WALASTECH 062- 051103 - MALIGAYANG EID-AL-FITR

WALASTECH 062 - MALIGAYANG EID-AL-FITR Ni Relly Carpio

Eid-al-Fitr sa November 04. Ito ang katapusan ng Ramadan at dito ay tatlong araw na nagdidiwang ang ating mga kapatid na Muslim. Nagbibigayan sila ng mga regalo, nagkikita ang mga pamilya para magdasal at magsalo-salo, at sa ibang mga lugar ay nagpipista pa sila. Maligayang Eid-al-Fitr mga kapatid naming Muslim.

-0-0-0-0-0-0-0-

TANONG: Pwede po ba pakitxt sa akin ang mga new brands CP na medyo mura at saang store po ito mabibili. Tnxs po.

SAGOT: Ngayong malapit na ang panahon ng Pasko ay intayin niyo lang ang nationwide sale na gagawin ng mga network providers. Ito ang pinakamagandang panahon para bumili ng cellphone dahil bagsak sila ng presyo lahat, para sila ang makabenta ng pinakamarami.

Tingnan din ang mga cellphone na nilabas at ilalabas ng Motorola dahil sila ang naatasan ng GSM Association, ang global na asosasyon ng siyam na pinakamalaking manufacturers ng cellphone, na gumawa ng tinatawag nilang the 30 dollar phone. Ito ang cellphone na nakatarget sa mga emerging GSM markets, o iyung mga bagong cellphone markets sa mga third world countries. Kaantabay nito ay nagsimula na silang maglabas ng mga mumurahin pero matibay na cellphones.

TANONG: Paano po ba malalaman kung ang isang cellphone ay recondition? Especially yung tinitinda sa mga mall. Yung colored at hindi colored. Tnx po and more power!!!

SAGOT: Tingnan ang box na bibilhin. Ito dapat ay selyado. Kung ito ay bukas na, baka reconditioned na ito. Kung mukhang kaduda-duda rin ang kahon (kasi nga naman, gaanong kadali na magpeke ng karton diba?) baka reconditioned din ito. Para makasigurado ay bumili lamang sa mga major authorized shops, o sa mga napapagkatiwalaang stalls.

TANONG: Gud evening po. Pano ba isu-subscribe ang GPRS. At hindi rin ako makapag-download ng wallpaper or tones. 3510i po ang unit ng cell ko.

SAGOT: Depende po sa network provider ninyo. Kung sa SMART ay inyong kailangang magtext para sa activation, kung sa GLOBE ay kailangang ipaconfigure niyo pa. Para sigurado ay dalhin ang inyong cellphone sa customer service center ng inyong network at sa kanila ipa-configure at ipa-activate. Ipa-activate niyo na rin ang MMS ninyo.

Siguraduhing may load kayo bago ito gawin dahil kailangang magsend ng test MMS at para makapagsurf ng GPRS site ay kailangan din ng minimum load.

TANONG: Paano po gagamitin ang service command editor menu?(NOKIA) Anong eksaktong Salita ang ita-type ko sa menu. Ung isusulat ko po talaga dun kasi nakakalito po. Ty. –Jayson

SAGOT: Ang service command editor ay mas ginagamit sa ibang bansa, kasi po network dependent po ang service na iyan. Ang mga local network providers po natin ay hindi ginagamit iyang feature na iyan ng NOKIA. Parang ganito po kasi iyan, iyung mga pinapadala natin sa kanila na mga code word para makakuha ng mga picture, tones, etc. iyan po iyung nilalagay sa service command editor sa ibang mga network sa ibang mga bansa.

Huwag niyo nang pakialaman iyan dahil pinadali na ng ating mga network providers ang pagkuha ng content sa pamamagitan ng paggamit ng dedicated activation codes.

TANONG: Ano po ba ang sira ng CP k? Kasi pag nag outgoing call po ako, di ko naririnig yung ring ng tinatawagan ko. Kahit sa 1515 po walang "tut-tut" how much po kaya paayos dun? TY so much.

SAGOT: Hindi mo kasi sinabi kung ano ang model ng phone mo, baka kasi sa setup lang iyon eh. Pero sa totoo lang, ano ngayon kung hindi mo marinig iyung "tut-tut?" Diba mas importante na marinig mo ay iyung boses ng iyong kausap? Tingnan ang setup ng iyong cellphone, baka naka-on ang handsfree niya kaya wala kang naririnig na tunog. Kung gusto mo talagang masigurado ay dalhin ang inyong cellphone sa authorized repair center o sa inyong trusted technician. Di ko rin alam ang presyo dahil paiba-iba po iyan kada technician at service center.

TANONG: Hi, I'm Jerome Angcog of CDO Misamis Oriental. Nabasa ko ang column niyo sa news na kelangan ng 75 thousand applicant sa callcenter Im INFOTECH 2 years graduate. I want to work in callcenter but how? txtbk.

SAGOT: Una, hindi po kami nagtetext back. Ikalawa, kung wala kang balak pumunta dito sa Manila o sa Cebu para maghanap ng ma-a-apply-an na call center ay pwede mong puntahan ang una at nagiisang call center diyan sa Cagayan de Oro. Ang LINK2SUPPORT, INC. na matatagpuan sa Block 2 Lot 3 Trade St. Pueblo de Oro IT Park, Cagayan de Oro City. Tel. #: (088) 853-2200, Fax #: (088) 853-2229, Email: recruitment_cdo@link2support.com, Visit their URL at: www.link2support.com.

Tanong mo kung may opening sila para sa iyo, ang alam ko meron. Pero preferred nila ang online application. Sige na, gawin mo na, now na! Huwag maging batugan sa sariling bayan!

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-062-051103-

walastech 061 - TECH PARA SA UNDAS

walastech 061 - TECH PARA SA UNDAS Ni Relly Carpio

Sa Araw ng mga Kaluluwa ay ating ginugunita ang mga pumanaw at ang mga Santo sa langit. Nawa'y maging makabuluhan, matahimik at ligtas ang inyong Undas. Ating alalahanin na ang panahon na ito ay para sa dasal at pagsasalo-salo kasama ang ating mga minamahal na siyang nakahimlay na.

-0-0-0-0-0-0-0-

Sa pamamagitan ng mga gadget ay mapapadali ang inyong Undas ngayong taon, basta alam mo kung paano ito gagamitin ng maayos. Ang cellphone ang siyang siguradong magiging inyong bitbit sa panahon na ito.

Sa darating na Undas ay medyo mahirap ang asahan ng basta-basta ang serbisyo ng mga network providers. Sa dami ng mga magte-text ay may pagkakataon na magkaroon ng seryosong lag o delay sa pagpapadala ng mga messages. Pipilitin naman sigurado ng mga network providers na hindi ito magkaganito. Pero para makasiguro ay mas magandang tawagan na lang ninyo ang mga tao na inyong katext o kaya ay magpa-miss call kayo kapag natanggap nila ang text niyo.

