SONA at LCD

Mabuhay Techfans! Napanood nyo ba iyung SONA nung Lunes? Okay ba? Ewan ko kung may nakapansin sa inyo doon sa isang sinabi ni PGMA, sabi niya 5000 high schools na daw ang may access sa computers sa Pilipinas.

Kung inyong mararapatin, sa tingin ninyo, gaanong kadaming estudyante iyon, at sa dami ng estudyante na humahawak sa computer na iyon, gaanong kadami sa kanila ang magiging bihasa sa computer. Hindi ako nagiging negatibo kabayan, ang sinasabi ko lang ay totoo, malayo na naabot natin mula dati, pero malayo pa rin ang ating hahabulin.

Pero tulad ng sinabi ko dati, ang Pilipinas na ang isa sa mga pinakamaunlad na bansa sa Timog Asya pagdating sa computer literacy. Isipin nyo na lang kung gaano kasama sa ibang mga bansa! Sana, ay ituloy ni PGMA ng DepEd at ng CICT (Commission on Information and Communications Technology) ang kanilang pagpursige sa pagbigay ng computer education sa ating mga istudyante. Andiyan ang kinabukasan, andiyan ang susi ng mas mataas na edukasyon ng ating mga kabataan.

-0-0-0-0-0-0-0-

Nabigla ako sa dami ng text na nakuha ko tungkol sa mga problema sa mga cellphone, lalo na pagdating sa baterya at sa LCD. Sa mga susunod na issue ng WALASTECH ay muli nating tatalakayin ang mga iyan. Pero sa ngayon, ito munang mga ito:

TANONG: Good PM po sa inyo gusto ko lang pong itanong kung ano po ang problema ng cellphone ko. Tuwing madiin po ang upper housing ng cell ko parating insert SIM card. God bless!

SAGOT: Okay, malamang ay ang inyo pong housing ang problema diyan. Baka ho masyadong masikip ang housing kaya po naiipit ang battery at ang SIM holder. Kung hindi po naman ay may tama na ang SIM holder, kung maluwag po ito ay iyan po ang message na ilalabas niya. Iwasan po na ang SIM ay papalit-palit. Nakakasira po iyan ng SIM at ng cellphone. Subukan nyo po na humiram ng SIM at ilagay sa cell nyo, kung ganoon pa rin ho ang problema ay iyung cell, kung hindi, nasira na po ang SIM ninyo.

TANONG: Bakit nagbi-blink ang LCD ng cellphone ko? Nokia 3300 po ang unit ko. Pinalitan ko na po sya ng bago battery pero ganun pa din. Di po kaya sa LCD mismo na problema? Paul of Pasig

SAGOT: Paul, tama ka. Ang LCD na siguro ang may problema. Baka lumuwag ang connector ng LCD sa logic board at power connector ng iyong cell. O kaya ay nasira ang iyong LCD dahil sa pagkabasa o pagkabagsak. Dalhin ang cellphone sa authorized service center.

TANONG: Ano po ba ung maari pang mailagay dito sa cell ko na Nokia 7650? Yung mga nalalaman niya? Tiyaka pwede ko po bang palakihin ung KB memory ng N7650 ko? Wala ung nasasalpak na memory card tnx po.

SAGOT: Wala pong memory card slot ang Nokia 7650. Iyan na po talaga ang memory (KB) size niya. May narinig po ako ng mga nag-papalaki ng memory ng N7650, pero bakit pa? Hindi kasama sa warranty ang ganoong service. Maraming pwedeng ilagay sa N7650 pero hindi lahat ay kanyang nagagamit. Mag trial and error na lang po kayo sa inyong mga makukuha na content. More in the future tungkol sa mga ganitong mga Smart Phones.

TANONG: Sir good PM this is Den Pequena. I was wondering, do you know any authorized service center who could open Nokia 6630 by Vodafone from japan? And would you know how much it costs? I learned that in Greenhills and Harrison, someone is doing those kind of jobs. Its just that i wanted to make sure na who else I can trust except those with recognized establishment. They may cost a bit higher but I believe they won't gyped me. Anyway, hope you could help me, thank you, more power n God bless.

SAGOT: Salamat din sa iyong text Den Pequena. Okay, ang Vodafone ay network provider tulad ng Globe, Smart at Sun dito sa atin. Napapagkamalang Vodafone phones ang kanilang mga unit dahil nilalagyan nila ng logo ang lahat ng phones na kanilang binebenta, pero ito ay mga parehong mga phones na binebenta dito sa atin. Para sagutin ang iyong tanong, oo, may mga tao na nag-o-open line sa Harrison Plaza at sa Greenhills. May neg-text nga sa akin na sila ay authorized na taga-open ng mga Nokia.

Sa aking palagay, okay, pabukas ninyo, ingat lang sa mga ito, panoorin ng mabuti ang kanilang ginagawa at huwag na huwag iiwan ang cellphone ng walang resibo! Humingi ng warranty of service mula sa pinag-paayusan kung sakaling masira kaagad makatapos nilang kalikutin. Hindi ko alam ang presyo at hindi ako makapagbibigay dahil depende iyan sa mga nag-aayos, walang set na presyo. Siguro ang pinakamaganda kong maibibigay na payo eh, kapag masama kutob ninyo sa pinagpapa-ayusan, ay kunin ang cellphone at umalis. Huwag ipasa-alang-alang ang cellphone para lang makamura po.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

BATTERY

Mabuhay! Kay dalas na ang problema ng ating cellphone ay ang battery. Kung hindi low batt ay walang charger, o kaya ay kailangan nating iwan ang cellphone sa tabi ng saksakan at pati tayo, dahil sa dami ng ka-text ay hindi rin makaalis sa tabi ng saksakan.

Ang baterya ang buhay ng cellphone. Ito ay madalas gawa sa tawag na Nickel Metal Hydride o NiMH battery. Ito na ang mas bagong klaseng baterya ng cellphone. Mas magaang, mas matagal ang lakas na naitatabi at hindi kasing delikado nung mga lumang baterya na mas malaki tsansa na pumutok o tumagas.

Ang baterya ng cellphone ay may warranty lamang ng anim na buwan, ito lang ang parte ng cellphone na may warranty na hiwalay sa warranty ng buong unit. Dahil makatapos ng anim na buwan, kahit na anong baterya ay magsisimula ng mag-deteriorate o humina makaraan ang anim na buwan. Kaya makatapos ang ilang buwan ng gamit ay hindi na dapat umasa na tumagal ang charge ng cell.

-0-0-0-0-0-0-0-

Q: Pwede po bang magtanong, kasi isang buwan ko pa lang nabili ang cell ko, pag chi-narge ko kahit di ko gamitin kusa lang magdischarge ano ang sira nito?

