanga naman nila kung hindi nila mapansin na miyembro ng JJA (Jumpin' Jologs Army ika nga ni Mareng Aivie) ang nagbebenta sa kanila ng mamahaling cellphone. Heller! Pambili nga ng matinong toothpaste wala iyung tao (hindi mo ba naamoy!) pambili pa kaya ng Nokia 6230 na worth 18,000!

Iyan ang malaking problema nating mga matitinong mamamayan. Hanggat may mga tao na handang bumili ng nakaw para lamang magkaroon ng cellphone ay may magbebenta. At buhay ang kapalit ng mga pagnanakaw na ito. Naisip niyo ba iyon, kayong mga asogeng nag-tatanggal ng IMEI-block ng cellphone? Tubuan sana kayo ng limang kulani sa isang kilikili!

-0-0-0-0-0-0-0-

Ang Certified Microsoft Office Specialist at beterano sa ICT na si Prof. Jerry Liao ay magpapalabas muli ng kaniyang pinakaiintay na POWERTIPS SEMINAR sa Setyembre 14, 2005 sa Rizal Ballroom ng Makati Shangrila Hotel.

Ang POWERTIPS 2005 ay hindi basta-basta computer seminar. Babaguhin nito ang pagtingin ninyo sa pagtrabaho na gamit ang Microsoft Office. Magtuturo ito sa inyo ng shortcuts, tips, at techniques na papalawigin ang inyong karunungan at galing sa Microsoft Office. Inaanyayahan ang lahat, lalo na ang mga estudyante, teachers at office workers na dumalo.

Supportado ng GlobeLines, Microsoft, Silicon Valley, Smart, AMA, Avaya, Canon, EMC, Epson, HP, APC InfraStruXure, PLDT myDSL, Nexus Technologies, PalmOne, PLDTOnline, Samsung, SAP at ng STI ang Powertips 2005. Siyempre, kasama ang Team WALASTECH! sa pag-endorso dito.

Tickets para sa POWERTIPS 2005 ay mabibili sa lahat ng SM TicketNet outlets. Pwede ring mag-register online sa www.microsoft.com/philippines/powertips.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com o sa SMART +639182772204 at sasagutin namin sa mga susunod na column. Basahin sa http://walastech.blogspot.com ang mga dating issue.

-035-