Ingatan din ninyo ang cellphones niyo sa panahon na ito dahil siguradong maglilipana na naman ang mga asogeng magnanakaw sa mga sementeryo. Kung maari ay gumamit kayo ng lanyard, o iyung tali na kinakabit sa cellphone at ito ay isabit sa inyong leeg o ikabit sa belt-ring ng inyong salawal kung ibubulsa ang cellphone.

Makita lamang ng mga isnatcher o ng mga mandurukot na ang cellphone ay maayos na nakasecure sa inyo ay magdadalawang isip na ang mga ito. Ang kapalit nga lang ay malalaman naman ng holdapper na meron kayong cellphone, pero madali naman silang iwasan ngayon dahil ang daming tao sa lansangan.

-0-0-0-0-0-0-0-

Dangang napagusapan na rin natin ang mga asogeng iyan, heto ang isang tip mula sa aming resident security consultant sa Team WALASTECH: Kung kayo ay maholdap at hingin ang inyong cellphone, alalahanin na ang mga asogeng duwag na ito ay madalang na mambiktima ng nag-iisa lang sila. Madalas, may kasama iyan at kung minalas pa kayo ay baka hindi lang cellphone at wallet ang kunin ng mga iyan, lalo na kung isa kang mayuming binibini.

Kung kailangan mong manlaban, isipin na ang pinakaimportante ay ikaw ay makalayo sa kanila para makahingi ka ng tulong. Isang paraan ay itapon ang inyong cellphone sa lupa imbis na i-abot sa kaniya, peke-in mong mahulog kung kailangan. Habang kanyang pinupulot ito ay pumiglas ka na at kumaripas ng takbo palayo habang sumisigaw ng saklolo. Malaki ang tsansa na uunahin niyang kunin ang cellphone at tumakbo din kaysa habulin ka at saktan.

Wag mo nang isipin ang cellphone o ang pera o anuman. Walang materyal na bagay ang katumbas ng inyong buhay.

-0-0-0-0-0-0-0-

Ayon sa isang survey na pinagawa ng AMA Education System sa Social Weather Stations 41% ng mga taong bayan ay naniniwala na "purely negative" o puro masasama na lang ang nilalabas na balita ng media. Mga balitang hindi daw nakakatulong sa bayan. May 29% naman na ang sinabi ay hindi daw. May 28% ang natira na hindi makapagdesisyon.

Sa mga tinanong at sumangayon sa "purely negative" na galaw ng media, 47% ang taga Metropolitan Manila, kung saan kadamihan ng media ay matatagpuan. Mas kaunti kumpara sa Visayas (33%) at Mindanao (38%).

Samantala ay may 37% na mga Pilipino na naniniwala na ang oposisyon ay walang maayos na plano para sa bayan na ang habol lang nila ay mapaalis si GMA para sila naman ang makaupo. At 28% ang laban sa paniwalang ito, 31% ang hindi sigurado.

Ang survey ay ginawa mula August 26 hanggang September 5, 2005 na kinasasalihan ng ng "statistically representative sample" ng 1,200 voting-age adults sa buong bayan.

Ito ang nais baguhin ng column na ito, kaya ang dulot namin sa inyo aming mga mambabasa ay ang karunungan at mga good news ika nga tungkol sa inyong mga gadget para naman sumaya ang inyong buhay, at hindi niyo na maisip na kaming mga taga media ay wala nang binalitang mabuti. Hane?

-0-0-0-0-0-0-0-

Sa mga naghahanap ng trabaho, eto: ang WINSOURCE Contact Center ay naghahanap ng mga CSR Staff, Outbound at Inbound. Apply through email sa winsource001@gmail.com o tingnan sa hanapin sa jobstreet.com website.

-0-0-0-0-0-0-0-

TANONG: Gud PM. Mr. Relly, gusto ko lang po humingi ng technic kun pano ko magagamit un blinking messages kahit d ko na ipa-upgrade ung cell ko. Kung may blinking kayo pass nyo sa kin, txtbk libre ko kau.

SAGOT: Hindi po iniindorso ng Team WALASTECH ang pagpapaupgrade ng cellphone para sa mga tulad ng blinking messages o anupaman maliban na lamang kung ang upgrade ay ipinagawa o ipinatawag ng manufacturer ng cellphone mismo. Sa totoo lang, di lang nakakatanggal ng warranty ang mga modifications na ganiyan sa cellphone pero nakakasira rin ito dahil hindi naman ginawa iyung model ng cellphone na iyan para sa ganoong feature.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-061-051101-

Walastech 060 - muslim victims

Ang pambibiktima ng ating mga kapatid na Muslim Ni Relly Carpio

Assalaam alaikum. Ayon kay Optical Media Board Executive Director Attorney Marivic Benedicto ang ating mga mahihirap na kapatid na Muslim ay ginagamit at inaabuso ng mga masahol pa sa asoge na mga pirata ng DVDs/VCDs/CDs/MP3s. Kung napapansin ninyo ay marami sa mga nagbebenta ng mga pirated na media na ito ay mga Muslim. Hindi dahil sila ang mga namimirata, kundi dahil sila ang ginagamit para lamang ibenta ang mga ito. At isipin ninyo kung sino ang nakakawawa?

Mayroon mga nagsasabi na kung hindi sila papayagang magbenta ng mga pirated media ay babalik na lang sila sa Mindanao at sasali sa MILF o MNLF at lalabanan ang batas. Ang sagot ng Philippine Anti Piracy Team dito: Ganoon din, kasi ang ginagawa niyo dito ay labag din sa batas. Lumipat lang kayo ng lugar.

Nais ng lahat na matigil ang pangagancho na ito sa ating mga kapatid na Muslim. Madalas daw kasi ay may isang financier na siyang bumibili ng mga CD na ibebenta ng mga ito sa pamamagitan ng concessionaire, ibig sabihin ay ang kita ay sa dami ng benta.

Kapag sila ay na-raid, di lamang sila nawalan ng kita, nabaon pa sila sa utang. At sino ang nakinabang lang? Eh di ang financier. Ayon kay Atty. Benedicto ang mga nagpapasok ng mga pirated media ay ni hindi mga Muslim. Ito ay mga sindikato mula sa Malaysia o mga miyembro ng Triad na galing Hong Kong.

Dinadaan lamang sa mga financier na may mga kakilalang mga Muslim ang mga CD. Oo mga kapatid namin, niloloko lang kayo ng mga tinamaan ng kabuteng mga sindikato. Sa dulo ng linya ng pera, hindi ang mga kapatid ninyo sa Mindanao ang kumikita. Illegal na nga ang gawain ninyo ay niloloko pa kayo.