Baka po walang sira iyan, kahit ano pong cellphone, kapag inyong hindi ginamit ay mauubos ang charge. Depende ho sa gamit ay hanggang tatlong araw lang iyan bago kailangang i-charge muli. Kasi iyung sinasabi nila na 255 hours standby time ay inyo lang maabot kung pagkacharge ay wala na kayong pipindutin sa cellphone.

Kada tunog, pindot, o ilaw ay nagbabawas sa oras na ito. Kada vibrate at text ay nagtatanggal ng isang minuto mula sa standby time. Kada isang minutong usap ay nagta-tanggal ng lampas isang oras na standby time. Pero kung gusto ninyong makasigurado ay ipacheck up sa authorized service center.

Q: Gusto ko lang pong itanong: cellphone ko madali ma-low batt. Pag itinawag, one bar agad. Kapag nakacharge at di pa full na binunot gumagana pa rin kahit di na siya nakacharge. Bagong palit po battery, pinatingnan ko po, mechanism na po sabi nila.

Siyempre iyan ang sasabihin nila kasi hindi na nila maayos. Madami kasing mga nag-aayos diyan ng cellphone na kapag hindi nila maayos ay sasabihin na kahit ano para hindi masabi na nasira nila.

Sa authorized service centers hindi nila sasabihin iyan. Sasabihin nila kung kaya nilang ayusin o hindi, kung pwede pang isalba o hindi, kasi nga naman lahat ng gawa nila ay may warranty at binabantayan sila ng mga handheld manufacturers. Iyan ang unang una ninyong bantayan, kapag hindi kayang i-esplika ng nag-aayos sa inyo kung ano ang problema, kunin ang cellphone at umalis na, baka ano pa ang mangyari sa cellphone niyo.

Ngayon, tungkol sa inyong cellphone, dahil nagpalit na po kayo ng battery, baka iyung terminal connections sa cellphone ang may tama kaya hindi niya nagagamit ng maayos ang battery. Baka din po na short circuit na ang inyong cell o kaya ay may internal malfunction na. Dalhin agad sa authorized repair center.

Q: Any idea on which unit is good on e-load business. Pag walang power ang unit anong sira? Kainis naman pagawa ko ng pagawa kung anu-ano sira. Nakakatakot pa ang mahal ng service.

Ang magandang pang e-load na business ay ang murang unit, para mas malaki kita diba? Hindi malaki babawiin. Mayroon ng mga brandnew units na tig 2500 na pwedeng pwede nang gamitin para sa e-load. Mas magandang brand-new unit dahil mas mahirap na magkaproblema.

Tingnan ang warranty kung pwede pa rin siya kahit gamitin sa business ang cellphone. Minsan kasi ay navo-void ang warranty kapag ginamit para sa commercial use ang isang cellphone.

Pero kung ma-void man ay okay pa rin, dahil nga bago, hindi sirain. Mas sigurado, at dahil galing sa authorized distributor, maaring ipaayos ng walang pangamba sa kanila. Hindi dapat mahal ang service, dahil nga kapag may warranty ka ay libre iyan.

Pag walang power ang cell, baterya o kaya ay iyung connectors ng cellphone ang siyang may problema. Dalhin sa authorized service center at doon ipaayos. Huwag magtesting ng bagong baterya. Kung grounded iyan ay maaring masira ang bagong baterya, sayang ang pera. Pwede mo na sanang ipambili ng lobo. Hehehehe.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

ERRATA: I forgot to mention two newer types of batteries, Litihium Ion and Lithium Polymer which I will discuss in a future issue of the column.

LOAD ISSUES

Load Questions Ni Relly Carpio

"Pare? May Load ka pa ba? Penge naman o." Alam nyo ba na ang linyang iyan eh hindi ninyo maririnig sa ibang lugar sa mundo? Kasi ang Pilipinas ang siyang gumawa ng teknolohiya na ito at ngayon lamang ginamit ng mag ibang bansa makatapos kunin ang ideya mula sa atin. Diba kaya nga nabigyan ng international award ang Smart diba?

Anyway! Hay nako, buong araw madami sa atin iyan ang iniisip. Kalahati ng bansa: May load pa ba ako? Mas madami pa kaysa: Mag-resign kaya si Gloria?

Tanong: Gud AM! I want to know what's the problem of my cellphone. Everytime I load di makaabot sa expiry date nya. Bigla lang mawawala? If I change my SIM ganun din po ba ang mangyayari? I need your help.

Sagot: Ako man dati ay litong-lito tungkol sa mga Pasa load o Autoload o anumang load na iyan, kasi nga eh, gaanong katagal ba? Bakit hindi na lang hanggang maubos diba? Kung natatandaan niyo ay may isang politiko na nagdala ng issue na iyan sa congresso. Paano daw pag hindi mo naubos load mo at umabot iyung deadline? Saan napupunta iyung load, paano na iyung ginastos nung customer? Gusto niya sana na mag-isplika ang network providers at baguhin ang sistema. Ano nangyari? Wala...kayamot.

Anyway, eto po ang mga solusyon: Magload ng 300 lamang palagi. Gumamit ng load card. Bakit? Kasi mabibili mo ito ng mas mura (May alam ako na 273 isang card! Laban ka?), at may libre pa ito na texts. Ang expiry niya ay two months, siguro naman mauubos mo iyon bago dumating ang dalawang buwan.

Kung walang 300, kumuha ng 50 na Pasaload o Autoload. Bakit? Kasi ganito ang sukat ng expiry. Sa kada 10 piso ay may isang araw ka. Pag nagload ka ng 25, kahit 29 ay dalawang araw (48 hours) pa rin iyan. Pag 50 niload mo, may limang araw ka (120 hours) bago ito mag-expire. Siguro naman sa limang araw eh ubos mo na iyon. At kung sakaling may kailangan kang tawagan ay may limang minuto ka na tawag, hindi lang dalawang minuto. For emergencies ika nga?

Huwag magload ng patingi-tingi, kasi iyung expiry date ay reset ng reset lang pero ganoon pa rin, dalawang araw pa rin, mas magandang pag medyo bumaba ka ng 10 pesos tsaka ka na lang magload uli ng malaki-laki. Wag iyung patagpi-tagpi, dahil pati ikaw malilito hanggang ma-expire na ang load mo, at wala ka nang magagawa kundi magtanong ng: "Pare? May Load ka pa ba? Penge naman o."

~0~0~0~0~0~0~0~

May kopya ka na ba nung bagong movie ni Jet Li? Sa DVD? Talaga? Alam mo bang bawal iyan? Ano? Wala kang pakialam at hindi ka takot kay Bong Revilla kamo?

Hay nako. Alam mo bang pagnanakaw iyan? Oo? Pero ginagawa mo pa din? Dahil ang mahal ng original? Okay, okay. Una, hindi ako nagmamalinis, noong bata ako ay naranasan ko rin na makanood ng mga sine sa mga betamax (iyung mga bata diyan, ang betamax ay iyung nauna sa VHS format) pero hindi iyon rason na hanggang ngayon na madali nang makakuha ng kopya ng sine o ng software para sa computer ay gagamit ka pa rin ng pinirata na kopya.

Kaya lang naman dati ginagawa ang pamimirata sa Betamax ay halos hindi tayo inaabot ng mga sine noon galing sa USA, at ang paraan lang para makadating dito ay sa pamamaraan ng bootleg copies kung tawagin. Tanungin ninyo kahit na sinong manga-nganta diyan kung wala silang bootleg copies noong dekada 80. Sinungaling iyan.

Pero sa ngayong panahon na lahat ng bagay ay maari ng makuha ng madali, hindi na maganda na payagan pa rin ang pagpirata. Isa lamang pong pakiusap, dahil sa ayaw natin at sa gusto, ang paglipana ng piracy ay isang issue na tinitingnan ng mga multinational companies na pwedeng mag-invest ng pera dito sa ating bansa.

Kapag ang piracy rate ay mataas sa isang bansa, hindi nila nagugustuhan na magtayo dito ng opisina o dalhin ang kanilang business dito dahil baka nga naman mapirata rin sila. Parang ganito iyan eh: magtatayo ka ba ng sari-sari store sa gitna ng lugar na lipana ang nakawan? Hindi diba? Pakiusap lang mga kababayan, hinay-hinay naman.

Ayon sa Business Software Alliance, isang worldwide organization ng mga leading software developers, na siyang nagmo-monitor ng software piracy sa buong mundo, ang nawala sa Pilipinas nung isang taon ay PhP3.7 billion dahil sa software piracy. Ang Piracy rate ng Pilipinas ay nasa 71% porsiyento para sa 2004, bumaba ng isang porsiyento mula noong 2003. Pero ang nawalang pera sa ating bansa dahil sa kawalan ng investors ay umabot ng US$69 million dolyares mula US$55 million nung nakaraang taon.

Isipin sana natin ang ating bayan, kundi, ay ating sarili. Iwasan ang piracy.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

COMMON CELL PROBLEMS

MGA KARANIWANG PROBLEMA NG CELLPHONES Ni Relly Carpio

Mabuhay! Medyo dumadami na ang mga tanong na natatanggap ng Walastech! mula sa inyo aming mga giliw na mambabasa. Kaya ngayong araw na ito ay aming sasagutin ang karamihan nila para naman maibsan ang pagintay ng iba sa inyo. Doon sa aming sinagot na intayin ang kasagutan at hindi pa rin namin nadudulungan ay kaunting pasensiya pa po. Medyo technical po siguro ang inyong tanong o kaya ay wala pang nakakarinig ng ganoong pangyayari.

Tulad ng tanong ni Digoy ng Harangalan, Pasig na medyo mahirap sagutin:

Q: Ako po si digoy ng harangalan pasig ang problema ko yung Sun SIM ko pag gabi wala ng signal. 3530 po yung unit ko kapag ibang SIM okay naman! Salamat po.

Nung una ay akala ko ay nagpapatawa lang si Digoy, pero sabi niya seryoso daw siya. May joke kasing umikot dati na ang Sun Cellular ay may signal lamang kapag nakatayo ka sa ilalim ng araw. Siyempre, walang katotohanan iyan, at pambibiro lamang ng mga walang magawa sa buhay.

Digoy, ganyan talaga kapag bagong tayo ang isang network provider (para akong si Tiya Deli Magpayo ah! Hi Tiya Deli!). Eniwey, may panahon na magdadaan bago matakpan ang buong area ng mga cellsite. Isipin nyo na lang na ang kada cellsite ay umaabot lamang ng 24 na milya ang signal, pag lumampas ka na doon ay wala na. At kapag ito ay naharangan ng building o bundok ay mababawasan na ang layo nito.

Isipin nyo kung gaano kalala kapag sa loob ng lunsod, di tulad sa lugar na walang masyadong mga bundok o building, kasi ang cellphone signal ay base sa radio waves na hindi kaya na makatagos sa makakapal na buildings o kabundukan.

Ang kasagutan sa iyong tanong Digoy, baka naman pagdating ng gabi ay nagkakaroon ng interference mula sa electronikong bagay na siyang humaharang sa signal mula sa cellsite na malapit sa inyong lugar. Mga halimbawa nito ay mga high tension cables na mas nagagamit pag gabi dahil sa pagbubukas ng ilaw ng inyong mga kapitbahay, o kaya ay isang malaking neon billboard sign na nakasakto sa cellsite. Iyung mga iba ay hindi siguro naapektuhan.

Q: Hello po tanong ko lang po. Pag nagcha-charge kasi ako nagre-reconnect charger. Ano po ba ang may sira ung phone ko o ung battery? Thank you po. More power - Mariel

Salamat Mariel. Maaring pareho. Ang battery kasi ng isang cellphone ay may six months warranty lamang, pag lumampas na ng anim na buwan ay nagsisimula nang mag detetriorate ang battery hanggang sa hindi na siya makapag charge. Maari rin na iyung charger. Humiram ng kaparehong charger sa kakilala o sa service center para malaman kung alin ang may problema. Tandaan, gumamit ng original batteries at chargers. Huwag isapeligro ang buhay at ari-arian para lamang makatipid ng kaunti. Ang pekeng baterya at charger ay maaring pagsimulang ng sunog.

Q: Gud PM po, tanong ko lang po kung bakit yung cell ko 3530 kapag kino-connect ko ng GPRS "secure server unknown" ang lumalabas. Ano po ba ibig sabihin nito? Ipa-a-activate ko pa ba? globe user

Ang ibig sabihin ng secure server unknown ay hindi niya nahahanap iyung computer server na siyang dapat nagbibigay sa kaniya ng data para mag-internet via GPRS. Nakaset sa cellphone kung ano ang kanyang hahanapin na WAP site, kapag hindi niya ito nakita dahil ayaw siyang papasukin ng secure server, mali ang setup ng cellphone.

Pumunta lamang sa customer service ng Globe o sa authorized service center ng Nokia at ipa-configure o setup ang inyong cellphone. Ipa-activate mo na rin ang MMS mo habang naandoon at testingin kung maayos.