-0-0-0-0-0-0-0-

Sa yearly budget ng Optical Media Board na 24 million ay talagang mahirap nilang labanan ang talamak na operasyon ng mga timawang pirata. At dahil nga timawa ang mga ito, ay kanilang pinupuntirya ang mga mahihirap nating mga kababayan, Muslim man o hindi. Layon ng PATF na naghahanap ng livelihood project para sa mga kababayan nating niloloko lamang ng mga ito. O kaya ay minumungkahi niya sa mga nahuhuli na magbenta na lamang ng legal na kagamitan.

Kaalinsabay nito ay ang paggamit ng teknolohiya para malabanan ang mga pirata, pero ito ay nakasalalay sa mga manufacturers kaysa sa ating mga consumers o sellers. Ang paggawa ng mga encoded CDs na hindi maaring copyahin, mga CDs na mas matindi ang mga anti-piracy codes at protections. Pero ito ay tinatawag na vicious cycle dahil pabalik-balik lang tayo sa problema na ang ugat ay ang pagiging mahal ng teknolohiya at ng entertainment media na siya namang gustong gusto nating mga Pilipino. Bakit ko nga naman pagkakagastusan ng pagkalaki-laki ng aking kasiyahan kung makukuha ko ito ng mura diba?

Aminado na matagal pa ang laban, at lahat ay ginagawa ng mga manufacturers at ng mga gobyerno para makitil ang piracy. Makitil dahil hangga't may barat diyan o naghihirap o manggagancho ay hindi masusugpo ang pagpipirata.

Kaya sa huli kaibigan, ay nasa iyo iyan. Ikaw ba ay manloloko at magpapaloko pa rin? Ikaw ba ay magbubulag-bulagan na ang iyong ginagawa ay tama? Kahit na nakaw, basta makatipid diba? Kahit ano basta makaisa? Isipin mo anak mo, iyan ba ang gusto mong maging mundo niya pagpanaw mo? Isang mundo ng mga magnanakaw at mga manloloko?

-0-0-0-0-0-0-0-

Sa darating na Oktubre 30 (bukas?) ay ang tinatawag na Lailatul-Qadr o ang "gabi ng lakas" ng ating mga kapatid na Muslim. Pinaniniwalaang sa gabi na ito ay tinanggap ni Muhammad ang revelation ng Holy Quran at sabi sa Quran, ito ay kung kailan inaalam ni Allah ang kapupuntahan ng mundo sa susunod na taon.

Sana ay sa kanilang pagdadasal sa gabing ito ay malinawan ang isip ng ating mga kapatid na Muslim na ito rin ang kanilang gabi ng lakas. Na sa kanilang pansariling kakayahan ay mahanap nila ang lakas na hindian ang mga pirata, na ayawan ang mga financier, na ituro ang mga sindikato. Na baguhin ang kanilang kapalaran at ng kanilang pamilya para maging maganda ang kanilang buhay, kahit na sa isang taon man lamang. At sa kanilang magiting na halimbawa ay matuto at sumunod ang lahat ng iba, lalo na kaming mga Kristiyanong mamimili. Muli assalaam alaikum.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-060-

walastech 059 - OMB vs Piracy

Pirata Binawian ng 19.1M ni Edu Manzano Ni Relly Carpio

Pinagmalaki kahapon ni Chairman Edu Manzano ng Optical Media Board (OMB) sa isang presscon ang mga nagawa ng Philippine Anti Piracy Team (PAPT) kung saan siya ang spokesperson.

Ang PAPT ay binubuo ng OMB ng National Bureau of Investigation (NBI) at ng Philippine National Police (PNP). Ang kanilang kalaban ay ang software at media piracy. Ang PAPT ay ang siyang government initiative ni President Arroyo laban sa lahat ng klaseng pagpipirata na ang gamit ay ang mga CD. Katulong din ni PAPT ang Intellectual Property Coalition at ng Business Software Alliance.

Noong Sept. 16 ay natapos na ang amnesty period na binigay ng PAPT sa mga pirata at sa mga gumagamit ng pirated software. Mula noon ay umabot na sa halos 19.1 Milyong halaga ang nakumpiska na illegal software, mga pirated CDs (DVD/VCD/CD/MP3), at ang mga makinang ginagamit sa paggawa nito.

Sa tulong ng PNP Regional Special Action Unit ay ni-raid ang mga tindahan sa Shoppesville Plus sa San Juan, Orient Pearl sa Recto, Harrison Plaza sa Manila, Metro Walk sa Pasig at mga shop sa MRT Shaw Boulevard. Lampas 20,000 kopya ng mga pirated installer software, interactive games software, software applications at MP3s na nagkakahalaga ng dalawang milyon ang kanilang nasakote.

Kasabay nito ay ni-raid ng mga agents ng NBI IPR Division ang ilang mga kumpanya na gumagamit ng illegal software. Karamihan nito ay mga major Architecture at Construction firms na gumagamit ng mga illegal copy ng Autodesk na ang isang kopya ay umaabot ng PhP 250,000. Umabot ng 8.3 Milyon ang kanilang mga nasakoteng computers at servers sa mga ito.

Sa Cebu ay nagentrapment operation sila laban sa isang American national at ang kanyang Filipino assistant sa pagbebenta ng mga fake na software. Dito ay nakasakote naman sila ng 9 milyon halaga ng software.

Noong Agosto ay nakapagsara sila ng isang planta ng mga illegal CDs at DVDs na may tatlong makina na umaabot ng hanggang 50 libong CD ang naiimprenta sa isang araw. Ang planta na ito ay nagkakahalaga ng halos 3 milyong US Dollars kada isang makinang tumatakbo. Nagsampa na rin sila ng kaso laban sa dalawa pang mga planta para sa illegal importation of pressing machine at unlicensed production of movie products

Ang mga nahuhuling lumalabag sa Intellectual Property Code at ang Optical Media Act ay haharap sa pagkakakulong na aabot ng siyam na taon at multa na aabot ng 1.5 milyon.

-0-0-0-0-0-0-0-

Bago magtapos ang taon ay balak na ng PAPT na magsimula ng mga operasyon sa Visayas region. Balak din nila na magdeputize ng mga anti-piracy teams sa lahat ng provinces at lahat ng chartered cities bago matapos ang taon. Ang mga teams na ito ay bubuuin ng mga 12 hanggang 20 regional agents ng NBI. Ito ay magkakaroon ng time limitation at ng checks and balance para hindi magkaroon ng abuso.

-0-0-0-0-0-0-0-

Kada taon ay umaabot ng 9.8 bilyon ang nawawala sa mga industriya ng entertainment at ng Information and Communication Technology at 2 bilyon sa gobyerno dahil sa intellectual property piracy pa lamang. 49% nito ay sa mga DVDs nasa 43++% sa music (oo si Christian Bautista at si Kitchie Nadal pinipirata) at ang 1% ang sa computer/console games at ang natitirang porsiyento 7%++ ay software. Sa buong mundo 36% ng lahat ng software ay pirated at ito ay aabot ng USD29 bilyon sa nawawalang kita. Ang software piracy rate dito sa atin ay 71% na aabot sa PhP3.7 bilyon na losses.

-0-0-0-0-0-0-0-

Ito ang statement ng PAPT ayon kay Chairman Edu Manzano: We remain committed to our mandate to make the Philippines piracy-free. Piracy hinders our country's global competitiveness, and software piracy, in particular, inhibits the growth of the Information and Communications Technology sector and has posed grave threats to our national economy. Billions are lost because of piracy. These losses translate to thousands of lost jobs and investment opportunities. The taxes, which the government could have collected, could have been used to improve basic services such as health and education. The country would, therefore, stand to benefit a lot if piracy is reduced."

-0-0-0-0-0-0-0-

Ang masasabi lang ng TEAM WALASTECH sa mga miyembro ng PAPT ay mabuhay kayo! At sa inyong mga asogeng pirata: Beh! Buti nga! Tubuan sana kayo ng kulani sa kilikili.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-059-

walastech 058 - demograpiya sa teknolohiya

DEMOGRAPIYA NG TEKNOLOHIYA Ni Relly Carpio

Kung papaliitin natin ang populasyon ng Pilipinas sa sampung tao lamang, ito ang magiging anyo nila: Anim sa kanila ay babae, apat ay below 35 taong gulang, lima ay may cellphone, walo ang may TV, isa ang may landline sa bahay. Dalawa sa kanila ang marunong gumamit ng computer pero isa lang ang may computer at internet sa bahay. Pito ang marunong mag-ingles pero tatlo lang ang maayos ang pagsalita nito at nakakalungkot isipin na isa sa sumpu sa kanila ay hindi marunong magbasa. Isa ay mayaman na mayaman at tatlo ay walang sariling bahay, pito ang mahirap, at isa sa kanila ay nagtratrabaho sa ibang bansa.

Iyan ang tinatawag na demographics o pagkabaha-bahagi o balanghay ng ating bansa pagdating sa pagiging teknolohikal. Ito ang siyang masasabing magandang basehan ng kung nasaan na ang ating bansa. Ito ang nais baguhin ng Walastech, at ng marami sa mga tao sa media, ang gawing mas marunong ang aming mga kababayan sa dunong pagdating sa teknolohiya. Naway sa darating na mga taon, at kung ang ating mga pulitiko ay ititigil ang kanilang walang patutunguhang bangayan ay mabago ito. Kahit man lang mawala iyung isa sa sampu na hindi marunong magbasa.

-0-0-0-0-0-0-0-

TANONG: Where can i apply call center. I'm Joshden am a computer science graduate, working as encoder in Unilever distributor in Gumaca. Thanks wishing for your response. Godbless. Joshden Gumaca

SAGOT: Maraming mga callcenters dito sa Manila, pero wala akong alam sa lugar mo sa Quezon. I guess dapat ay pumunta ka dito sa Manila muna. Ang mga major na call centers dito ay ang People Support, InfoNXX, e-Telecare, atbp. Tingnan din ang mga classified ads para sa mga job opening. Silipin ang aming partner, www.jobstreet.com para sa mga postings na iba.

TANONG: Good day po, I'm DEO18 from Alabang...1st yr. BSME course, I'm not fluent in english but magalang po me at mabait makipagusap...pwede po kaya ako magapply sa call center...at another thing may call center po ba na malapit dito sa Alabang...thanks po...and more power...

SAGOT: Pwedeng pwede kang mag-apply, di ko masisiguro na matatanggap ka, pero ano naman ang mawawala kung mag-apply ka diba? Tingnan mo sa Alabang Technopark sa Filinvest, Alabang marami po doon. Goodluck.

TANONG: Good PM, ano pong school ang nagooffer ng 6 months speech training at magkano po ang tuition fee? Please reply ASAP, Manuel.

SAGOT: May tatlo akong alam na nag-o-offer ng ganiyan: Ang Speechpower (email: info@speechpower.ph / Cubao Office: Joshua Bldg., 932 Aurora Blvd., Cubao, Quezon City. Tel. nos. 911-0832; 911-0833; 911-0834 Fax 911-0830) na medyo matagal na dito sa ating bansa, ang John Robert Powers (4/F Casmer Building 195 Salcedo Street, Makati City, Philippines Tel: (02)892 9511), at ang Toastmasters International (http://www.toastmasters.org/) na isang international club na binubuo ng madaming members at maraming mga chapter dito sa atin na maari mong malapitan. Tingnan niyo na lang sa internet o tawagan po sila sa kanilang rates at memberships.

TANONG: Ask ko lang po kahit po ba high school graduate po pwede sa call center kas po willing po me at interesado po ako.

SAGOT: Pwede po, ang mga call centers ay mga equal opportunity workplaces. Meaning bata o matanda, may ipin o wala, pwede! Tulad ng aking sinasabi ng madalas, ang importante ay may medyo marunong kang magingles, handang matuto, malakas ang loob, at masipag.

TANONG: Pwede kaya mag apply ang undergraduate ng HS bale pansamantala me punta ng CANADA kaya di na me intay graduation, nabasa ko sa WALASTECH. TY.

SAGOT: Dahil nagpunta ka ng Canada ay baka may mas malaki kang pagkakataon na makapasok ng callcenter, dahil kung tutuusin ay may alam ka na sa bansa na napuntahan mo. Maghanap ka ng call center na nagse-services sa Canada at doon ka mag-apply, baka maging alas mo ang iyung pagpunta noon sa Canada.

Pero malaking balakid ang hindi ka tapos ng High School, may program ang Dep Ed at CHED na binibigyan ng test ang mga hindi nakatapos ng High School para malaman kung pwede na silang bigyan ng diploma kahit na hindi pa sila tapos. Sa pamamagitan nito ay maari kang maging high-school graduate kahit hindi ka na pumasok sa iskwela para magtapos. Magtanong ka sa Dep Ed tungkol dito sa DepEd Complex, Meralco Ave., Pasig City Telephone Number: 632-1361 to 71

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-058-

walastech 057 - isang makatech na pilipinas

ISANG MAKATECH NA PILIPINAS Ni Relly G. Carpio

Malaking balakid sa isang bansa ang hindi maging technologically challenged, o iyung hindi makaintindi ng teknolohiya. Isipin niyo na lang kung anong klaseng pagunlad ang naidulot sa inyong mga buhay sa pamamagitan lang ng pagkakaroon ng isang matinong cellphone network sa ating bansa? Naalala niyo pa ba ang buhay na walang cellphone? Hmmm? Hirap ano? Ang teknolohiya, ang dunong, ang siyensiya at ang pagiging makadios ang siyang tamang daan para sa maging maunlad na bayan. Iyan ang nais namin, ang lahat ng Pilipino ay maging Walastech!