Q: Gusto ko lang itanong kasi ang model ng cell ko sa NOKIA 3510, na activate na ang MMS and GPRS kaya lang di makadownload ng PTONS (Polytones?), possible kaya na wala talaga GPRS services ang unit ko? Rhea A

Minsan kasi ang polytones na ginawa ng content provider ay hindi compatible sa lahat ng phone. May mga klase din kasi ng polytones, at kapag hindi iyon para sa phone mo, baka hindi niya tanggapin. Ang Nokia 3510 ay may GPRS, MMS, at Polytone capability, iyon nga lang, dahil hanggang polytones lang siya, ay hindi siya pwede sa mga hi-fi polyphonic tones (iyung mga tinatawag na 40 polytones) at mga trutones. Ang iyong maaring gawin ay manigurado na lamang sa polytone bago magdownload.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column.

CELL LIFE

Ang Buhay ng Cellphone Ni Relly Carpio

Sira ba cellphone mo? Gaanong katanda na ba iyan? Umabot ba ng isang taon mula nung iyan ay iyong binili? Hindi? Bakit? Sa tingin mo, kasalanan mo ba o ng manufacturers ng cellphone dahil mababa ang kalidad ng kanilang pagkakagawa sa cellphone?

Sa panahon na ito na lahat ng mga elektronikong kagamitan o gadgets ay nagmumurahan at maaring mabili kahit saan, kay lehitimo, o hindi lehitimong mga taga-benta; ang dapat tuunan ng isang mamimili ng mga gadget, mapa cellphone o anupaman ay iyung maasahan na matibay at may warranty. Madaling magsalita na mas matibay ang isang cellphone kumpara sa isa, pero hindi lang iyon ang basehan. Ang dapat tingnan ay ang kabuuan ng isang gadget, dahil maraming mapapagpilian diyan. Tingnan ang sumusunod: affordability, battery life, dust resistance, functions, shock resistance, splash resistance, signal range, stylishness, usability at value. Kung ang cellphone na inyong pipiliin ay mas madami sa mga nabanggit na iyan mas okay siya.

Mas mahal minsan magpaayos ng isang gadget kaysa ang bumili ng bago. Hindi dahil nanloloko ang mga kumpanya na gumagawa ng mga ito subalit ganoon na talaga kasi ang ihip ng hangin ngayon sa industriya ng gadgets. Sobrang bilis ng pagdating ng makabagong teknolohiya na mas kikita sila sa pag benta ng bagong mga model kaysa ayusin ng ayusin ang mga nasisirang mga luma. Disposable Products ang minsang bansag sa mga gadgets na nabibili ngayon.

At dahil nga dito, ay maganda na kapag ikaw ay bumili ng cellphone ay basahing mabuti ang manual, kahit na hindi cellphone, mapaanumang gadget pa ito. At huwag mong sabihin na hindi mo maintindihan dahil Ingles. Kasi may tagalog na manual na kasama ang kadamihan ng cellphone ngayon. Nasa manual ang maraming mga tips at impormasyon ukol sa inyong cellphone na makakatulong para di lamang tumagal ang buhay nito ngunit paano rin ninyo magagamit ng mabuti ang lahat ng functions o mga nagagawa ng inyong cellphone.

Kapapalit ko lamang ng cellphone nitong magpasko. Ang huli kong cellphone ay tumagal ng tatlong taon mula nung binili ko ito nung Disyembre ng 2001. Pero hanggang ngayon ay gamit pa rin ito ng asking asawa. Mahina na ang baterya at medyo gusgusin na ang hitsura, pero oks pa rin naman. Kapag pinalitan ko ang housing niyon at ng baterya eh malaking tsansa na parang bago pa rin iyon.

Ang aking mga cellphone ay aking binili mula sa authorized dealers sa mall. Kahit na mas mahal ang mga ito kaysa sa mga reconditioned o "GSM" (Galing Sa Magnanakaw) na cellphones ay nakasisiguro naman ako na ang mga unit na ito ay may warranty o garantiya na kapag nagkasira ito sa loob ng isang taon ay libre ang magiging paayos. Mas importante na nakakasiguro ka sa cellphone kaysa makamura pero palpakin ka naman.

Siyempre hindi ko na kailangang sabihin sa inyo na iwasan na mabagsak, palanguyin, isawsaw sa sabaw ng sinigang, ipasagasa sa kotse, o pangatngat sa aso ang cellphone. Mga bagay na ginawa na ng aking mga kaibigan sa kanilang mga cellphone dahil sinusukat nila ang kanilang katangahan. Kasi, maaring masira ang cellphone dahil sa ganyang pagtrato; at baka hindi saklaw ng inyong warranty iyan.

~0~0~0~0~0~0~0~

Q: Gud PM. Ano po ang problema dito sa Nokia 3210 ko bakit ayaw na itong magrecharge; mag charged sandali lang mahinto na at one bar pa rin. Thanks - Dong

Dalawang problema lang po iyan, maaring diskargado na ang inyong baterya, anim na buwan lang po kasi ang warranty ng mga cellphone batteries at makatapos ang panahon na iyon ay lumiliit na po ang kapasidad niyan o kaya ay grounded na ang inyong cellphone kaya po kahit na magcharge kayo ay di na umaabot sa baterya o hindi na niya nagagamit ng lubos ang charge. Patingnan po sa isang authorized service center.

~0~0~0~0~0~0~0~

Comment mula sa isang mambabasa: Ganda ng topic mo noong (July 16, 2005), eto talaga ang matagal ko na sanang gustong itanong sayo. Keep up the good work. God Bless!

Salamat po sa inyong nakakatabang puso na comment. Kami po dito sa WALASTECH! at PM ay masaya na kayo ay mapaglingkuran. Nais po kasi ng column na ito ang matulungan ang ating mga kababayan para matututo tungkol sa Information and Communications Technology at kung paano natin ito magagamit upang mapaganda ang ating mga buhay.

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column.

VALUE ADDED SERVICES

Value Added Services Ni Relly Carpio

Mabuhay! At magandang PM sa inyo! Madaming nagtetext sa akin na sila ay nagkakaproblema sa kanilang mga nadodownload, na sila ay pinapadalhan araw araw ng mga logo o whatever at nauubos ang kanilang load dahil hindi nila alam patigilin ito.

Eto ha...ganito patigilin ang mga hindi nyo na gustong download: tumawag sa inyong network provider. From any Globe Handyphone, dial 211, from any Smart Cellphone dial *888, at from any Sun Cellphone dial 200. Sundin ang mga instructions at kumausap ng customer service representative. Intayin nyo, libre iyang tawag na yan, at sabihin ang problema niyo. Kung magaatubili kayo eh hindi matatapos problema niyo.