-0-0-0-0-0-0-0-

TANONG: Activated na ang MMS at GPRS ko at nakakapagopen ako ng mga bagong dating na MMS. Pagkaraan ng one month di na ako makapagsend at maopen ang MMS ko. Sony Ericsson T290i ang model.

SAGOT: Kung dati ay nakakatanggap na kayo ay baka po may nagalaw lamang sa settings ng inyong MMS. Dalin niyo po uli sa inyong network provider customer service o sa manufacturer service center para mapa-setup muli.

TANONG: Ano gagawin sa cell ko kasi po nasira po yata ung radio niya. Magagawa pa po ba siya? 6220 po unit ko. Salamat po ng madami.

SAGOT: Magagawa po iyan, dalin niyo lang po sa inyong trusted technician o mas maganda sa authorized service center dahil siguradong kakailanganing may palitan na piyesa diyan kung talagang nasira na iyung radyo imbis na may maluwag. Pero nais ko pong ulitin, mas maganda po na huwag gamitin ang inyong cellphone bilang radyo, hindi dahil nakakasira ito, ngunit imbis na tumagal ang battery para makatanggap kayo ng text at tawag ay mauubos agad ito dahil sa pakikinig ng tugtog lamang. Kung gusto ninyong may pinapakinggang radyo ay bumili na lang kayo ng isang maliit na transistor radyo at iyon ang gamitin.

TANONG: Pwede po ba ipa-block yung SIM card ko na globe and smart? Kinuha po kasi yun ng kabarkada ko. Paano po ba magpablock ng SIM. Thanks po.

SAGOT: Okay masyadong matrabaho ang magpablock ng SIM kasi andami mong kailangan. Mas madali at mas mura na bumili ka na lang ng bagong SIM. Ngayon, kung naka-postpaid line ka at ninakaw ng kabarkada mo ito aba'y dapat mong tawagan kaagad ang iyong network provider (Globe, Smart, Sun) at ipadeactivate iyung SIM na iyon at ng ma-isyuhan ka ng bagong SIM. Kung gamitin niya iyon at ikaw ang pabayadin diba?

Pero sa mura ng SIM ngayon, ano kung nakawin niya SIM mo? Kumuha ka ng bago at ipaalam na lang sa mga kakilala ang bagong number. Kasi kung papablock mo pa eh kailangan mo pa ng police report, affidavit of loss, recite of purchase, etcetera! Etcetera!

TANONG: Nine hours ko na charge ang cell ko ngayon ayaw niya na mag on. Ano po ba ang may sira yung phone o battery? Maayus pa po ba ito?

SAGOT: Kahit alin po ang may problema diyan. Pwede ho na ang inyong battery ay diskargado na. Anim na buwan lang po kasi ang effective life ng rechargable battery, makatapos po ng diretsong anim na buwan na gamit ay dahan dahan na pong hihina ang kakayanan nitong magdala ng kuryente. Pwede rin po na sira ang charging connection ng inyong cellphone kaya po hindi niya nacha-charge ang battery.

Normal po na ang initial charging ng bagong battery ay umaabot ng 9 hanggang 15 oras. Pagkatapos noon ay mula isang oras hanggang tatlo ang recharging. Depende po kasi iyan sa capacity ng battery at ng strength ng charger.

Maganda po siguro na testingin ninyo gamit ang ibang battery ang inyong cellphone kung ano ang mangyayari, kung ganoon pa rin ay patingnan niyo na po ang inyong cell sa trusted technician o sa authorized service center.

-0-0-0-0-0-0-0-

The UP Information Technology Training Center (UP ITTC) and the Virtual Center for Technology Innovation in Information Technology (VCTI-IT) will conduct a series of IT Short Courses at the CSRC Building, UP Diliman, Quezon City this October and November. The trainings aim to upgrade the skills of government, academe, and industry IT personnel.

Follows are the short courses, their schedules, and fees:

Java Programming / October 22, 29, November 5, 12, 19 / Saturdays; 8am to 5pm / Php 7,000

Introduction to Visual Basic .NET / October 22, 29, November 5 / Saturdays; 8am to 5pm / Php 4,000

ASP .NET Programming Using Visual Basic .NET / November 12, 19, 26 Saturdays; 8am to 5pm / Php 4,000

Basic Web Development / November 6, 13, 20, 27 / Sundays; 8am to 5pm / Php 5,500

PHP & MySQL / November 6, 13, 20, 27, December 4 / Sundays; 8am to 5pm / Php 7,000

Course outlines and registration forms are available at http://ittc.up.edu.ph Filled-out registration forms may be sent via fax to (02) 920-2036. Participants are required to take an aptitude exam prior to enrollment. A 10% discount is awarded to government personnel and members of the academe.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-057-

walastech 056 - DICTION VS ACCENT SA CALL CENTER

DICTION VS ACCENT SA CALL CENTER Ni Relly Carpio

Sumulat sa amin si Mr. Larry tungkol sa kaniyang problema sa pagpasok sa call centers:

Ako po si Mr. Larry ng Sta. Mesa Manila, 25 years of age at graduate po ako ng BS Computer Science sa St. Jude College Manila last 2003. Nag email po ako sa inyo dahil po sa nabasa kung segment ninyo sa isang newspaper dated Sept. 03, 2005 regarding po sa "ang tawag ng mga call centers.." tanung ko lang po bakit po sa segment ninyo para bang napakadali lang mag apply sa isang call center company as long na masipag ka, handang ibigay ang oras para matuto at magalang, pero bakit po sa case ko masipag naman po ako magalang, willing matuto at handa kong ibigay ang buong oras ko sa isang call center company na ina-applayan ko pero bakit po hindi naman nila ako binibigyan ng pagkakataon na makapasok at masubok kung hanggang saan ang kaya kung gawin.