Hindi kasi pwede na basta ibigay ko sa inyo ang lahat ng deactivation codes ng lahat ng VAS ng lahat ng network providers diba? Medyo kukulangin kami ng papel. Pinakamaganda ang tumawag kayo kasi kada pangyayari na ganito ay iba-iba. Mababait naman ang mga customer service representatives eh. O! Tawag na, nas matapos na ang pagdudusa!

~0~0~0~0~0~0~0~

Lahat ng mga free ringtones, free logo, free whatever na inyong nadodownload ay tinatawag na Value Added Services. At kahit na madami dito ay libre, mayroon din na binibili kada download.

Ang mga gumagawa ng mga ito, ay tinatawag na content providers. Sila ay mga maliliit na kumpanya na kumikita lamang sa dami ng nagdodownload ng kanilang mga ginagawa. Mayroon din na content department ang mga network providers tulad ng Globe at Smart pero iyung talagang malalaki ay iyung mga independent.

Ang content providers ang siyang gumagawa ng lahat ng logo, picture message, animated picture, wallpaper, animated wallpaper, screensaver, monotones, polytones, trutones, themes, games at videos na inyong dinodownload at pinagpapasapasahan.

Ang kada download ay may bayad na nagsisimula sa 2.50 para sa mga lumang logo, hanggang 50 for games. Ngayon, di ko na siguro kailangang sabihin na mag-ingat sa pagdownload kasi isang maling pindot mo eh...goodbye bente!

Q: Hi gud am po, sa bumubuo ng WALASTECH. Tanong ko lang po, bakit laging nag tetext sa akin ang smart kahit di naman ako nag rerequest. Nauubusan tuloy load ko, kahit di pa ko nakakapagtext.

Ganyan talaga pag may cellphone ka, may commercial pa rin, siyempre paano mo malalaman kung may special offer ang iyong network provider kung hindi nila sasabihin sa atin diba? Tapos sasama loob natin kapag huli nating nalaman at patapos na. Ngayon, sabi mo nauubos ang text mo, baka may napagsubscriban ka na VAS o Value Added Service. Tinanong namin ang Smart at ang sabi nila ay:

"If he is referring to Smart/CP SMS updates on promos, vas, events and the like, all he has to do is text STOP ALERT to 211. This is actually in compliance with NTC Memorandum Circular No. 03-03-2005 re: Rules and Regulations on Broadcast Messaging.

If subscriber wants to unsubscribe from a VAS that he has subscribed to, he should text STOP to the access number of the service he is subscribed to. Hope these helps."

O naintindihan mo iyon? Sa susunod na magtext sa iyo iyung nagpapadala ng umuubos ng load mo, mag reply ka ng STOP at ipadala mo duon sa number na nagpadala sa iyo, ok? At kung nakukulitan ka sa kanilang mga free announcements eh sundin mo iyung nasa taas.

Q: Tuwing may dodownload po ako ng rintones eh wala po akong narerecieve pero nababawasan ang load ko. Cell po ba ang may problema? Tnx po sa Walastech.

Oo, baka ang cellphone mo ay hindi nakakatanggap ng ganitong mga datos o VAS. Hindi kasi lahat ng VAS na gawa ng content providers ay para sa lahat ng cellphone. Namimili din iyon ng cellphone. Depende kasi sa demand iyan, kung mas madaming mga Nokia users ang nagdo-download, eh di sila ang mapapagbigyan diba? Pwede rin na natatanggap mo, pero hindi mo nakikita, lalo na kung ang gamit mo ay naka-Symbian OS, tulad ng 6600 at 7650 na kapag nagdownload ay nilalagay sa ibang folder minsan (kadalasan sa downloads folder).

Pero, kung hindi ka naman nakaganoon na cellphone eh, halimbawa ako, araw araw ay may natatanggap ako ng free ringtones at kung ano-ano, kaso...hay nako, hindi naiintindihan ng aking cellphone, kaya sorry na lang ako. Minsan kahit WALASTECH! ka eh minamalas pa rin.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

WARRANTY

MALILIIT NA PROBLEMA NA LUMALAKI Ni Relly Carpio

Alam nyo ba na kapag nasira ang inyong cellphone ay maari ninyong ipaayos ito ng libre sa pamamagitan ng warranty? At habang inaayos nila ang inyong cellphone ay maari kayong humiram ng isang service unit cellphone? At kapag sinuwerte ka ay mas maganda kaysa sa iyong cellphone na pinaaayos ang inyong mahihiram? Iyan ang nagagawa ng warranty.

Pero huwag nyo naman hilingin na masira ang cellphone ninyo para makahiram lang ng elite service unit! Dapat alagaan ang inyong cellphone! Ang cellphone, tulad ng ibang mga kagamitan ay nasisira sa gamit habang tumatagal. At tulad ng ibang mga gamit na inyong binili, ito ay dapat pangaingatan, lalo sa panahon na ito na hindi biro ang pera.

Kada bili ninyo ng cellphone ay mayroon itong kasama na resibo at siyempre, ang warranty card. Itabi ang resibo dahil ito ang pinakalegal na documento na inyong panghahawakan na may binili kayo na cellphone sa legal na pamilihan. Ang warranty card ay punuan sa madaling panahon at ipadala sa distributor o kaya ay sa manufacturer. Minsan, kapag tinamad kayo, ay maari nang maging ebidensiya na within warranty period o nasa loob pa ng warranty period ang inyong binili.

Ano nga ba ang warranty? Ang warranty card ay isang maliit na piraso ng karton na siyang inyong pupunuan ng inyong mga datos na siyang ibibigay sa local distributor at manufacturers ng cellphone para malaman nila na bumili ka ng isang cellphone nila. Dahil sa mga batas tungkol sa mga pagbebenta ng mga electronic na kagamitan dito sa Pilipinas ay kailangan nilang magbigay ng warranty period o panahon na maari pang pwedeng papalitan o ibalik ng mamimili ang kanilang binili na gamit. May mga establisiyamento na nagbebenta ng cellphone na makatapos ninyong magkaliwaan ay hihingin na nila ang inyong warranty card para mapadala na nila sa manufacturer.

At dapat naman na makatapos ninyong bilhin ang cellphone ay buksan na ninyo ito para matesting, baka kung kailan kaya makauwi eh tsaka nyo pa malaman na may sablay pala ang nabili ninyo. Mas maganda na naanduon pa kayo diba? Also, obserbahan ang cellphone na bago, kapag mayroon kayong napapansin na hindi ninyo gusto ay magtanong agad sa service center kung normal iyon. May kakilala ako na anim na buwan nagtiis sa malabong LCD ng cellphone ampala ay may depekto ang kanyang nabili. Ambobo! Hahahaha!

Ang warranty lang ang pinanghahawakan ng distributor at ng manufacturers, ang warranty at mga original parts. Kada cellphone na bibibili mula sa authorized na distributor ay may 6 months pataas na warranty. Ang mga iba ay may mas matatagal pa na warranty sa ilang models nila. Pero madalas sa hindi ay isang taon. Importante na kada bili nyo ng cellphone ay inyong ipadala agad ang warranty card sa distributor.

Madalas ay inaabot ng mula isang araw hanggang dalawang linggo ang pagpapaayos ng cellphone. Pero hindi mo makukuha ang libreng serbisyo na ito kapag hindi mo inasikaso ang warranty card ng cellphone mo.

~0~0~0~0~0~0~0~

Q: Gud PM pwede po bang maibalik sa dati ang signal ang 3210 ko kasi one bar nalang ang signal ngayon, pero dati full bar siya. kaya gumagaralgal ang voice call at mahina ang tunog.

Tatlong bagay lang iyan. Una, sira na ang iyong antenna module; ikalawa, mahina na at kailangang palitan ang inyong baterya, at ikatlo, ang cellsite na malapit sa inyo ay naharangan o kaya ay nilipat. Dahil mas malabo itong ikatlo ay dalhin ang inyong cellphone sa isang authorized service center para matingnan.

Q: Wat ang dapat kong gawin sa new cell ko. Kasi hindi makasend ng text at call. Padala galing abroad, tnx u very!

Iyan ang madalas na nagiging problema dito sa atin, madaming nagpapadala ng cellphone mula sa ibang bansa para dito gamitin. Ngunit, ang mga cellphone na napapadala ay minsan locked sa isang network provider sa bansa na iyon. Doon nagsisimula ang problema dahil kailangang magpa-open line pa ang napadalan ng cellphone. Iyon na lang ang maari mong gawin, dalhin sa isang authorized service center para ma-setup para dito sa Pinas.

Q: Tanong ko po kasi ang cellphone ko kung may tawag ako at apat ang bar ng battery bakit bigla nag one bar kaagad, o pag dalawang bar at may tawag namamatay kaagad ang cell ko.

Ang baterya ng cellphone ay mayroon lamang anim na buwan na effective life use. Ganoong katagal lang ang warranty nila dahil makatapos ng anim na buwan ay liliit na ang tagal at laki ng kapasidad nito. Baka kailangan mo nang magpalit ng baterya. Patingnan sa authorized service center ang cellphone. Baka din dahil grounded ang battery connectors at nakakasira ng baterya. Dapat mong malaman na ang baterya ng cellphone ay naglalaman lamang ng bilang na oras ng buhay. Kada beses na ito ay iyung pailawin patunugin o magvibrate ay mababawasan ito ng isang minuto ng standby kung tawagin. Kada minutong tawag ay mawawalan ka ng isang oras na standby. Kaya kung ikaw ay text ng text o madalas tumawag ay huwag ka ng umasa ng matagalang oras ng standby.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue. -014-

REFURBISHED PHONES

Reconditioned Cell Phones Ni Relly Carpio

Alam nyo ba na madalas ang reconditioned at refurbished phones ay galing sa magnanakaw o kaya ay wala nang warranty at hindi na papansinin ng mga cellphone manufacturers ng walang bayad para sa repair at service? Na baka laking sakit ng ulo lang ang inyong makukuha sa pagbili ng cellphone na ganyan?

Hindi nirerecomenda ng WALASTECH! na mamili kayo ng reconditioned o refurbished na cellphone. Hindi sinusuportahan ng cellphone manufacturers ang warranty at free repair ng mga iyan.

Sige para ma-testing nyo po, pumunta kayo sa bentahan ng mga cellphone manufacturers, iyung mga stall nila mismo sa mall, tanong mo kung may reconditioned o refurbished units sila na ibinebenta. Wala. Kasi, bakit ka nga naman magbebenta ng defective at luma? Eh kung pumalya iyan? Eh di damay na naman ang pangalan ng iyung kumpanya.

Nagtanong si Jay ng Pasig: Hindi po ba magtatagal ang reconditioned na cellphone? Paano po ba malalaman kung reconditioned ang cell?

Natatawa naman ako sa mga nagbebenta ng mga reconditioned na cellphone bna ito. Hindi ba naiisip ng mga taong ito ang ibig sabihin ng reconditioned? Inayos mula sa pagkasira. At refurbished? Dating reject pero inayos muli. Ang refurbished pareho ng restored. May sira, pero ibinalik sa dati, parang bago.

Ang tanong: Sino ang nagrestore? Sino ang nagreconditon? Sino ang nagrefurbish? Iyung factory ba? Sagot: Hindi. Sila-sila rin. Mas maganda pang sabihin na lamang nila na second-hand iyung mga cellphone. At least iyan totoo, at walang sisihan pag nagkaproblema. Diba?

Ang mga "reconditioned" na cellphone ay matatagpuan lamang sa gray market o sa black market dahil hindi nga nagbebenta ang mga manufacturers ng ganitong mga cell. Maski iyung mga nilalagay nila sa Sale ay mga brand new units.

Kaya kung ang cellphone ay nasa mga maliliit na stalls sa mga tagong lugar ng mall at sa mga cellphone repair shops na bumibili at nagbebenta ng second hand cellphones, malaki tsansa, ito ay mga refurbished o reconditioned na cellphone. Lalo na kung ito ay hindi nalakalagay sa loob ng isang matinong sealed box, at walang kasamang manual, at ang accessories ay hindi nakasealed plastic bags.

Pero dahil distributors at resellers pa rin itong mga ito, kahit na stall sila sa pinakaluklok na lugar, maari pa rin na brand new ang inyong mabibili basta ito ay nasa original sealed box. Kung gusto mong makasigurado na brand new ang inyong binibili, bumili ka direkta mula sa mga manufacturers o sa network providers sa mall. Di ka nga lang makakatawad.

Hindi naman illegal ang gray market, sa lahat ng healthy economies merong ganyan. Kapag unhealthy ang isang economy, diyan naglilipana ang black market: iyung mga kagamitan na talagang smuggled o galing sa magnanakaw.

Sa gray market kasi, ang mga kagamitan na second hand at halos hindi na nakukuhanan ng gobyerno ng sales taxes ang siyang binibenta, di tulad sa legal market. Nakakakuha na lamang ang gobyerno ng kaunti kapag ang sale value ay malaki at kailangan ng rehistro ng gamit, tulad ng bahay o ng kotse. Kaya ito nabansagan na gray market. Alam ng gobyerno, pero dahil di naman gaanong kasamaan, pinapabayaan.