Marami rami na rin yung mga ina-applayan kung call centers at tahasan ko pong sasabihin na hindi po totoo yung sinulat nyo sa segment ninyo about sa qualifications na sinasabi nyo para matanggap ang isang aplikante sa isang call center co. required po talaga sa isang aplikante na EXCELLENT pagdating sa communication skills. at hindi lang basta marunong kang mag-english dapat may DICTION o di kaya'y ACCENT ng isang american or european person. Ganun po kahirap ang mag aapply based on my experienced... Tanung ko na rin po matutulungan nyo po ba ako na makahanap ng isang call center na gaya ng sinasabi nyo na ang mga qualification ay masipag, magalang, willing matuto at handang ibigay ang oras ng isang aplikante? Kung mayroon po pwede po bang tulungan nyo po ako? Aasahan ko po ang inyong sagot. salamat po! at mabuhay kayo!

SAGOT: Kung tutuusin Larry ay dahil sa iyong karanasan, ikaw dapat ang magsabi sa akin kung alin sa mga call centers ang siyang mahirap pasukin diba? Nang mapaalam naman natin sa ating mga kababayan. Ikaw na rin ang nagsabi na matapos lahat ng tiyaga at hirap na dinanas mo ay hindi ka pa rin natanggap. Nakakalungkot isipin na nasayang lahat ng iyong pagpupursige. Naiintindihan ko ang iyong yamot na hindi ka nakakapasok sa isang call center.

Pero masasabi ko sa iyo na nagtataka ako sa sinabi mo, tahasan mong sinabing hindi totoo ang sinabi ko ngunit biglang bwelta ka na humihingi sa akin ng tulong na makahanap ng trabaho? Nakakalito ka. Ano ba talaga kuya?

-0-0-0-0-0-0-0-

Marami ang umaangal na kesyo ang hirap daw makapasok sa call center, pero sa kada isang nagsasabi sa akin na mahirap ay may nagsasabi din na nung nakalusot naman sila ay agarang gumanda ang buhay nila, at kahit mahirap ang trabaho dahil walang tigil ka sa pagsalita ay okay naman dahil mas madali nga naman ang magsalita kaysa sa magbuhat ng bato o magbanat ng buto.

Ang sinasabi ni Mr. Larry na ang kailangan ay EXCELLENT ang iyong communication skills ay tama. Pero ang sinabi niya na kailangan ay may DICTION ka o ACCENT ay mali. Kasi hindi po lahat ng markets para sa contact center ay nangangailangan ng diction o accent. Ang diction ay ang tamang pagbigkas ng isang salita. Halimbawa: pala (panghukay) pala (dahilan). Ang accent naman ay iyung punto. Oo, hindi lang ang mga Bisaya, Batangueno, at Caviteño ang may punto. Sa contact center kasi, tulad sa totoong buhay, ay kailangang tama ang iyong pagbigkas at marunong kang magtanggal ng punto, kung hindi ay papalpak ang iyong communication skills o galing sa pakikipagtalastasan.

Ang isa sa mga markets na may kailangan ng diction training ay ang Britsh Isles. Pero ang Europe at America ay minimal lang ang kailangan na diction training pero ang accent training ay matindi sa parehong iyan, lalo na sa British Isles. Ngunit, kung iisipin mo na ang kailangan para matanggap ka ay diction at accent lang ay talo ka na. Kasi ang kabaligtaran naman ay totoo para sa mga ibang markets. Paano iyong Spanish market at iyung French market na sineserbisyuhan ng mga contact centers dito? Doon ay halos walang accent, diction lang ang kailangan. Diba?

Ang pinakaimportante ay ang iyong COMMUNICATION SKILLS na siyang talagang kailangang excellent. Iyon kasi ang binebenta ng mga contact centers eh, ang galing ng pakikipagusap ng mga tao nila. Kung sablay ka doon ay wala ka na. Napansin ko sa sulat mo na magaling ka namang makipag-usap, dalisay ang iyong tagalog at wala kang takot na makipag-usap. Maganda iyan, siguro Mr. Larry ay tulad ng ating bayan ay kailangan mo lang ng kaunti pang tiyaga at kaunti pang pasensiya at makakamit mo rin ang iyong minimithing katiwasayan. Mabuhay ka din, masipag na kababayan. Goodluck sa iyo.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-056-

walastech 055 - Q&A 002

MGA KASAGUTAN SA KATANUNGAN Ni Relly G. Carpio

Dumadami na po ang mga tanong na naite-text sa amin kaya po sasagutin po muna namin ang karamihan sa kanila sa mga susunod na issue. Salamat po sa masugid ninyong pagsubaybay aming mga mambabasa. Mabuhay po kayo!

-0-0-0-0-0-0-0-

TANONG: Magtatanong lang po pwede po bang malaman ngayon kung anong gagawin? BIRD po iyung cellphone ko 8199. Gusto ko pong magtext o humingi ng ringtone anong gagawin ko please textback. Art Pang

SAGOT: Basahin mo manual ng cellphone mo. Ingat ka sa pagkuha ng mga ringtone dahil hindi ko sigurado kung supportado na ang phone mo ng mga content providers, baka mabawasan ka lang ng load ng sa wala. Hindi na po kami nagte-text back ng mga sagot dahil po mamumulubi kami sa dami ng mga texters. Pasensiya na po.

TANONG: Paano po ba malalaman ang lokasyon ng isang nagtetext? May paraan po ba na malalaman ito? May gadget po ba na maaring ikabit sa cellphone? from ALO

SAGOT: Pwede po. Ang tawag po diyan ay location services at ito po ay available na sa mga network providers dito sa atin. Kaso po ay ito ay nangangailangan na ang naghahanap ay magrequest at ang hinahanap ay pumayag. Ang pulis lang po ang maaring gumamit ng location service sa pamamagitan ng court order para maghanap ng tao ng hindi niya alam.

Ang gamit po na teknolohiya dito ay ang triangulation o ang paggamit ng tatsulok. Gamit po ang tatlong cellsite na nagsasabi kung gaanong kalakas ang signal ng cellphone kumpara sa kanila ay matatanto po ng sistema kung nasaan ang cellphone. Pero hindi po ito napakasakto na hanggang saan ka nakatayo ay malalaman. Kaya kahit pumayag ang iyong texter ay halos balewala din kung ang habol mo ay makita siya. Ang pinakamalaking gamit po talaga nito ay para sa kalakalan: ang masiguro na nasa sinabing lugar ang gumagamit ng cellphone at ang kargamiento nitong dala.

TANONG: Good PM, nasa magkano po ba ang halaga ng mainboard ng Nokia 3210 at meron po ba second hand nabibili nito? Ayoko po bumili ng bago kasi wala po akong pambili ng bago. Gumagana pa itong cellphone kaya lang mahina ang signal kasi may kaunting short sa mainboard. Magkano kaya mabibili ito?

SAGOT: Mag-ipon ka na at bumili ng bago, hindi dahil minamasama ko ang Nokia 3210, dahil isa ito sa mga mas matitibay na cellphone na gawa ng Nokia, pero kung ang mainboard na ang sira ay mas magandang bumili ka na ng bago. Kahit na 3210 uli bilhin mo, basta bago. Kasi ang pagrepair ng mainboard ay ang simula lang ng sunod-sunod na pagpapaayos dahil damay-damay na iyan sigurado.

TANONG: Good PM ho. Asked ko lang ho, bakit ang cell ko na Sony Ericsson T230 kusang namamatay at nabubuhay at di ako makatext o maka call at isa pa kahit bagong charge pag pinindot na, nalo-lowbatt kaagad, bago naman batt ko. Tnx! Ding.

SAGOT: Baka may sira po ang battery connector ng inyong unit. Kung luma po kasi ang batt ninyo ay sasabihin ko na iyon ang may problema, pero dahil sabi niyo nga ay bago, malaki ang pagkakataon na may tama ang power connectors ng phone mismo. Maari din na nagshort ang battery ninyo at nagluluko. Dalhin ninyo sa inyong trusted technician o sa authorized repair center.

TANONG: Recommend ka naman ng cellphone technician sa may Quiapo na pwedeng pagkatiwalaan.

SAGOT: Wala akong kakilalang technician sa Quiapo pero may kakilala akong technician na part ng TEAM WALASTECH. Si Papa Doie! Kung mayroon kayong mga katanungan tungkol sa cellphone repairs o naghahanap ng cellphone idulong niyo lang sa amin.

TANONG: Hi Good PM. Im Janice 25 years old. I want to be a part of ICT. I've worked in a call center before. May I know what qualifications does your company seek?

SAGOT: Di po kami naghahanap ng tao. Salamat po sa inyong text.

-0-0-0-0-0-0-0-

Sinimulan kamakailan ng De La Salle University College of Computer Studies sa pakikipagtulungan ng MMOG Philippines ang 2nd Annual MobiGame Competition 2005.

Imbitadong sumali ang lahat ng universities at colleges sa kumpetisyon na ito kung saan ang mga kalahok ay kailangang gumawa ng bagong game sa cellphone. Nais nitong ipagpitagan ang galing ng Pilipino sa programming at creativity.

Ito ay sponsored ng Microwarehouse, Z-Zone (Skyblade), ABS-CBN Tantra, Level-Up Rose Online, Globe WorldPass Internet, Inkstore, at GXS. To learn more about the 2nd Annual Mobile Game Competition visit www.mmog.com.ph/mobigame2005 or contact Marc Sy at marc@mmog.com.ph or contact MMOG Philippines at 400-6077.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-055-

walastech 054 - sinaunang network

walastech 054 Sinaunang Network Ni Relly Carpio

Mga 2500 taon na ang nakakalipas ay si Cyrus the great, ang unang Achaemenian Emperador ng Persia, ang siyang namumuno. Ang Persia ay Iran ngayon, pero ang lawak niya ay umabot mula India hanggang sa Mediterranean. Ang Persian Empire ay tumagal ng halos 250 taon. Ang nakakamangha sa Persian Empire at si Cyrus ay siya ang unang gumawa ng matatawag na cellular network.

Cellphone? Hindi, cellular lang. Tinanto kasi ni Emperador Cyrus kung gaano kalayo ang matatakbo ng isang kabayo sa isang araw, at naglagay siya ng istasyon sa kada haba nito. Kaya madali siyang nakapagpapadala ng sulat at nakatatanggap ng balita kahit na mula sa kaduluduluhan ng kaniyang nasasakupan. Iyon nga lang, hindi tulad ng cellphone eh buwan ang inaabot imbis na isang iglap. Ano magagawa niya, lampas 13,000 libong kilometro ang laki ng kaniyang nasakupan.

Ganyan din ang ginagawa ng mga cellular network providers ngayon. Gamit ang mga cellsite ay kanilang sinusukat ang hangganan ng kanilang mapapagpadalan ng signal at pinagdidikit dikit sila para magamit natin. Kada text, kada tawag ay impormasyon na pinagpapasapasahan ng kanilang mga kabayo hanggang sa mahanap ang inyong kaututang-dila.

Kilala rin si Cyrus bilang ang kaunanahang gumawa ng declaration of Human Rights na naging basehan ng ginawa at ginagamit magapasahang gang ngayon ng United Nations.

-0-0-0-0-0-0-0-

TANONG: Good PM! Naiwan ko po yung cellphone ko sa taxi pero di ko nakuha ang plate number niya, gusto ko po mabawi ang cellphone ko pero papaano? Thanks BF Parañaque.

SAGOT: Ang opisyal na sagot ay: Tumawag sa inyong Network Provider at magpatulong. Kakailanganin ninyo ang tatlong bagay: ang IMEI number ng inyong cell, ang resibo ng pagbili ninyo ng cellphone at isang affidavit of loss na ginawa sa loob ng tatlong araw ng pagkawala ng cellphone. Kailangan ng isang police report para makagawa ng affidavit of loss from theft. Dadalhin ninyo ito sa NTC at sila na ang magproprocess ng pag-block ng cellphone mula sa network.

Kung napansin ninyo ay ni minsan hindi ko sinabi na mababawi niyo ang cellphone ninyo. Iyan ang katotohanan. Maliban na lang kung makonsensiya ang drayber o ang nakakita, o kaya ay mahuli ang nagnakaw ng cellphone bago niya ito naipasa, sorry ka na lang. Just keeping it real.

TANONG: Good AM sir! My cellphone I've been use is 1 year from now. But I observe many text are not shown to notify it. What wrong it is? Can you give me some tips to handle this?

SAGOT: Ano sabi mo? Hindi ko maintindihan ang tanong mo. Ang tip ko sa iyo, kung nagaaral ka pa, makinig ka sa English teacher mo, at kung hindi, magabasa ka ng mga English na libro ok?

Ngayon hulaan ko ang tanong mo ha: Isang taon na ang cellphone mo at maraming text ang hindi mo na nakikita o natatanggap kahit na pinadalhan ka? Ang solusyon eh magpalit ka ng message center number na makikita sa settings ng iyong messages menu. Tumawag sa inyong network provider para humingi ng bagong message center number.

Kahit hindi aaminin ng mga network provider na nagkakaproblema sa mga message centers nila, ay walang perpekto sa mundong ito. Sa dami ng mga SMS messages na umiikot sa ating mga ulunan ay magkakaroon talaga ng aberya. Sa pagpapalit ng ibang message center number ay nagbabakasakali ka na mas maluwag iyung gagamitin mo at mas mabilis na makakahimpapawid ang iyong mga text.

TANONG: Magagawa pa kaya yung pinadala sa akin ng sis ko na US Model SGH - 426 dual bang lang nakaprogram sa AT&T Wireless? Sabi nila magagawa daw pero walang signal.