At kahit nga may gray market ay hindi naman aangal ang mga cellphone manufacturers, dahil iyung mga umiikot na iyan ay napagkakitaan na nila, wala na silang pakiaalam diyan, at kapag may gumamit pa niyan at nasira ay kikita pa sila pag may nagparepair. Madalas ay inaabot ng mula isang araw hanggang dalawang linggo ang pagpapaayos ng cellphone. Pero hindi mo makukuha ang libreng repair kapag hindi mo inasikaso ang warranty ng cellphone mo.

Q: May tatanong lang po ako, ang cell ko ay N3530, kahit bago ang battery, bigla nalang po namamatay ung power, isang beses lang araw araw, may deprencia na kaya ang power switch?

Mas malaki tsansa eh may sira ang battery na nabili mo, o kaya ay madumi ang connectors ng battery. Pag minalasmalas ka eh may short circuit sa loob ng cell. Dalhin sa mapapagkatiwalaan at authorized repair center.

Q: Gud PM po. Pwede po ba ninyong ibigay sa akin ang password para makaavail ako ng GPRS? Ilan ho ba ang dapat iload sa celfon ko 2 avail d services? May GPRS ba itong cell ko?

Medyo natawa ako dito kasi N3310 ang cell niya, pero convinced siya na may GPRS siya. Chaka! Pero sa mga may problemang ganito, pumunta sa customer service center ng inyong network provider at magpaset-up ng cellphone at mag try mag download habang andoon. Siguro sa 50 pesos na load matetesting nyo nang mag GPRS, mag GPRS download, at mag MMS.

Q: May mga stall po ba sa mall na pwede magdownload ng mga java games? Bakit po hindi ako makapag download ng java games naka set naman po ang unit ng cell ko.

Mas maganda kung pumunta ka sa customer service center ng iyong network provider at magpatulong ka sa pagdownload mula sa kanila. Baka ano pa mangyari kapag sa stall ka bumili ng games. Mapaano pa ang iyung cellphone.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

CALL CENTER MADNESS

CALL CENTER MADNESS! Ni Relly Carpio

Hay nako! Andaming nag text! Ang saya! Madami sa mga nagtanong ay kung saan ang Convergys at ang People Support. Bueno, heto ang lahat ng opisina nila. Pero, nais ko lamang linawin. Example ko lang nung huli ko na column ang dalawang ito kasi sila ang dalawa sa mga pinakamalalaki na call centers dito sa pinas. Madami pa sila diyan, at ang importante ay tingnan ninyo sa classifieds kapag sila ay naghanap ng tao, pero sigurado naman ako na maari ninyong padalan ang mga ito ng application para kung sakali ay makaauna kayo.

Hindi sinisiguro ng Walastech! ang inyong pagkakapasok dito sa mga ito o kung sila ay hiring ngayon, alam nyo naman ang lagay ng ating bansa ngayon diba? Diba?

Kinuha mula sa www.convergys.com Cebu City R. Arcenas Street Arcenas Estates Banawa Hills Cebu City 6000 PHILIPPINES

Manila 7F, Tower 2 The Enterprise Center 6766 Ayala Avenue Makati City 1200 PHILIPPINES Phone: 857 7788

Manila PBCom Tower 6795 Ayala Avenue corner V.A. Rufino Street Makati City 1200 PHILIPPINES

Manila 33rd Floor, Yuchengco Tower RCBC Plaza, 6819 Ayala Avenue Makati City 1200 PHILIPPINES

Manila Block 44, North Bridgeway Northgate Cyberzone Fillinvest Corporate City Alabang, Muntinlupa City 1770 PHILIPPINES

Manila 24th Floor, Robinsons-Equitable Tower ADB Avenue corner Poveda Street Ortigas Center Pasig City 1600 PHILIPPINES Phone: 857 7600

Manila #46 Don Mariano Marcos Avenue Batasan Hills Diliman, Quezon City 1101 PHILIPPINES

Kinuha mula sa www.peoplesupport.com PeopleSupport Center Ayala Avenue corner Senator Gil Puyat Avenue Makati City, Philippines Phone: 885-8000 Email Jobs and Recruiting: manilajobs@peoplesupport.com Fax: 885-8097

~0~0~0~0~0~0~0~

Alam nyo ba na sa pamamagitan ng internet ay maari na kayong makipag-usap sa kahit kanino man sa buong mundo, basta siya ay nakainternet din? Sa napakaliit na halaga?

Ito ang teknolohiya na ginagamit ng mga cellcenter dito sa Pilipinas. Ang tinatawag na Voice Over Internet Protocol o Voice Over IP o VOIP. Ang ginagawa ng VOIP ay imbis na pinadadaan ang mga tawag sa telepono sa mga phone companies, sa kanilang mga cable at mga ground and satellite stations ay s internet na lamang nila pinadadaan. At dahil libre ang internet, libre din ang mga tawag na ginagaw nila. Dito kumikita ang mga call center, humihingi sila ng bayad mula sa mga tumatawag at gumagamit ng kanilang mga kagamitan.

At para mas malaki ang kitain nila, ay sa mga mahihirap na bansa na maliit lang ang bayad sa mga trabahador, tulad ng India, China at Philippines sila nagtatayo ng call centers. Kasi sa pamamagitan ng VOIP kahit saan sa mundo basta may internet ay pwede kang magtayo.

O eh bakit dito, samatalang mas mura sa China ang labor diba? Maski tayo ay doon nagapapagawa. Kasi po, ang mga Pilipino ay mga natural na "spokening dollar you know?! Yes yes yo."

Hindi tulad ng mga taga India o China, tayo ay nakapagi-ingles ng diretso at naiintindihan ng mga taga ibang bansa. Madami sa mga call center ay tinatayo para serbisyuhan ang mga Amerikano at ang mga Briton. Kasi mahilig silang tumawag sa telepono pag mayroon silang hindi alam. Parang iyung dating libreng 114 directory assistance ng PLDT na ngayon ay may bayad na din, ganoon ang madaming call center na naandito sa Pilipinas. Mayroon din na tinatawag na mga hotline o customer support.

Ganoon kasi sa Amerika, kapag may problema ang kanilang mga nabiling mga gadyet o computer o anopaman ay tumatawag agad sila sa telepono sa customer support. Hindi tulad natin na nagmamarunong.

Eniwey, dati ay tinatago pa natin mula sa mga mananawag na dito sila sa Pilipinas natatawag, pero ngayon na batikan na sa mundo ang Philippines as an ICT Hub, eh pwede nang ipaalam na: "Yes mam, you have called the beautiful sandy beaches of the Philippines! How may I help you? Chuvalu chenes chalaling ekek?"