SAGOT: Actually SGH-x426 ang model niyan. Walang signal kung sa AT&T ang hahanapin pa din ng telepono dahil wala namang AT&T Wireless signal dito.

Para sigurado, tawagan mo sila mismo o kaya ay bisitahin mo: Ang hotline ng kanilang Customer Contact Center ay 1800-10-SAMSUNG (1-800-7267864) para sa PLDT lines o 1800-3-SAMSUNG (1800-3-7267864) para sa Digitel lines. Tumawag mula kahit anong araw mula 8:30AM hanggang 8:30PM.

Kung gusto mong bisitahin ang kanilang Samsung Service Plaza, ito ay bukas Monday - Friday : 8.30AM ~ 5.30PM at pag Saturday: 8.30AM ~ 12.30PM. Sarado sila pag public holiday at Linggo. Ito ay matatagpuan sa Basement 1, Bonaventure Plaza Building Ortigas Avenue, Greenhills, San Juan, Metro Manila.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-054-

walastech 053 - COMPUTERS PARA SA LAHAT

COMPUTERS PARA SA LAHAT Ni Relly Carpio

May computer na ba kayo sa bahay? May Internet na ba kayo? Marunong ba na magcomputer ang mga anak ninyo? Hindi pa? Panahon nang matuto! Ang mapagiwanan ng panahon, lalo na ngayong halos araw-araw ay may bagong dunong na nadidiskubre ay walang dudulot na mabuti sa inyo.

Kung hindi niyo kayang matuto ay huwag niyo namang pagkaitan ang inyong mga anak, dahil iyon na lang ang maari ninyong ipamana sa kanila na hindi maaring mawala sa kanila, at iyan ay ang edukasyon. At kahit ano sabihin ng sinoman, ang karunungan ng mundo ay nasa internet, at para ito makita ay kailangan ng computer.

Kung namamahalan kayo sa mga presyo ay tandaan ito: hindi niyo kailangan ng malakas na computer, ang kailangan niyo lang ay isang computer na maayos na gumagana at magagamit. Magtanong sa bilihan tungkol sa mga People's PC na subsidized ng pamahalaan ang presyo.

-0-0-0-0-0-0-0-

Sa mga naghahanap ng mura na malakas na computer para sa kanilang business o trabaho: Makatapos binili ng Chinese company Lenovo ang Personal Computing Division ng IBM ilang buwan ang nakakaraan ay naglabas na sila ng kanilang sariling mga version ng ThinkCentre at ng sikat na ThinkPad. Tulad ng inaasahan ay mas mura ang mga bagong produkto na kanilang nilabas, swak na swak sa budget ng mga small and medium businesses na naghahanap ng reliable na desktop computer o laptop.

Kilala ang tatak na Think sa mga computer mula pa ng ito ay gamit ng IBM. Ngayong Lenovo na ang may gamit nito magiging mas kilala ang mga Think computers at services dahil sa mas affrordable na ito kumpara noon.

Ang ThinkCentre E50 ang kanilang bagong desktop computer na murang mura lang pero kayang kaya ang mga pangangailangan ng mga small and medium businesses na siyang naguusbungan dito sa atin.

Samantala ang unang mga widescreen format laptops ng ThinkPad series, ang 14 inch ThinkPad Z60t at ang 15.4 inch ThinkPad Z60m ay available na rin mula sa Lenovo. Ito ang mga kauna-unahang wide screen laptops na ThinkPad. Ito ay nakatuon sa mga mamimiling tinatawag nilang ProSumer o Professional Consumer, mga mamimili na alam kung ano ang gusto nila sa isang laptop pero marunong magbudget.

-0-0-0-0-0-0-0-

TANONG: Hello! Ask ko lang po kung ano sira ng cellphone ko. Nagkoconnect service siya, then pinagawa ko ok na! Now ang sira naman always nag-off. Nakakainis nga eh! Thanks! God Bless!

SAGOT: Siguro lang, dahil nagkaproblema siya sa connection service ng kaunting panahon ay naapektuhan na ang inyong battery. Maganda siguro na papalitan na ninyo ang battery ng cellphone. Malakas kasing makaubos ng battery ang pagpatay-sindi ng cellphone. Pati na rin ang paghanap ng signal. Maari rin na nagkatama ang power connectors ng battery at ng cellphone. Madalas kasi naman na kapag naasar tayo sa isang sirang cellphone ay ito'y ating kinakatok, baka hindi ninyo sinasadya ay nakatok ito ng medyo tama at naapektuhan ang battery connectors.

TANONG: Sir good PM. Ask ko lang sir kung pwedeng pakabitan ng internet ang computer ng walang telepono? Kung pwede anong gagamitin namin? Thanks. Waiting for your reply.

SAGOT: Apat na klase lang ang paraan ng pagkabit sa internet. Ito ang dial-up gamit ang linya ng telepono, ang DSL na gamit ay cable lang ng inyong telepono, ang Cable na gamit ang cable ng inyong Cable TV at ang WiFi connection na padating pa lang na teknolohiya. Mayroon ding tinatawag na T1 na gumagamit ng dedicated line na cable mula sa internet service provider, pero mga corporasyon lang ang gumagamit noon. So pwedeng magpakabit ng internet kahit wala kayong telepono, kung may Cable TV kayo at ito ay nag-o-offer ng Cable Internet.

TANONG: Good PM nakakasira ho ba ng battery ang laging paglalaro ng games sa cellphone? Apektado rin ho ba ang mga pagpindot ng numbers o letters kasi ho nagtitinda me ng SMART Load. Maraming salamat and more power. You're a big help. God Bless from Crising of Las Piñas.

SAGOT: Ang battery ng isang cellphone kapag inyong sinimulang gamitin na ay dahan-dahang nabubulok. Humihina ng humihina ang kapasidad nitong magtabi ng kuryente hanggang sa hindi na niya makayang magbigay ng kuryente sa kanyang kinakabitan. Ang pagkahina na ito ay nagsisimula mula anim na buwan makatapos unang gamitin ang battery. Hindi naman nakakasira ng direkta sa battery ng callphone ang kahit na anong pagpipindot o paglalaro. Pero dahil sa madalas na gamit at madalas na pagcharge at discharge ay mas mabilis masisira ang battery kung ikukumpara kung hindi ninyo gagamitin ng ganoon.

~0~0~0~0~0~0~0~

Padala ang mga katanungan ninyo tungkol sa T.E.C.H. (Telephones, Electronics, Computers at Hardware) sa walastech@gmail.com at sasagutin namin sa mga susunod na column. Basahin sa http://walastech.blogspot.com ang mga dating issue.

-053-