O iyung mga marunong ng mag-internet diyan, imbis na tumawa kayo eh turuan nyo kaya ang isang kaibigan na hindi pa marunong mag-internet kung paano. Kasi. kahit na umaabot na sa tinatayang 40 milyon ang gumagamit ng cellphone dito sa Pilipinas ay ang bilang lang ng mga marunong gumamit ng computer at ng internet ay nasa 8 milyon lang?

Nakakalungkot isipin na ang Pilipinas ay tinataguriang isa sa mga ICT Hub ng mundo pero kakaunti pa rin sa atin ang marunong ng internet. Ang ibig sabihin ng ICT ay Information Communications Technology. Ito ang umaako sa lahat ng teknolohiya, gadyet, o paraan na siyang naglilipat ng anumang dunong o impormasyon tao sa tao o kumpanya sa kumpanya. Kasali dito ang mga computer, mga cellphone, mga telepono, at ang internet. Masasabi din na kasama dito ang lahat ng media tulad ng radyo, TV, at print.

Pero, kahit na 8 milyon lang ang siyang tinatawag na computer literate, sa laki ng numero na iyan, kumpara sa dami ng mga Pilipino, masasabi na rin na mataas ang antas ng dunong dito sa Pilipinas pagdating sa ICT. Kaya nga maliban sa India, ang Pilipinas ang siyang pangunahing destinasyon ng mga call center companies sa Asia. Siyempre andiyan din ang China, pero madami sa mga trainer sa kanila ay galing din ng Pinas.

Madaming mga eksperto ang nagsasabi at nagsitayo na ng mga call center dito sa Pilipinas ang nagsabi na na malaking parte ng kinabukasan ng ICT industry dito sa atin ay ang call center. Sa madaming walang mga trabaho diyan, sana'y inyong isipin kung maari ninyong pasukin ang industriya na ito, hangga't maaga ng di maunahan.

PAGKUHA NG TRABAHO SA CALL CENTER

Pagkuha ng Trabaho sa Call Center Ni Relly Carpio

Mabuhay! Nung isang araw ay may nagtanong sa akin na reader. Ano daw ang age limit sa call center. Ang sagot ko sa kanya ay ang bayaw ko ay 48 years old, pero nasa call center. Ang call center ay isang tinatawag na equal opportunity workplace. Wala itong pinipili na sex, age, o status: Talagang masasabing bata-matanda, may ngipin o wala. Basta malakas ang loob mo, pwede ka sa callcenter.

Hindi rason na mahina ka sa ingles kasi may training naman sa mga call center kung paano makipag-usap ng ingles sa mga caller. May kaibigan ako na mas baku-bako pa ang ingles kaysa sa mukha ni Ong pero nakapasok.

Kaya nang nag text muli sa akin ang same reader na humihingi ng tulong para makapasok sa call center, ang sabi ko, kaunting tiyaga naman, kaunting sikap mula sa kanya...mag-apply naman muna ikaw. Diba teng? Sabi nga ni Kristo bumili ka naman ng ticket muna bago kita papanalunin sa Swipistik!

Q: Ask ko lang po kung may alam kayong hiring ng data encoder? Louie Valdez Graduate of Computer Technology 27 Y.O.

Sumangguni sa Jobstreet.com o kaya ay tingnan ang classified ads ng PM, PSN at ng Philippine Star. Ayaw mong mag call center?

Q: hi hello po jobs info lng po about call center company & how get a job there even i dont have the ability. Romeo Ambe by E-mail

Anong wala kang ability eh ayan at ingles ka ng ingles? Patawa ka naman eh. Joke lang Romeo! Eniwey, sa ngayon ay dapat mong malaman na ang pagpasok sa isang call center ay test di lamang sa iyong abilidad na makatanda ng madaming mga facts and figures, pero ang pinakaimportante ay ang iyong kapabilidad na makipag-usap kanino man, kahit na foreigner.

Tuturuan ka naman ng iyong mapapasukan na call center sa pamamagitan ng kanilang training, pero talagang nasa confidence level mo iyan o bilib mo sa iyong sarili, kapag nakita ng recruiters na wala kang lakas ng loob eh hindi ka na nila pagaaksayan ng panahon na ikaw ay idaan sa training. Bakit ka pa ida-daan sa training kung masasayang lang ang gagastusin nila sa iyo. Ang maganda kasi sa call center eh kahit nasa training ka pa lang eh sumusuweldo ka na ng mahina ang 12 mil kada buwan. Di na masama diba?

Sa company naman na papasukan, subukan mo muna sa People Support at Convergys. Try mo sa kanila dahil sila ang pinakamalaki, at kahit madami ang nag-aaply sa kanila ay mas open sila for training. Marami pa diyan na mas maliit pero oks na din.

Tandaan mo lang na ang sikreto ay lakas ng loob. Sa pag-apply mo, buo dapat ang loob mo, kita dapat agad ito. Wag kang mahiya...trabaho iyan...marangal na trabaho...good luck. Pinoy ka! May agimat ang dugo mo.

~0~0~0~0~0~0~0~

Q: Bakit nagheheadset ang cellphone ko palagi po. May sira po ba? 8210 po ang cell ko. Pwede po ba akong turuan kung paano maalis ang headset sa cellphone ko? -Jeny Cainta Rizal

A: Mahirap na idaan ko sa aking column ang step by step niyan, pinakamaganda ay tingnan ang iyong manual ng cellphone para malaman kung paano. (Kaso ang sabi ni Jeny ay naitapon na raw niya ang kanyang manual...Moral lesson: huwag itatapon ang mga manual ng electronic equipment) Kaya ang solusyon, maghanap ng marunong makialam sa setup ng cellphone at ipaayos.

Q: Pwede po ba malaman kung saan ang address ng shop nyo? Reply please. Paturo lang sana ko kung paano gumamit ng e-mail, cellphone ko ay t290i. Paano po ba gamitin ito?

A: Wala kaming shop dito sa Team Walastech! sa mga IT companies po kami nagsisipagtrabaho at mga IT Journalists. Ang aming mga sources ng information ay ang mga major IT companies. Siguro ang ibig sabihin mo ay ang email function ng Sony Ericsson T290i at paano gamitin ito. Pumunta sa inyong network provider at ipa-activate ang email connection ng inyong cellphone, kung wala ito ay hindi iyan gagana. Also maganda kung magpaturo kayo sa kanila kung aling mga e-mail functions ang pwede sa inyong phone. Ang phone based email ay hindi namin nirerekomenda dahil masyadong maliit ang capacity nito.

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column.